Aesaya 21 - mzwDBL

Korowii bol Babelɔn harɛ chɔɡa wa

¹ Waa aa chiɡ Babelɔn harɛ ta Korowii bol baɡle Aesaya chaahna ta laanee nɔ. Gɛ kawulewule aa taa dɛɛ kpɔ pua hɛŋle ɡbo harɛ ta la, ɡɛɛ wekpeɡa ɛɛ ba a le harɛ waa do ɔma ta ba.

² N na waane kɛŋɔ chaahna ken a ɛ lokua kohona. Bane le dɔŋa dɛɛ tɛ, bane ɡee chɔɡ kwaa kohona. Elam tena, hé ka lɔ tɔ ba nɛɛ dɛ́ yoo ba! Midia tena, hé bar ba bwɛjena cheme, dɛ́ tɔ ba do! Korowii ɛɛ ɡeloo wahala Babelɔn aa ba a ne la teŋe.

³ A ɡɛ waa maa naa la ɡelɔ n bwadabii wee mɛ chweeh ken, kɛŋɔ loltea aa lɔ haah ken. Waa maa noa la ɡelɔ maa won ɛ wobɛlbwa, n ɛo chinchaŋ waa maa naa la wa.

⁴ A ɡelɔ n bambile lɔ paupau ken, ɔmee kohona ɡelɔ n bwadabii bwa serewe. Kpae maa dɛ kpa kɛŋɔ jɔmɔra ɛɛ ba silɛɛ nee la berɛ ɔmee kohona tɛ mɛ.

⁵ Chaahna la bini la, n nao kɛŋɔ baa kpɔ kondikwaa cheɡ tiɡ ta, dɛ pa yale pa harɛ dɛ so a ta, dɛɛ di kwaa dɛɛ nyɔ sen! Buɡ la ta, taa den le ŋɔ, “Laa sitɔɔla, hé ir! Hé ka kpɔ dɔmkwaa haa kpɔa dɛɛ tɔ he te ɡbemɡbe laa ta la!”

⁶ Korowii berɔ ŋɔ n be ŋɔ, “Kpɔ nɛn ó kaa daah, ásɛ wobɛlbwa waa na la ó ba bol.

⁷ Dɛ o baa na kwaa aa do kɛŋɔ torɔɡore ne jaɡre ne keeɡore dɛ nyoɡmare laa tena so a ta naa, ó nyiŋ ba kɛrɛdɛ.”

⁸ Belaa nɛn waa dɛ daah la kpɔ takpeɡ ŋɔ, “Nomoa, chɔɔ ne jwaana bwaa n che dejaŋ doa dɛɛ daah.”

⁹ Na, baa bɛl waa cheɡɛ kon waa do kɛ torɔɡo bini ne jaɡre dɛ ba. Asɛ nɛn waa dɛ daah la ŋɔ, “Bwɛjen Babelɔn paɡrɔ! O paɡrɔ! Voɡare aa lɔ o ta bwa, ba paɡre a bwa burbur ken bil harɛ.”

¹⁰ Aesaya ŋɔ, “N nɛra, ba ɛ heyaa kɛŋɔ baa lɔ mea ken, waa maa noa le Koranar Bwa Kooro, Israel tena aa dɛ tomɔ be laanee n bol la.”

Korowii bol Edom harɛ chɔɡa wa

¹¹ Waa aa chiɡ Edom harɛ ta Korowii bol baɡle Aesaya chaahna ta laanee nɔ. Nomɛl lɔ Edom dɛ pɛɛ ŋɔ, “Nɛn haa dɛ daah, aa biɡruu mɔɔ bɔr chaah naa?”

¹² Anee o chaŋe ŋɔ, “Tɔɔ dɛ ba pera, kɛ bɔr ɛɛ berɔɔ jo ja. Dɛ he dɛ nyin dɛ́ jemaa, ba dɛ́ berɛ ba bɔɔ ja.”

Korowii bol Arab harɛ chɔɡa wa

¹³ Waa aa chiɡ Arab harɛ ta, Korowii bol baɡle Aesaya chaahna ta laanee nɔ. Dedan tena haa lɔ Arab harɛ ta dɛ valɛ dɛɛ ɡaaɡe, pua hɛŋle ɡbo harɛ taa hɛɛ ba he tɛnte deene baŋra dɛɛ chɔ jwaana.

¹⁴ Tema tena, hé kpɔ kondikwaa ne nee ba cheme banɔ la baa chwaa le laa ta la.

¹⁵ Ba chwao dɛɛ le keri, ne hɛma baa hara dɛɛ ba ba tae, dɛ wekpeɡa aa lɔ laa ta la nyoa.

¹⁶ Korowii berɔ ŋɔ n be ŋɔ, “Gɛ paadii yon jemɛ kɛŋɔ benanyoa wɛɛ ba o toma tona la, ɡɛɛ Keda tena jirima bwa ɛɛ ba tona benanyoa.

¹⁷ Keda laa tena baa jemɛ hɛma tae kɛrɛdɛ la aa kanee do kpa. Men Korowii Israel tena aa dɛ tom mɛ laanee bola.”