Aesaya 20 - mzwDBL

Korowii bol Ijipt ne Itiopia tena chɔɡa wa

¹ A bena Asiiria koojen Saaɡɔn aa tomɛ o laa nomoa o la bwɛjen Asdɔd dɛ ka yoo ba dɛ lɛ bwɛjen la la,

² a ɡɛ saŋee Korowii che Emɔɔs bie Aesaya nɛɛ dɛ bol ŋɔ, “Ka laa lweyal wur bil, dɛ́ laa naŋɡawa parame he nakpale.” Asɛ Aesaya ka ɛ ɡɛ, dɛ valɛ dakpaŋ ne o nakpapɛɛ ne.

³ Ate, Korowii ŋɔ, “Gɛ n bonɔɔ Aesaya aa dɛ valɛ dakpaŋ ne nakpapɛɛ bene atoro nɔ, a ɛ we-ɛɛla dɛ baɡle waa aa dɛ ba Ijipt harɛ ne Itiopia harɛ chiɡa.

⁴ Gɛ tentenee Asiiria koojen ɛɛ ba Ijipt ne Itiopia tena waa kaa yoo ba, dɛ laɡ ba la ɛɛ ba bá valɛ dakpaŋ ne nakpapɛɛ ne. Nomonome ne bechale bwa ɛɛ valɛ mumɡbal sihiih nee.

⁵ Nɛra baa dɔ Itiopia hwɛɡa, dɛɛ tamane Ijipt nɛɛ la ɛɛ ɔmɔɔ sihiih kpo ba.

⁶ Nɛra baa soɡe mpo nyoa bela la ɛɛ na waa aa puu baa dɛ́ ŋɔ, ‘Na ɡɛ aa chiɡ nɛra yaa kpɔ ya te dɛɛ dawɛ ba nɛɛ la, nɛra yaa chwaa kaa mar ba bá lɛ yaa le Asiiria koojen nɔn ta la! Na waa aa puu ba! Leperaa yaa ba sie doe jaɔ?’ ”