Aesaya 31 - mzwDBL

Korowii ɛɛ kpɔ nɔnee tɔ Jerusalam tena nɛ

¹ Banɔ la baa la Ijipt harɛ ta dɛ́ kaa nyin kɛŋɔ ba cha ba la, bá bwɛɛlɛ! Ba kpɔ hwɛɡa do torɔɡore aa wara, baa vɔwa pɛl jaɡre dɛɛ che a bini, ne bokpeɡa tena baa so jaɡre ta nɛ, dɛ laa sie kpɔ Korowii Israel Nɛŋɡoroŋ la nɛ. Baa o bɔr nyin ó cha ba.

² Kɛ onee wejereme, onee dɛ́ won ba bɔr chɔɡa ne. Waa nentane tae dɛɛ ta harɛ, dɛ berɛ dɛɛ kpɛla. Wɛɛ iruu che wechɔɡ-ɛɛra, ne banɔ la baa dɛ cha wechɔɡa la nɛ.

³ Nɛraa Ijipt tena, Korowii laa ban, asɛ ba jaɡre ɡe ɛ ola, a ta kwaa aa bea yaa wola an na ɛɛ. Dɛ Korowii baa ir o nɔn dɛ́ tɛr nɛra deŋne aa, nomɛlbwa waa dɛ cha nɛra ɛɛ keeruu, ásɛ nɛra baa dɛ cha ba la ɡe choɡli, ásɛ ba nɛmbele banɛ la bwa pɛ dɛ́ chɔɡ.

⁴ Waa Korowii aa bol men Aesaya be laanee nɔ. “Gɛ nyujente onjen yon lawɛ ol dɛ́ kpoo dɛɛ ŋoo, ásɛ ba yerɛ peteɡra warɛ ŋɔ, bá doŋu, waa wola aahra baa dɛ aahro la ɔmɛ, waa wola ba ɡbɔɡa chaŋe la, ɡɛ tentenee men Koranar Bwa Kooro ɛɛ ba bala bá ɛ Saayɔn Bwejen ta, dɛ́ ba yo Jerusalam dɔma nomɛlbwa aa wola won kah mɛ.

⁵ Gɛ jumbii yon ɡah dɛɛ bar a bii nɛɛ a kɔne ta dɛɛ tɔa ɡbemɡbe la, ɡɛɛ men Koranar Bwa Kooro ɛɛ ba Jerusalam tena daahna. Mɛɛ daah baa, mɛɛ nyiŋi ba nɛɛ dɛ́ yo lɛɛ ba.”

⁶ Korowii berɔ ŋɔ, “Israel tena, he berɛ ba men he siwi aa sa mɛ, dɛ berɛ habɔɔ kpo mɛ la be.

⁷ Awola tɔpere la, he bɛlbwa ɛɛ vɛh voɡa haa kpɔ suuɡapoŋa ne suuɡaswɛm ɛa, dɛ che a ta ɛ wechɔɡa laanee.

⁸ Asiiria tena ɛɛ serewoo dɛ ba ne nɛra laa yoa, kere waa wola nɛn kon ɛɛ dɛɛ ba ba kpoora. Baa chwa laa taa, ásɛ ba lawɛ ba bini bonɔɔna yoma.

⁹ Ba koojen ɛɛ ɔmɔɔ dɛ́ chwa, ásɛ ba nomonome baa chɔ laa nyoa la kpɔ ɔmee dɛ́ chwa ɡel ba laa fraŋkaa.” Korowiirii bola. O nii waa kpɔa dɛ fuh saraha kwaa la lɔ Jerusalam Saayɔn Bwejen ta.