Aesaya 36 - mzwDBL

Asiiria Koojen Senakerib aah Jerusalam tena

¹ Juda Kooro Hɛsɛkea aa di kora bene fi dɛ anaarɛ ta la, Asiiria koojen Senakerib baa yo Juda harɛ bwɛjena baa ma danjwɛkpeɡa bara, dɛ lɛa dɔɔh.

² Asɛ Asiiria koojen tomɛ o laa nomoa ne laa tena baa wara, ba le Lakes dɛ ba Kooro Hɛsɛkea be Jerusalam. Laa nomoa la aa laŋa la, o kaa che bɔɔ baa kwiu feelɔɔ ken le nyundua tam la ta, nee palɛ dɛɛ kpɔ o bini la harɛbɔr. O lɔ ŋwɛnɛjen waa kaa bela baa dɛ ɛ yale toma.

³ Baala batoro le Kooro Hɛsɛkea be Jerusalam, dɛ la Asiiria koojen torome la be. Banee, Hilkia bibaa Eliakim waa chɔ koodem nyoa, ne Sɛbna waa ɛ kooro karake, dɛ Asaf bibaa Joa waa dɛ nyiŋi kooro tɔne ta.

⁴ Laa sitɔɔ la ŋɔ ba be, bá la ka ŋɔ Kooro Hɛsɛkea be kɛŋɔ Asiiria koojen la dɛ bɔɔro ŋɔ, “Bɔkwa taa he kpɔ he te dawɛ dɛɛ hwɛɡɛ ɔɔ?

⁵ He dɛ lii kɛŋɔ nyoa wobol do kɛ wejema, ne kpeɡri ba kpɔ dɛɛ yo laa kɛɛ? Ume nɛɛ he kpɔ he te dawɛ, dɛ ɛɛ mɛ dɔm nɔɔ?

⁶ Na, dɛ Ijipt kooro nɛɛ he kpɔ he te dawɛ aa, a do kɛŋɔ haa kpɔ pul ɛ daŋɡbala, asɛ o ku dɛ tɔɡɛ he nɔn. Gɛɛ Ijipt kooro do tɛ nɛra baa kpɔ ba te dawɛ o nɛɛ bwa.

⁷ Kooro Hɛsɛkea ta ɡelɛ he chɔɡ kwaa haa dɛ toma bwea dor dɛ ŋɔ Juda harɛ ta ne Jerusalam tena bwa be ŋɔ báa tomɛ kombeŋkpoŋ ta Jerusalam aa?

⁸ N ne hɛɛ ŋwɛɛroo n naa Asiiria koojen sɔn ta. Mɛɛ tɛɛ jaɡre kaɡboŋa anɛɛ, dɛ hɛɛ won dɔ laa tena bá so a bwa ta naa.

⁹ Haa won kpɔ he te maɡɛ Asiiria koojen nomonome la bini bechala kwara, kɛ he dɛ hwɛɡɛ Ijipt kooro nɛɛ kɛ o ba tɛɛ kwaa aa do kɛŋɔ torɔɡore, ne laa tena baa dɛ so jaɡre ta.

¹⁰ He dɛ lii kɛŋɔ Korowii habɔɔ n le dɛɛ ba dɛ́ ba yo he harɛ nɛra nɔ kɛɛ? Korowii ɡbabirii ŋɔ n be ŋɔ ń ba dɛ́ ba chɔɡ harɛ nɔ.”

¹¹ Asɛ Eliakim ne Sɛbna dɛ Joa ŋɔ Asiiria koojen laa sitɔɔ la be ŋɔ, “Nomoa, ya dɛ soŋe, bol Aram tena wobol baɡle he bonɔɔna. He bolaa, ya dɛ no. Bɛ Hibru tena wobol kpɔ bol ya be. Nɛra baa cheɡɛ bwɛjen nɔ danjwɛɛ nɔ ta dɛ no he be.”

¹² Anee laa sitɔɔ la chaŋe ŋɔ, “Hé dɛ lii kɛŋɔ he ne he kooro ɡbo bee n nomoa tom mɛ ŋɔ ń ba bol waa nɔ kɛɛ? He ɡbo laa, nɛra baa sosoɡe bwɛjen nɔ danjwɛɛ nɔ ta ɡe jao, baa di ba ɡbaɡba benaa, dɛ́ nyɔ ba feene kɛ heya.”

¹³ Ate, laa sitɔɔ la ir che dɛ kpɔ takpeɡ bol waa Hibru tena wobol ne ŋɔ, “Hé no Asiiria koojen waa maa ba a ne!

¹⁴ Dɛ́ he bɛ ɡel Kooro Hɛsɛkea neɡre heya. Waa won lɛ heya!

¹⁵ He bɛ o nɛɛ teŋɛ, dɛ́ ɡel hé kpɔ he te dawɛ Korowii nɛɛ ŋɔ, wɛɛ lɛ heyaa, waa bwɛjen nɔɔ kpɔ do Asiiria koojen nɔn ta.

¹⁶ He bɛ Kooro Hɛsɛkea waa no. Asiiria koojen dɛ bol ŋɔ, hé le bwɛjen la bini ba o be, dɛ́ kpɔ he te ba do o lɔɡa. Wɛɛ ɡeloo he bini bɛlbwa dɔ o fiɡ ne o ɡrepo daa kooni nɔna di, dɛ́ nyɔ o kɔlɔŋ bini ne,

¹⁷ dɛ ka tel kɛŋɔ maa kpɔ heyaa kaa bojaŋ harɛ waa do kɛŋɔ he kon nɔ ta. Harɛ daa kooni aa lole he dɔ sen le a ta, ne mea baa kpɔ ɛ paanoo, ne ɡrepo daa kooni.

¹⁸ He bɛ ɡel Kooro Hɛsɛkea neɡre heyaa ŋɔ Korowii ɛɛ lɛ heyaa. Harɛ bɛl voɡ wono lɛ harɛ la nɛra le Asiiria koojen nɔn ta ka aa?

¹⁹ Leperaa bwɛjena Hamat ne Aapad voɡa dɔɔ? Sefavaim tena voɡare sɛ? A wono lɛ Samaria tena aa?

²⁰ Harɛre nɔ voɡ besoo wona lɛ o harɛ le n be nɔ? Ɛrɛɛ Korowii ɛɛ ba wona lɛ Jerusalam ɔ?”

²¹ Asɛ nɛra la hel jeiih ken, ba ta nentane tae ta harɛ, dɛkalkɛŋɔ dɛ Kooro Hɛsɛkea tɔ sie ŋɔ ba be ŋɔ ba bɛ on chaŋe.

²² Ate, Eliakim ne Sɛbna dɛ Joa kɛɛ ba laala, a baɡle kɛ ba loo kuu, dɛ la Kooro Hɛsɛkea be, dɛ ka bol waa Asiiria koojen laa sitɔɔ la aa bola la o be.