Aesaya 34 - mzwDBL

Korowii ɛɛ tɛr o dɔma deŋnee

¹ Harɛre nɛra, hé suuh tel dɛ́ no! Hé cheɡ deŋne dɛ́ no! Hé ɡel harɛ ne kwaa bwa aa lɔ o ta no n wa!

² Korowii baah di harɛre nɛra bwa nɛ. O bwaawee iro kohona ba laa tena nɛ. O lee ba cheɡ dɛ́ kpoo ba kwaraa.

³ Baa ban huɡe, baa paa baa ta, ásɛ ba sɔɔh tɔ bɔr bwa koŋkoŋkoŋ ken, ba chale ɛɛ palɛ bwejena dor bobɛlbwa.

⁴ Wee ne korobie dɛ weweela bwa ɛɛ nyoɡroo, ásɛ Korowii doa ɡuɡri kɛŋɔ baa ɡuɡri kalaŋ la. Kwaa aa lɔ nyundua bwa ɛɛ lee harɛɛ kɛŋɔ papohola aa le daa ta dɛɛ lee la.

⁵ Korowii kere baa tonɛ o toma nyundua aa, wɛɛ berɔɔ ba Edom tena nɛ. O pa ba bolchɔɡe cheɡ, dɛ́ kpoo ba.

⁶ Chal ne noo ɡboo tɔ Korowii kere la bwa, kɛŋɔ baa kpo pebiiri ne boohna dɛ ler a kporombie ɛ saraha ken. Korowii dɔ saraha ɛɛ bwɛjen Bosra. Nɛra ɛɛ serewoo kɛrɛdɛ kere la nyoa, Edom harɛ ta.

⁷ Wɛɛ kpoo nɛra baa dɔ kpeɡri kɛŋɔ kpɔɡ bini nae, ne banɔ la baa do kɛŋɔ nabali bwaa, ásɛ harɛ la bwa sɔ chal ne no.

⁸ Korowii le tɔpere bɛl cheɡ, dɛ́ ba lɛ Jerusalam tena, dɛ́ chɔɡ ba dɔma bɔ kem.

⁹ Edom harɛ neerare ɛɛ ɛo kɛŋɔ kootal ken, bela teera ɛ kɛŋɔ jebɔrɔwe, ásɛ harɛ la bwa fuh.

¹⁰ Wɛɛ dɛɛ fuuh webaŋa ne jwaana waa wola dime bwa, ásɛ o ninchuu ɡe teŋɛ tɛr dɛɛ kaa nyundua saŋ bɛlbwa. Harɛ la ɛɛ chɔ pɛɛpɛɛ saŋ bɛlbwa dɛɛ la, nomɛlbwa aa wola belaa kpɔ kpa bwa.

¹¹ Kwiu bwa soo siwi, ne ɡaahɡaahre lɛ bela dɔɔh. Korowii ɛɛ ɡeloo harɛ la berɛ dimɡbia waa wola maree dɔ.

¹² Kooro aa lee do dɛɛ nyiŋi harɛ la ta, sitɔɔla ɡe aa lee do,

¹³ ásɛ sɔɔhne le kooderemi, apeah ɡe le bwɛjena baa ma danjwɛkpeɡa bara, ne ba dekpeɡa ta. Wɛɛ berɛ kalampoŋare ne kwiure sobɔree.

¹⁴ Belaa pua hɛŋle ɡbo harɛ ola ne ɡboli ɛɛ ba doe dɛɛ ɡɔle, dɛ́ do ɡbɔɡa dɛɛ yerɛ dɔŋa. Kpɔɡ bini ola aa dɛ valɛ jwaana ɡe ɛɛ ba belaa, dɛ́ baa onɛ.

¹⁵ Kwiure ɛɛ sɔh a kɔne belaa dɛɛ hwe, dɛ tee a bii do a kena lɔɡre dɛɛ nyiŋa. Kokosakire ɡe ɛɛ ba cheme belaa, bɛlbwa ne o chee.

¹⁶ Hé nyiŋi Korowii tɔn bini dɛ́ kure na. Kwaa nɔ bɛlbwa toole dɛ́ nyoɡre, bɛlbwa aa belaa do waa wola o cheerii dɔ. Korowiirii bola ŋɔ á ɛ ɡɛ, o Doma la ɛɛ ba a ne Edom harɛ taa.

¹⁷ Onee dɛ bɔne harɛ la tɛa, bɛlbwa dɔ o kon, dɛ́ do bela saŋ te bɛlbwa dɛɛ la.