Aesaya 29 - mzwDBL

Kooro Devid Bwɛjen wenaale wa

¹ Jerusalam tena hé bwɛɛlɛ! He bwɛjen Kooro Devid aa soɡe o ta la ɛɛ chɔɡoo. Bena bɛlbwaa he teŋɛ dɛɛ di he tɔpejena,

² kɛ Korowii ŋɔ wɛɛ ɡeloo he Jerusalam tena bwara nyɛɡ heya, ásɛ hɛɛ wi dɛɛ dooɡe lɔŋɔre. He bwɛjen la bwa ɛɛ ɛ chalee, kɛŋɔ kon baa kpoo kwaa dɛɛ ɛ saraha o ta.

³ Wɛɛ ɡeloo he dɔma bar heyaa cheme dɛ́ tɔ heyaa do. Baa ma konjaŋaa pɛl danjwɛɛ waa bar bwɛɛ la, dɛ́ che a ta jo.

⁴ Wɛɛ lɔ heyaa bil harɛ, he chɔ dɛɛ bol wa, he taa ɛɛ le tama tama ken. He wobol ɛɛ doo kɛŋɔ lale wobol dɛɛ le harɛ bini, aa baŋee le kohona.

⁵ Kɛ he dɔma baa wara ɛɛ berɔɔ ɛ kɛŋɔ bomboɡ mohooh ken, ásɛ peu kpɔ kaa, nɛnlaa ba nyu bini aa kpeɡa he nɛɛ ɛ kɛŋɔ mea pɛɡa peu yon kpɔa ir kaa la. Aa ɛo warane wɔrɔbe nɛ,

⁶ Koranar Bwa Kooro ɛɛ ba lɛ heyaa bwaala kɔɡra nee, harɛ jiɡri, ɡbɔɡa tɔ kohona, peukpeɡ ta, bwaalachɔɡe nɛ, nii chɔɡ kwa.

⁷ Harɛre nɛra baa wara, dɛ pu Jerusalam dɛɛ yo, dɛ ka kuuɡi o dekpeɡa, dɛ baro dɛ tɔ o nɛra do la, ba bwa waa ɛɛ kaaloo kɛŋɔ, haa na waane dɛ deera jwaana ken.

⁸ Aa ɛo kɛŋɔ lɔr aa dɛ kpoe, asɛ he chɔ dee dɛɛ di kwa, kɛ haa ba jar ir la, dɛ lɔr ta dɛ kpoe la ken. Kɛɛ nyɔɡre aa dɛ kpoe he dee, dɛ na kɛ he dɛ nyɔ ne, dɛ jar ir dɛ nyɔɡre la ta dɛ kpoe la ken. Gɛɛ aa ba doe dɛ tɛ harɛre nɛra baa wara dɛ yo Saayɔn Bwejen la.

⁹ Jerusalam tena nyoa ta kpoe yaa? He bwara ta yɔraa? He mwaalo ne, a ɡel he nyoŋe, he ta sen nyɔe kɛ dɛ ɡe dɛɛ, he dɛ yɛɛɡe, kɛ he ta seŋkpeɡa nyɔe.

¹⁰ Korowii kpɔ dom ta he nɛ, hɛɛ ba dom chɔe ka ɡarɛ, dɛ tɔɔɡe keamere la sibie, dɛ wili nɛra baa dɛ na waa bini la.

¹¹ Waa aa dɛ ba chiɡa kerekere ba naa kɛŋɔ chaahna ta nɔ, he bee a do kɛŋɔ waa chwera do tɔn ta, dɛ marɛ o nyoa. Asɛ dɛ he kpɔɔ tɛ nɛn waa jemɛ kura dɛ ŋɔ, “N poori, kure ń no aa,” o ŋɔ, “Maa won kure, ba marɛ o nyoa.”

¹² Kɛɛ dɛ he kpɔ tɔn la la nɛn waa wola jemɛ kure be ŋɔ, “N poori, kure tɛ mɛ” naa, o ŋɔ, “Maa jemɛ kure.”

¹³ Korowii ŋɔ, “Nɛra nɔ te, nyoa ɡbo nee baa baɡle kɛŋɔ n ne ba pɛo, nyoa ɡbo nee baa duu mɛ, kɛ ba tea bini te ta toe. Toma baa dɛ tom mɛ la, nɛwɛnyini mmarare taa baa baɡle ŋɔ nɛ́ra teŋɛ.

¹⁴ Anomanta, mɛɛ ba nyokpowaa nee ba ta ba nɛɛ ja, ba bwara yɔr. Aa ɡeloo wejerema ɡɛn, ásɛ nɛra baa jemɛ waa bini waa ɛ pɛɛpɛɛ.”

¹⁵ Nɛra baa swɛɛ siwi kpɔ ba waa dɛɛ sɔh Korowii la, ba bwɛɛlɛ! Ba dɛ ɛ ba waa biro ta dɛɛ lii ŋɔ, “Umee na mɛ nɔ? Umee dɛɛ ba jema ɔ?”

¹⁶ He berɛ waa sie pi, kɛŋɔ mamaa aa berɛ choh. Kon baa mao la ɛɛ wonoo ŋɔ nɛn waa mao la be ŋɔ, “He laa ma mɛ,” kɛɛ vii ɛɛ wonoo ŋɔ mamaa be ŋɔ, “Haa wobɛlbwa jemɛ” aa?

¹⁷ A ka tamaa Lɛbanɔn kɔr berɛ harɛpare ondɛɛɡe, ásɛ o ta kwaa do kɛŋɔ kɔr bini kwaa ken.

¹⁸ Gɛ saŋ la, amumure ɛɛ noo kɛŋɔ baa dɛ kure tɔn, ásɛ nyoŋa baa soɡe biro ta la won dɛɛ na.

¹⁹ Nɛŋɡwɛɡra sie ɛɛ berɔɔ lɛ Korowii waa ta ja, nyaara hɛɡre Israel Nɛŋɡoroŋ la wa.

²⁰ Nyubinikpeɡ tena aa lee do kpa, bammuɡli tena aa lee do kpa, nɛra ba sie aa swɛɛ wechɔɡa ta bwa, Korowii ɛɛ chɔɡ baa.

²¹ Wɛɛ chɔɡ banɔ la nɛra aa che ba wobol ta dɛ́ ɛ wechɔɡa, ne banɔ la baa ɡela nɛra baa bol waa dɛɛ pa bole wili, ne banɔ la baa cheɡɛ nyosone ŋwɛnɛ ta, dɛɛ pa nɛra baa di bolsom bolchɔɡe.

²² Anomanta, Korowii waa lɛ Abraham bol waa nɔ dɛɛ baɡle Israel tena ŋɔ, “Sihiih aa heyaa kpo kpa bwa, haa he dɔma ɔma waa koh ɡwaŋɛ kpa.

²³ Ba baa na ba bii ba bini, ɡɛ maa ɡela ba warɛ la aa, baa duu mɛɛ, dɛ́ sɛh kɛŋɔ menee Israel Nɛŋɡoroŋ la, dɛ́ ɔmɛ men Korowii baa dɛ tom mɛ la kohona.

²⁴ Nɛra baa ɡɛna ɛɛ hweli waa dɛ́ no a mun, banɔ la baa dɛ naɡre waa la ɡe sɛh baa baɡ ba wa.”