Aesaya 3 - mzwDBL

Juda ne Jerusalam waa bola dɛ́ pa bole

¹ Hé no, Koranar Bwa Kooro dɛ ba nɛra ne kwaa Jerusalam ne Juda tena aa kpɔ ba te dawɛ a nɛɛ la laa dɛ kpɔ. Wɛɛ tɔ ba kondikwaa ne nee ŋwɛnɛɛ,

² dɛ́ chɔɡ ba banyoola ne laa tena, ne nɛra baa bol ba waa dɛɛ pa bole ne ba keamere ne ba voɡra, dɛ nomonome,

³ ne nomonome baa chɔ laa tena nyoa ne bwɛɛ nomonome, ne nɛra baa dɛ ja ba, ne nɛra baa dɛ ɛ dobodobo we-ɛɛla bwa soo siwi.

⁴ Bonɔmbiee mɛɛ ba ɡela bá chɔ ba nyoa, nɛra baa wola kpeɡee dɛɛ ba ba harɛre la ta nyiŋa.

⁵ Nɛra ɛɛ dɛɛ fiiɡi dɔŋaa, nɛn pu o dɔŋ dɛɛ yo, chamenate ne o chamenate ɛɛ yo. Bechale aa ba nomonomee duu, nɛnsale ɡe aa nɛra baa dɔ nyanyinii kpɔ ɛ wobɛlbwa.

⁶ Nɛn ɛɛ lawɛ o lole bɛlee dɛ́ ŋɔ o be ŋɔ, “Henee dɔ bwara laala. Ba di ya nomonome, saŋ waa chɔɡa dɛ do kpeɡri nɔ ta!”

⁷ Wɛɛ iruu che ɡɛ saŋ dɛ́ ŋɔ, “Akai! Maa won ɛ he nomoa dɛ́ cha heya. N ta kondikwaa ne bwara laala bɛlbwa dɔe n dem. He bɛ men kpɔ ɛ he nomoa.”

⁸ Jerusalam paɡrɔ, Juda harɛ ɡe chɔɡ. Nɛra baa lɔ bela nyoa wobol ne ba we-ɛɛla dɛ jo Korowii nɛ. Ba pili nyoa dɛɛ chɛɡɛ Korowii waa ɛ jirima te la.

⁹ Ba siebɔra ɡba dɛ baɡle ba nɛnsoo. Ba dɛ ɛ wechɔɡa kpelelee kɛŋɔ Sodom tena, baa an sɔh. Bá bwɛɛlɛ! Ba ɡbaɡbaa nyin ba wahala dɛ dɔ.

¹⁰ Gel nɛra ba wa aa toɡra no kɛŋɔ aa do werii tɛɛ ba. Baa di ba we-ɛɛla tɔnɔɔ.

¹¹ Wechɔɡ-ɛɛra bwɛɛlɛ! Aa do kpeɡrii tɛɛ ba taeh. Waa ba ɡbaɡba aa ɛa la kembɔree baa ba dɔe.

¹² Toli ne bonɔɔna dɛ fiiɡi n nɛra. Haahnaa dɛɛ nyiŋi ba nɛ dɛɛ do ba. N nɛra, he sitɔɔla ɡelɔ he nyoɡre. Ba ɡelɔ he nyoɡre ŋwɛnɛ.

¹³ Korowii soɡo dɛ́ bol nɛra wa. O kpɔ o te dɛɛ ba o nɛra waa bola dɛ́ pa bole.

¹⁴ Korowii dɛ ba o nɛra nomonome ne ba sitɔɔla waa bola dɛ́ pa bole. O ŋɔ, “Heyaa he n daa koo. Heyaa pa nyaara kwaa le ba be kɛŋɔ laa ta kwa, dɛ kpɔ su he be deene.

¹⁵ Ɛrɛɛ hɛɛ ɛ ɡɛ nɔɔ? Haa kɛrɛdɛ ɛ ɡɛ haa dɛ fɔɡɛ n nɛra, dɛ pa nyaara kwa, dɛ lawɛ ba sie dɛɛ teɡɛ harɛ nɔ. Men Korowii, Koranar Bwa Kooroo ŋɔa.”

¹⁶ Korowii ŋɔ, “Saayɔn haahna dɛ ɡɔɔ ba te, dɛ valɛ dɛ laa ba baŋa pa, dɛ kpɔ sie dɛɛ nyin baala. Ba dɛ valɛ tolvala naɡale bori ne, asɛ naloɡa baa kpɔa do ba nakpale la ɛɛ do ɡbɔɡa.”

¹⁷ Anomanta, Korowii ɛɛ ɡeloo Saayɔn haahna nyubaahna chuɡri ŋwɛra, ásɛ ba nyuune ɡba.

¹⁸ Gɛ tɔpere la telaa, Korowii ɛɛ laa ba tolkwaa laanee kpɔ. Wɛɛ laa ba naloɡa ne kwaa baa kpɔa dɛɛ saɡre ba nyumpona ta, dɛ ba baŋa kwaa aa do kɛŋɔ korobie dɛ le loɡla la,

¹⁹ ne deŋna kwa, ne nɔnloɡa, ne kwaa baa kpɔa dɛɛ bɔle nyuune ta laanee kpɔ.

²⁰ Wɛɛ laa ba botidɛɛɡa ne ba naloɡa ne ba kirisore ne konsɔɔhsoma loŋa dɛ sɛbɛre aa lɔ ba chararee kpɔ,

²¹ ne noniseɡa, ne noniseɡa baa kpɔa dɛɛ do ba mee ta,

²² ne ba laaladɛɛɡa, anɔ la baa doa a baa chiɡ harɛ, ne anɔ la baa doa dɛɛ dawɛ ba laala baa dɛ doa ta, dɛ ba purjeɡre,

²³ ne diɡe, ne ba laalapoŋa andɛɛɡa, ne kwaa baa kpɔa dɛɛ tɔ ba nyuune, dɛ anɔ la baa kpɔa dɛɛ tɔ ba sie, a bwaa wɛɛ ba laa kpɔ.

²⁴ Konsɔɔhsoma a fe aa ɡel ba bwaraa sɔɔh do som la, sɔɔhraa ba bwara ɛɛ ba sɔɔhra, ásɛ ɡboɡbie ber ba kirisore, ásɛ ba nyumpona ba yon ɛa a do wer la bwa chure, ba nyuune ɡba, ba laaladɛɛɡa bwa berɛ yakwane, ásɛ ba wer tu, ba berɛ di sihiih.

²⁵ Kere nee baa ba he bini baala kpoora a wola tɔpere, he kpeɡnɛra baa won yoi bwa ɡe ka laa ta.

²⁶ Bwɛjen Saayɔn doonyoo ɛɛ chɔ pɛɛ, ásɛ bwɛjen la do kɛŋɔ haah tea bini aa chɔɡa, o so harɛ dɛɛ wi la.