Aesaya 28 - mzwDBL

Efrem Dea tena wenaale wa

¹ Israel harɛ bwɛɛlɛ! O jirima dɛ dime kɛŋɔ kwaa fee aa lɔ sitɔɔla baa ɛ sennyɔɔra kooɡbɛrɛre ta dɛɛ lee la. Ba nyuune baa ɡɔɔra dɛɛ valɛ sɔɔh konsɔɔhsoma, kɛ ba dɛɛrɔ chɔ.

² Hé na, Korowii dɔ nomɛl waa dɔ jirima o bwara ɡe do kpeɡri. O bala bini do kɛŋɔ dombwea aa dɛ lee la, kɛɛ dompeu chɔɡe waa taa dɛɛ chɔɡ kwaa la. Wɛɛ taɡɛ bwɛɛ laanee ɡo harɛ, kɛŋɔ bwaala yon nɛ kohona, dɛ́ chɔɡ kwaa dɛ́ pala kaa la.

³ Israel sitɔɔla, baa ɛ sennyɔɔra kooɡbɛrɛre baa kpɔa dɛɛ maŋkura ba te la, baa tiɡraa do harɛ.

⁴ Ba sitɔɔla la jirima dɛ ba dima, kɛŋɔ fiɡ daa nɔnloɡle bɛl aa tɔ sie swɛɛ, asɛ nɛn kpɔ di warane la.

⁵ Awola tɔpere la, Nemenɛ Korowiirii dɛ́ ɛ kooɡbɛrɛ waa wera dɛ dɔ jirima kohona tɛ o nɛra baa kaa la.

⁶ Dɛ́ berɛ tɛ nɛra baa bol waa dɛɛ pa bole la liire, baa bola kasinteŋ ne, a berɛ che o nɛɛ nɛra baa lɔ bwɛjen la doonyoo, dɛ lɛɛ ba dɛɛ ta laa ta la dɔ bokpeɡa.

⁷ Hale Korowii keamere ne sɔfore la dɛ nyɔ sen dɛɛ yɛɛɡe. Ba nyɔ seŋkpeɡa dɛɛ kɛŋle dɛ wili. Keamere la seŋkpeɡa nyɔe kohona ɡelɔ waa Korowii aa ɡela baa naa chaahna ta la, baa a bini nae dɛɛ baɡle. Sɔfore la ɡe wili waa bola dɛ́ pa bole aŋwɛnɛ ta.

⁸ Chwɛɛra ɡboo ba teeburre bwa, a bobɛlbwa sese ta kae dɛ do wer.

⁹ Gɛ nɛra nɔ ɛɛ bol men Aesaya waa ŋɔ, “Umee o bol Korowii waa dɛɛ baɡle ɔ? Umee o pili waa mun dɛɛ tɛ nɔɔ? Bechale baa ta elee a do wer tɛ.

¹⁰ O webaɡla ta mun dɔe. O bol waa la sie, dɛ o bolɔ ba habɔɔ.”

¹¹ A wer ɡa, haa a mun no tenaa, Korowii ɛɛ ɡeloo he no o waa wobofala ta. Nɛŋhɔɔhraa wɛɛ ba ɡela ba bol baɡle heya.

¹² Korowii ŋɔ ba be ŋɔ, “Ona bɔree la, nomɛlbwa waa koah la, ó ba onɛ,” dɛ berɛ ŋɔ, “Deŋnesɔɔhna bɔree” kɛ baa no.

¹³ Baa wobɛlbwa Korowii aa dɛ bol ba be mun no. Ba bol waa la sie, dɛ ba bolɔ ba habɔɔ tɔpere bɛlbwa, asɛ ba le habɔɔ dɛ ka choɡli, dɛ foɡri, dɛ jo bel ta ba laɡ ba.

¹⁴ Anomanta, he sitɔɔla haa dɛ nyiŋi Jerusalam tena nɛɛ he siwi aa wola nɛn tɔɡɛ, hé no waa Korowii aa dɛ bol.

