Aesaya 33 - mzwDBL

Chae wesoŋa

¹ Hé bwɛɛlɛ, nɛra haa dɛ chɔɡ nɛra, nɛra aa wola he te chɔɡ. Hé le nɛra dɛɛ tɛ, nɛra aa wola he te leɛ dɛɛ tɛ. Hé ɡel nɛra chɔɡaa, nɛra ɛɛ chɔɡ heyaa, he ɡel nɛra lee dɛ tɛ aa, nɛra ɛɛ le heyaa tɛ.

² N Naa Korowii, na ya sum, he bee ya hwɛɡa bwa do. Nyiŋi ya nɛɛ he kpeɡri ne tɔpere bɛlbwa. Lɛ yaa dɛɛ le wenaale ta.

³ He kɔr harɛre nɛra laa ta naa, ba dɛ chwa, he iro che ɡe aa, nɛra dɛ peɡre.

⁴ Gɛ tontombɛ aa dɛ di koo kwaa bwa la, ɡɛɛ baa ba ba laala pae laa ta a tonɛ.

⁵ Korowii kan taeh, o soɡe nyundua tenten. Wɛɛ ɡeloo kasinteŋ ne waa aa toɡra su Jerusalam.

⁶ Wɛɛ ɛo kɛŋɔ dea mumpar waa kpeɡa dɛ tɛ heyaa he saŋ, dɛ́ lɛ heya dɛ́ tɛ heya wejema ne waa mun noe kohona saŋ bɛlbwa. O ɔma taa hɛɛ ba cheɡa, dɛ́ dɔ ɡɛ waa nɔ bwa.

⁷ Na, ba kpeɡnɛra dɛ dooɡe lɔŋɔre kohona fɔɡbaahna dɛɛ nyin lɛɛra. Nɛra baa tom ba ŋɔ bá ba larawe la ɡe dɛ wi kohona.

⁸ Ba ŋwɛnɛjena bwa chɔ pɛɛ, nɛra aa a ta kpɔ kpa. Ba chɔɡ fɔo la, dɛ to ntama. Nomɛlbwa toole baa duuru.

⁹ Harɛ la chɔɡɔ, o chɔɔ pɛɛ. Sihiih kpo Lɛbanɔn kɔne, a daa serewe. Sarɔn fɛlembɔdɛɛɡe berɛ pua hɛŋle ɡbo harɛ, Basan harɛ ne Kaamɛl Bwejen ta, daa papooni dɛ chure.

¹⁰ Korowii ŋɔ harɛre nɛra be ŋɔ, “Mɛɛ iruu name. Mɛɛ baɡle n kpeɡri aa ɡwaa komɛlbwaa.

¹¹ Hé kpoŋe n nɛra tea, kɛ aa ɛ pɛɛpɛɛ, he ɡbaɡba hweera ɛɛ berɛ niinii dɛ́ kpoo heya.

¹² Hɛɛ fuuh kɛŋɔ baa fuh kwaa dɛɛ ɛ tɛɡ, kɛɛ baa pa sɔɔhne do nii ta a fuh la.

¹³ He banɔ la haa lɔ bojaŋa, hé no waa maa ɛa! He banɔ haa bɛna ɡe, hé sɛh kɛŋɔ n dɔ kpeɡri.”

¹⁴ Wechɔɡ-ɛɛra baa lɔ Jerusalam dɛ ɔmɛ, nɛra baa wola Korowii tomɛ la bwara dɛ sa. Ba ŋɔ, “Ya bini umee dɛ won so nii aa dɛ hɔ aa wola dime, dɛɛ chɔɡ kwaa nɔ jwɛh ɔ?”

¹⁵ Nɛra ba wa aa toɡraa dɛɛ bol kasinteŋ, baa wola ba kpeɡri ta cheɡɛ hamɛ nɛra dɛɛ dɔ kwa. Nɛra ba sie aa wola lɛ kɛ ba yaɡ ba sen, dɛ laa ba te dɛɛ kpɔ nɛŋkpoa waa ta, dɛɛ lawɛ ba te kɛŋɔ baa wechɔɡaa ɛ la.

¹⁶ Banee dɛɛ ba deŋnesɔɔhna ne soɡa, kɛŋɔ baa soɡe dekpeɡ bini. Baa dɔ kondikwaa dɛɛ di, nee ɡe aa ban paŋɛ bwa.

¹⁷ Hɛɛ na kooro ne o wer ne kan waa doa, ne o harɛpaɡ waa chɔa dɛ kaa bojaŋ.

¹⁸ He liire aa webena haa dɛ ɔma kohona la taa do kpa. Hɛɛ ŋɔɔ, “Leperaa nɛn waa dɛ kure nɛra la dɔɔ? Naate waa dɛ lɛ toɔ la ɡe sɛ? Leperaa naate waa dɛ nyiŋi dejaŋa ta la ɡe dɔɔ?”

¹⁹ Haa jenu tena laanee na kpa bwa, nɛra ba wobol aa kora haa wola a mun no la.

²⁰ Hé nyiŋi Saayɔn, bwɛjen yaa dɛ di tɔpejena o ta la. Hɛɛ nao kɛŋɔ Jerusalam dɔ deŋnesɔɔhna ne soɡa, kɛŋɔ tɛnte dea waa cheɡɛ o buɡ ta, saŋ bɛlbwa, o daa baa kpaara do harɛ dɛ kpɔ baŋro la aa fome kpa bwa, ɡɛɛ o ɡboɡbie ɡe aa wola chaa.

²¹ Korowii ɛɛ do belaa dɛ́ ɛ ya Kpeɡnɛn. Wɛɛ ɡeloo yá so harɛdɛɛɡe nejena ne nenabɔɔne aa lɔ o ta. Ya dɔma aa ɡbeni a taa tawɛ, ba stiimaere aa a taa kpɔ.

²² Korowiirii dɛ́ bol ya wa, onee do Mmarare dɛɛ tɛ yaa, dɛ́ ɛ ya kooro. Onee dɛ́ lɛ yaa.

²³ Gboɡbie dɔma aa kpɔa baŋre ba ɡbeni yal la yɔɡɔ. A ta wone lawɛ dajaŋ yal la aa lɔ o ta la kɛrɛdɛ, Nɛra ɛɛ bɔne dɔma laaladamanta baa paa laa ta laanee, hale boobie kwaraa pa ane.

²⁴ Korowii ɛɛ kpɔ nɛra baa lɔ Jerusalam wechɔɡaa kɛ ba. Hale bɛlbwa aa berɛ ŋɔ, “N bwara dɛ wee mɛ.”