Aesaya 30 - mzwDBL

Nyopɛo fɔo waa wola tɔnɔ dɔe

¹ Korowii berɔ ŋɔ, “Deŋnekpeɡ tena baa dɛ di kora Juda harɛ ta la, ba bwɛɛlɛ! Ba dɛ teŋɛ ba ɡbaɡba liire aa wola n be leɛ ta, dɛɛ fɔwɛ nyopɛo fɔo n Doma aa wola ba nɛɛ jae, dɛ ɛ wechɔɡa dɛɛ ja wechɔɡa ta.

² Ba ta men bɔɔrɛ no dɛ chiɡ ŋwɛnɛ ta dɛ la Ijipt harɛ ta, dɛ ka marɛ Ijipt kooro ó tɔ ba nɛ, dɛ́ lee ba le ba dɔma nɔn ta.

³ Mara baa ŋɔa ba kaa marɛ kooro la ɛɛ ɛ pɛɛpɛɛ. Ijipt harɛ ta baa ŋɔa ba dɔ sɔɔhbɔr la, ba di ncho.

⁴ A lole kɛŋɔ Juda tena toroma lɔ Ijipt bwɛjena Soan ne Hanes,

⁵ kɛ sihiih ne nchoo Juda tena ɛɛ ba dii, kpɔe baa kpɔ ba te ka dawɛ nɛra baa wola won cha ba nɛ, baa wola ba tɔnɔɔ dɔ la.”

⁶ Waa Korowii aa bera kpɔ baɡle Aesaya chaahna ta, a ɛ kpɔɡ bini olchɔɡa waa Nɛɡɛv pua hɛŋle ɡbo harɛ taa nɔ. “Juda tena toroma la vɔrɔwe ba laala dawɛ keeɡore ta, dɛ vɔrɔwe ba kondɔɔh dawɛ nyoɡmare ta, dɛ kpɔ wekpeɡa ne siswɛm harɛ, nyujentena ne domkpule ne harɛkwaare aa dɛ jah aa lole, dɛɛ kaa harɛ la tɔnɔ bɛlbwa aa wola toole o ta la ta.

⁷ Chae bɛlbwa toole Ijipt harɛ ta, a ɛ wepuu. A waa mɛɛ yerɔ Harɛkpeɡ Waa Wola Kpeɡri Dɔe.”

⁸ Korowii ŋɔ men Aesaya be ŋɔ, “Namete kaa, dɛ́ ka chwerɛ n nɛra waa maa bol he be nɔ dawɛ bwepɛla ta tɛɛ ba, chwera do tɔn ta, ásɛ a chɔ le kerekere dɛ́ ɛ danseɛ saŋ te bɛlbwa dɛɛ la.

⁹ Ba ɛ nɛra baa dɛ lɛ ɡaeh ne nyosonteŋna. Ba ɛ nɛra baa vɛh Korowii waa noe.

¹⁰ Ba ŋɔ Korowii keamere baa dɛ na waa chaahna ta be ŋɔ, ‘He bɛ chaahna waa bol ya be kpa. He bɛ kasinteŋ waa aa chɛ kɛ ya ɛ dɛɛ bol kpa. Hɛ́ɛ bol waa aa dɛ lɛ sie, dɛ ɛ wesoma ya be.

¹¹ Hé ɡel ɡɛ haa dɛ ɛ la. He bɛ Israel Nɛŋɡoroŋ la waa bol ya be kpa.’ ”

¹² Anomanta, Israel Nɛŋɡoroŋ la ŋɔ, “Haa vɛh waa nɔ, dɛ kpɔ he ɡbaɡba ŋwɛnɛ dɛɛ di kpeɡri nɛra nɛɛ dɛɛ neɡ ba nomanta,

¹³ he wechɔɡa ɛɛ ɛ heyaa kɛŋɔ danjwɛɛ waa pera dɛɛ ba chola, asɛ dɛ piɡri chole buɡ ta la.

¹⁴ Wɛɛ paɡroo kɛŋɔ vimamaa vii yon paɡre, dɛ́ peɡri burbur la ken, o kaŋli aa wola kanee do kɛ ba kpɔ buh nii, kɛɛ ba kpɔ ɛ nee la.”

¹⁵ Waa Nemenɛ Korowii, Israel Nɛŋɡoroŋ aa bol nɛra la bee nɔ. “Hé berɛ ba n be, dɛ́ kpɔ he hwɛɡa dawɛ n nɛ, ásɛ n lɛ heya, dɛ́ kpɔ nɔn tɔ he nɛ. Kɛ he vɛoh, he ta balɛ.

¹⁶ He dɛ bol ŋɔ, ‘Akai, yaa so jaɡre taa dɛ chwa kaa.’ A wer ɡa. Hé so jaɡre ta chwa. He dɛ lii kɛŋɔ he jaɡre ɡbaŋre, kɛ nɛra baa ti heyaa la kwaa ɡbaŋre ɡwaa he kwa.

¹⁷ He nɛra kaɡboŋ ɛɛ na he dɔm beŋkpoŋii dɛ ɔmɔ dɛ́ chwa, he dɔma banue ɛɛ ɡeloo he bwa chwa, a ka he laa fraŋkaa ɡbo pa deŋɡare ta.”

