Aesaya 22 - mzwDBL

Korowii bol bwɛjen Jerusalam chɔɡa wa

¹ Waa aa chiɡ Chaahna Fɛlembɔjen ta, Korowii bol baɡle Aesaya chaahna ta laanee nɔ. Bɔkwaa waa bala ɔ? Ɛrɛɛ bwɛjen nɔ nɛra bwa ɛɛ lɛ ba sie saldor nɔɔ?

² Akwe! Lɔŋɔre ɡbo bwɛ, bwɛjen ɡbɔɡa ne silɛɛ aa sui. Kere laa ba kpɔ kpoo heya, laa ta ɡe laa he ka.

³ He bwɛjen la nomonome bwa pɛo chwa, kɛ ba laɡ ba, dɛ ba ta ban hɛma tae. Hale ba dɔma aa lɔ bojaŋ ba chwa kaa kwaraa la, ba lawɛ ba bwa.

⁴ A waa n ŋɔ, “Hé ɡel mɛ n wi n nɛra. He bɛ n bwara larawe n nɛra baa serewa nɔ wa.”

⁵ Awola tɔpere la, Korowii, Koranar Bwa Kooro ɛɛ ɡeloo o ɛ ɡbɔɡa ne ɡaeh ne ɔmee tɔpere Chaahna Fɛlembɔjen la ta. Ba kuuɡi danjwɛɛ waa bar bwɛjen la ta awola, ba wii kaa le bwejena dor.

⁶ Elam laa tena kpoŋe hɛma ne a tori dɛ che kwaa aa do kɛ torɔɡore bini, bane ɡe so jaɡre ta. Kir laa tena ɡe kpɔ kwaa baa kpɔa dɛɛ tɔ ba te ɡbemɡbe laa ta le.

⁷ Gɛɛ a do kwaa aa do kɛ torɔɡore, su he fɛlembɔjena harɛdɛɛɡa la bwa, asɛ nɛra baa soɡe jaɡre ta ɡe che Jerusalam doonyoone.

⁸ Kwaa aa tɔ Juda tena nɛɛ la, ba laa kpɔ. A ɡɛ saŋ la, he kpɔ sie dawɛ dɔmkwaa aa lɔ Kɔr Bini Koodem la ta.

⁹ He nao kɛŋɔ danjwɛɛ waa bar Kooro Devid Bwɛjen la pera aa choɡla, asɛ he ɡel nee do harɛbɔr tam la ta warɛ.

¹⁰ He kure Jerusalam deene, asɛ dɛ kuuɡi ane dɛ kpɔ a bwea ma danjwɛɛ la o do kpeɡri.

¹¹ He ma konjen asɛ nee le tambene la ta dɛ ba jo o bini, bwɛɛ la ne danjwɛɛ waa baro la baah ta. He ɛ anɔ nɔ bwa, kɛ he ta sie kpɔe dawɛ Korowii waa waa maɡla bil wubwa, dɛ ɛa la ta.

¹² Korowii, Koranar Bwa Kooro ŋɔ, hé dooɡe lɔŋɔre dɛ́ wi, dɛ́ fonɛ he nyuune dɛ́ kpɔ lweyale tɔ awola tɔpere, á baɡle kɛŋɔ he ɛ wechɔɡa.

¹³ Kɛ he kpoo nae ne peera dɛɛ di kwa, dɛ nyɔ sene dɛɛ hɛlɛ dɛɛ lɛ he sie. Hé ŋɔ, “Hé ɡel ya di kwaa dɛ nyɔ sen. Kere ɡbo dɛ ya serewɔ.”

¹⁴ Koranar Bwa Kooro ɡbaɡba bol n be ŋɔ, “Maa ɡɛ wechɔɡa nɔɔ kpɔ kɛ ba bwa ka tel ba seo tɔpere. Men Korowii, Koranar Bwa Kooroo bola.”

¹⁵ Korowii, Koranar Bwa Kooro tomɛ men Aesaya ŋɔ, “La Sɛbna waa chɔ koodem bela tomare nyoa be ka ŋɔ,

¹⁶ ‘Henee umeo? Umee tɛɛ ŋwɛnɛ ŋɔ hé pɛɡre bwe, dɛ́ kpɔ bela ɛ he lalbɔɔ, asɛ hɛɛ ɛo bodɛɛɡe dɛ́ kpɔ bela ɛ he chɔɔbɔr nɔɔ?

¹⁷ Na, he ne he nɛnjen ɛɛ bwa, men Korowii dɛ́ ba he ɡɔɔra viɡri bonɔ.

¹⁸ Wɛɛ keerii kɛŋɔ bɔɔl ken, dɛ́ kpɔe ta harɛ waa paɡa ta. Belaa hɛɛ ba sewa, belaa he laa torɔɡore haa dɛ che a bini, dɛ kpɔ dɛɛ nyin sɔn la ɛɛ ba kae. Sihiih ɛɛ kpo he nomoa he waa.

¹⁹ Men Korowii ɛɛ le he ne nomombɔr bela he fa aa lole wubwa laanee, dɛ́ ba he ne harɛ.’

²⁰ Mɛɛ yerɛ Hilkia bie Eliakim waa ɛ n bonɔɔnee.

²¹ Mɛɛ doo he nomombatakaarejaŋ laanee, dɛ́ vɔwɔ he kiriso la dɛ́ kpɔ he nomonome la do o nɔn ta. Wɛɛ ɛ nɛra baa lɔ Jerusalam ne Juda dea tena bwa mɛɛ.

²² O nɔn taa mɛɛ ba Kooro Devid dem safoa kpɔe do ó di kpeɡri, dɛ o pili komɛl aa, nomɛlbwa aa won tɔɔ, dɛ o tɔ komɛl ɡe aa, nomɛlbwa aa won pilu.

²³ Mɛɛ ɡeloo o che kiŋkiŋ, kɛŋɔ baa kpaa tɛnte baŋra daa do harɛ o che kiŋkiŋ la, ásɛ o nomonome dii dɔ jirima o dem.

²⁴ O dem nɛra wobɛlbwa ɛɛ dawɛ o nɛɛ, o naanar ne ba ɡe bii bwa saɡre o nɛɛ kɛŋɔ numoli ne loŋa aa saɡre daa ta la.

²⁵ Awola tɔpere la, tɛnte baŋra daa maa kpaara do harɛ o pa kiŋkiŋ la ɛɛ pamɔɔ le dɛ́ chole, ásɛ laala aa saɡɛ o ta la bwa chɔɡ. Men Korowiirii bola.”