¹⁵ He dɛ ta nyoa ŋɔ, “Ya ne seo fɔwɛ fɔo, ya ne lalabwɛɛ nyoa pɛ. Dɛ harɛchɔɡ peu dɛ ba naa, waa yaa dɔ, dɛkalkɛŋɔ ya kpɔ ya te do nyosone ne neɡra ta, kɛŋɔ aa tɔ ya nɛ dɛ́ lɛ yaa.”

¹⁶ Waa Nemenɛ Korowii aa dɛ bolee nɔ. “Na, n pɛne Bwedɛɛɡe o wa aa hiah, dɛ kpɔ pa n Dea mun Saayɔn, o lawɔ kpoŋe kiŋkiŋ.

¹⁷ Kasinteŋii mɛɛ ba kpɔe berɛ ŋwɛn ba kpɔ dɛɛ maɡɛ kon, dɛ́ kpɔ waa aa toɡra berɛ kon demamaala aa kpɔa dɛɛ toɡre dea. Dompeu ne nee dɛɛ ba a palɛ nyosone haa kpɔa tɔ he te la kaa.

¹⁸ Fɔo he ne seo aa fɔwa la ɛɛ chɔɡoo, nyopɛo he ne lalabwɛ aa dɔa la ɡe aa lee do kpa. Dɛ harɛchɔɡ peu baa ta aa, wɛɛ dɔ heyaa, dɛ́ lɔ heyaa bil harɛ.

¹⁹ Chɔɔ ne jwaana bwaa wɛɛ ba tae, saŋ te bɛlbwa waa ta la, wɛɛ kaa he nee.” Dɛ he no waa nɔ mun aa, ɔmee ɛɛ lawɛ heyaa kohonaa taeh.

²⁰ Aa ɛo kɛŋɔ sɛɡla baa ŋɔa, mpa waa wola jaŋɛ nɛn chɔ o ta dɛ́ tɛɡre o te, bombo waa wola kanɛ dɛ́ telu ken.

²¹ Korowii ɛɛ iruu, dɛ́ ɛ ɡɛ o fa aa ɛa Pɛrasem Bwejen ta la, dɛ ɛ ɡɛ tenten Gebeɔn Fɛlembɔjen ta, ásɛ dɛ ɛ o toma aa ɛ wefala yaa wola a dɔŋa nae bwa, dɛ́ ɛ nyokpowa.

²² He bɛ jae maa dɛ ja heyaa nɔ mamɛ, ásɛ he wahala haa dɛ́ ba nae la bɛ he nɛɛ ba ɡwaa kohona. Korowii, Koranar Bwa Kooro bol n be, maɡla waa maɡla bil kɛŋɔ wɛɛ chɔɡ harɛ bwaa la.

²³ Hé cheɡ deŋne dɛ́ no n be! Hé no waa maa dɛ bol nɔ kɛrɛdɛ.

²⁴ Saŋ bɛlbwa laa paa teŋɛ dɛɛ parɛ, kɛɛ dɛɛ buɡli koo.

²⁵ Waa kwaa harɛ la tonɛ la, wɛɛ merɛ anɔ la waa merɛɛ, dɛ́ du anɔ la ɡe waa du a bwa ne a bɔra.

²⁶ O jemɛ o toma. Korowiirii baɡlo anɔ la aa wera.

²⁷ Waa kontɔɡ kpɔe dɛɛ lɔ konjeɡre kɛŋɔ jule. Daa waa maɡraa o kpɔ dɛɛ lɔa, ásɛ a bɛ peɡri.

²⁸ Namaa wɛɛ namɛ mea, dɛ́ kpɔ ɛ paanoo. Lɔe laa wɛɛ lɔa. Saŋ bɛlbwa laa o teŋɛ dɛɛ lɔ mea. Lɔe wɛɛ lɔa, ásɛ a bie le. Nama laa wɛɛ nama.

²⁹ Gɛ liire nɔ bwa, Koranar Bwa Kooro bee a le. Baɡla waa baɡle nɛra waa dɔ nyokpoa, o wejema ta jaɡa dɔe.