¹⁸ Ane a bwa, Korowii tea dɛ domɔ he waa wɛɛ kpa kɛ he ba o be. O na he sum, dɛkalkɛ o waa dɔ kasinteŋ. Banɔ la bwa baa kpɔ ba te dawɛ o nɛɛ la, ba na som.

¹⁹ Saayɔn tena, nɛra haa soɡe Jerusalam, haa wi kpa. Korowii dɛ na he sum. He wio noo waa, buɡ la ta, wɛɛ no he bee.

²⁰ Korowii ɛɛ ɡeloo wekpeɡa ne hɔhɔrɔwa ba he nɛ, kɛ waa o webaɡlaa kpɔ sɔh heya. Wɛɛ kpɔ o tenee baɡle heyaa hé nao.

²¹ He kono kpɔ diɡ oo, ɡal oo, hɛɛ no taa bɛl he habɔɔ, o ŋɔ, “Ŋwɛnɛ laanee la, hé kpɔ o ta.”

²² Haa he voɡa haa kpɔ suuɡapoŋ ne suuɡaswɛm ɛ a bwara, laanee kpɔ ɛ wobɛlbwa kpa, dɛ́ kpɔa ka ta kɛŋɔ yakwara aa wola were ken, dɛ́ ŋɔ a be ŋɔ, “Hé le ya sie.”

²³ Korowii ɛɛ nɛ bwaalaa do kwaa haa dua ta, ásɛ a do wer dɛ́ ɛ kɛrɛdɛ. He kondɛɛra ɛɛ dɔ bɔr waa kanaa dɛɛ di.

²⁴ Nae ne keeɡore haa kpɔa dɛɛ parɛ he kooni la, ɛɛ di mea baa pala kɛrɛdɛ pɛɡaa.

²⁵ Awola Korowii aa ba kpoo he dɔma kohona dɛ́ kuuɡi ba dejaŋa ta la, nee ɛɛ palɔɔ le bwejaŋa ne deŋɡarere aa kaa nyundua bwa ta.

²⁶ Korobie ɛɛ lɔɔ dɛ chaah bɔr kɛŋɔ wee ken, ásɛ wee chaah bɔr kohona kɛŋɔ baa lɔ tɔpera anuanɛ wee bɔr chaahna pɛ ken. A ɡɛ saŋ Korowii ɛɛ vɔrɔwe bola waa do o nɛra laanee, dɛ́ chaah ba.

²⁷ Hé no! Korowii sɔn ɔma, o le bojaŋ dɛɛ ba. O baah diu kɛŋɔ nii aa dɛ hɔ ken, chuu ɛɛ le kohona. Bandia ɡboo o wobol bwa, aa fuh o dɔmaa kɛŋɔ nii aa dɛ fuh kwaa ken.

²⁸ O hweera do kɛŋɔ nee waa dɛ palɛ dɛ su tel baŋa ta la. O dɛ ɡboo harɛre nɛra kɛŋɔ baa dɛ ɡboo kwaa la ken, dɛ́ chɔɡ ba. Gɛ baa kpɔ kabaɡrare do jaaɡɔ nyoa dɛɛ beɡro la, ɡɛɛ wɛɛ ba harɛre nɛra beɡra le waa baa maɡla bil la ta.

²⁹ Korowii nɛra sie ɛɛ lɛo baa ɡo yela kɛŋɔ, baa dɛ di tɔpejena dɛɛ ɡo yela jwaana la. He baah ɛɛ sɔɔh heyaa kɛŋɔ nɛra aa hoh kalipere dɛɛ kaa Korowii Dea. Korowiirii do kɛ Israel tena Bwetal waa dɛ lɛɛ ba.

³⁰ Korowii ɛɛ ɡeloo nɛra no o taa, dɛ́ jemɛ ɡɛ waa do kan, dɛ́ ɡel ba na o bandia waa dɛ́ ba o ne, dɛ́ ba tɛr ba deŋne. Bandichɔɡe ne nii aa dɛ chɔɡ kwa, ne bwaalachɔɡe ne peu, ne bwaala kɔɡra dɛ dombwea nee wɛɛ ba bala.

³¹ Korowii taa la ɛɛ ɡeloo Asiiria tena bwara hɛlɛ, wɛɛ kpɔ o koodaŋɡbalaa lɔ ba bil.

³² Korowii aa ir o daŋɡbala dɛ́ kpɔ dɛɛ tɛr ba deŋne la, lɔe bɛlbwa waa lɔ ba la, dɛ Israel tena ɡe dɛ yiiɡi kwaa kɛŋɔ loŋa ken, dɛɛ lɔ janjela dɛɛ ɡo yela. Korowii ɡbaɡbaa dɛɛ ba ba yoi.

³³ Korowii kwaa bobɛl cheɡ tɛ Asiiria koojen saŋ bɛl biɡri, dɛ́ fuuh. O ɛ nimar bɔr o do luŋri dɛ do paɡri, ba pa damara bil a daŋɛ chɔ. Korowii hweera ɛɛ ɛo kɛŋɔ nii ne jebɔrɔwe ken, dɛ́ ba jo daa la ta a fuh.