Aesaya 32 - mzwDBL

Kora o wa aa toɡra kohona

¹ Hé no! Kooro bɛl ɛɛ bao, dɛ́ ba di kora waa aa toɡra ne, o nomonome ɛɛ kpɔ kasinteŋii dɛɛ nyiŋi waa ta.

² Ba bɛlbwa ɛɛ doo kɛŋɔ bɔr dɛ peu dɛ ta aa, he chwa ka jo, dɛ́ berɛ do kɛ bɔr dɛ bwaala peu dɛ ba naa, he chwa ka sɔh. Ásɛ pua hɛŋle ɡbo harɛ ta ɡe neerare aa chɔ o ta, do kɛŋɔ bwetal waa dɔ chunchule, dɛ che bela daa a wola toole.

³ Banla baa dɛ na aa ba sie laa kpɔ kpa, baa cheɡ deŋne ɡee dɛɛ no.

⁴ Banla ba liire aa wola bobeŋkpoŋ cheɡɛ la ɛɛ no waa munii, ásɛ banɔ la baa dɛ mɛnɛme won waa bola kɛrɛdɛ a bini chɔ.

⁵ Gɛ saŋ nɛn waa ɛ ɡɛne la baa on jirima tee yerɛ, a ba ɛ kɛŋɔ nɛn waa dɛ neɡre nɛra la, bá yerɔ kasinteŋ te.

⁶ Dɛkalkɛŋɔ ɡɛne te dɛ bol ɡɛnewa, dɛɛ lii wechɔɡa dɛ́ ɛ. Waa waa dɛ ɛ ne anɔ la waa dɛ bol bwa ɛ Korowii bwara wechɔɡe. O dɛ vɔmɛ nɛn lɔr aa dɛ kpoo kondikwa, dɛɛ vɔmɛ nɛn nyɔɡre aa dɛ kpoo ne.

⁷ Nɛn waa dɛ neɡre nɛra ɛ nɛnchɔɡe, wechɔɡa liiree wɛɛ lii, dɛ che neɡra ta dɛɛ chɔɡ nyaara ba wa aa suma, dɛɛ tɔ ba kasinteŋ ŋwɛnɛ.

⁸ Nɛn waa dɔ jirima te, o dɛ maɡle waa aa dɔ jirima dɛ́ ɛ, ásɛ a che a ta wɛɛ do kɛrɛdɛ.

Jerusalam haahna wa

⁹ Haahna haa lɔ bosɔɔhna ta, hé no n be! Bitoli haa soɡa kɛrɛdɛ, hé cheɡ deŋne dɛ́ no n wa!

¹⁰ Benanyoa ne tɔpere tamaa bɛl habɔɔ la, he banɔ la haa soɡe bosɔɔhna ta la bwara ɛɛ sao, dɛkalkɛ daa nɔna toole hé chaa kpa.

¹¹ Haahna haa lɔ bosɔɔhna ta la bwara ɛɛ sao he ɔmɛ. Hé wur he laala ta, dɛ́ kpɔ lweyale mile chara.

¹² Hé kpɔ nɔɔra lɔ bambili á baɡle kɛ he tea bini chɔɡɔ, he harɛpare ondɛɛɡe la wa, ne daa nɔna aa chɔɡa la wa.

¹³ Sɔɔhne ne jabalnadaŋɛre ɡboo n nɛra harɛre. He wi deremi silɛɛ fa aa lɔ a ta la, ne bwɛjen o fa aa soma la wa.

¹⁴ Koodem ne bwɛjen nɛra fa aa su a ta la ɛɛ chɔ pɛɛ. Deremi ne dekpeɡa aa tɔ ba nɛɛ la bwa ɛɛ choɡluu, dɛ́ berɛ dimɡbia saŋ bɛlbwa, ásɛ kpɔɡ bini keeɡore ne peera, kpɔ bela ɛ a dibɔr.

¹⁵ Gɛɛ aa ba doe dɛ ka tel kɛŋɔ, Korowii Doma aa ba so ya nɛɛ mɔɔ pua hɛŋle ɡbo harɛ la berɛ harɛpare ondɛɛɡe, o ta kwaa do wer, ásɛ o berɛ do kɛŋɔ kɔr ken.

¹⁶ Kasinteŋ ne waa aa toɡraa dɛɛ ba harɛ la ta bwa doe.

¹⁷ Deŋnesɔɔhnaa dɛɛ ba waa aa toɡra la ta lee, dɛ́ ɡel bɔr sɔɔh, ásɛ ɔmee aa lee do kpa bwa.

¹⁸ Korowii nɛra ɛɛ so deŋnesɔɔhna taa, wobɛlbwa aa wola ba nɛɛ ba ba deremi, ásɛ ba so kɛrɛdɛ ken.

¹⁹ Hale dombwea lee kɔr la ta, bwɛjen la chɔɡ kwaraa naa,

²⁰ hɛɛ na somee, hɛɛ parɛ neerare nyoo, he kondɛɛra dɔ kpɔɡdɛɛɡa dɛɛ di.