Aesaya 2 - mzwDBL

Korowii Bwejen waa lɔ Saayɔn

¹ Waa Korowii aa kpɔa baɡle Emɔɔs bibaa Aesaya, a ɛ Juda harɛ ne Jerusalam harɛ ta waa nɔ.

² Tɔpere bɛl dɛ ba ásɛ bwe Korowii Dea aa chɔŋɛ o ta Jerusalam la waa ba hiah ɡwaa bwea bwa, ásɛ o sɔn le bwea bwa bini, ásɛ harɛre nɛra warɛ dɛ́ ba o ta.

³ Nɛra ɛɛ warɔɔ dɛ́ ka ŋɔ, “Hé ba ya kaa Korowii Saayɔn Bwejen la doa Jerusalam, Korowii Jekɔb aa tomɔ la Dea. Wɛɛ baɡle yaa o ŋwɛnɛree, ásɛ yaa valɛ o webaɡla ta.” Saayɔn Bwejen taa o Mmarare ɛɛ ba lee, bá bol baɡle o nɛra Jerusalam bela.

⁴ Wɛɛ bol harɛre nɛra waa dɛ́ pa bole, dɛ́ kwaa ba baah. Baa beɡre ba kerii a ɛ para, dɛ́ beɡre ba lampeare ɡe ɡoori. Harɛre nɛra aa dɔŋaa yo, a ba ɛ kɛŋɔ baa hweli laa waa kpa.

⁵ Jekɔb naanar, hé ɡel yaa valɛ Korowii waa aa chaahna o kpɔ dɛɛ tɛ yaa la ta.

Korowii Tɔpere waa lea cheɡ

⁶ N Naa Korowii, he vɛh he nɛra Jekɔb naanar. Ba lɔ wee leebɔr tena wepuu ta, dɛ berɛ voɡra kɛŋɔ Filisti tena, dɛ jo nɛra baa wola hen tomɛ we-ɛɛla ta.

⁷ Suuɡapoŋa ne suuɡaswɛm ɡboo a ɡɛ nɛra la harɛ bwa, ba kondɔɔh a yoɡ aa kpeɡa ta nyoa dɔe. Jaɡre ɡboo ba harɛ bwa, asɛ kwaa aa do kɛ torɔɡore ba kpɔ dɛɛ la laa ɡe ta nyoa dɔe.

⁸ Voɡa ɡboo ba harɛ la ta bwa. Kwaa ba ɡbabir aa ɛa laanee baa tomɛ. Ba dɛ ɡuŋi kwaa ba ɡbaɡba aa kpɔ nɔɔra ɛa.

⁹ Anomanta, hen Korowii ɛɛ ba ba bɛlbwa ne harɛɛ, ásɛ ba di sihiih. N Naa Korowii, bɛ ba wechɔɡa kpɔ kɛ ba.

¹⁰ Hé bwa chwa ka jo bwebɔɔne bini, hé takapɔ dɛ́ kwi bɔɔne dɛ́ jo a bini, dɛ́ le Korowii bandia ne o kpeɡri dɛ o jirima kohona la ta.

¹¹ Nɛn nyanyini ɛɛ tonɔɔ ɡɛ saŋ, ásɛ maŋkurae nɛwɛnyini aa dɛ maŋkura o te la ba harɛ, Korowii ɡbo sɔnee dɛɛ ba lee ɡɛ saŋ.

¹² Nemenɛ Korowii le tɔpere bɛl cheɡ, dɛ tɛ nɛra baa dɛ ɛ mbarafo ne sɔnnyin, ne nɛra baa dɛ ɡɔɔ ba te, dɛ́ ba ba ne harɛ.

¹³ Wɛɛ chɔɡ Lɛbanɔn peleme dajaŋa ne Basan dajena ɡe bwaa,

¹⁴ ne bwejaŋa ne deŋɡarejena bwa,

¹⁵ ne dejaŋa dɛ danjwɛɛre baa maa bar bwɛɛre a do kpeɡri bwa.

¹⁶ Hale stiimaere bonadiire aa dɛ so a bini, ne stiimajena andɛɛɡa bwa ɛɛ chɔɡoo.

¹⁷ Nɛn nyanyini ɛɛ ba harɛɛ ɡɛ saŋ, ásɛ maŋkurae nɛwɛnyini aa dɛ maŋkura o te la tonɛ. Korowii ɡbo sɔnee dɛɛ ba lee awola tɔpere,

¹⁸ ásɛ voɡa ɡe bwa nyoɡre kwaraa.

¹⁹ Nɛra ɛɛ ɔmɔɔ kohona, dɛ́ chwa ka jo bwebɔɔne, dɛ́ kwi bɔɔne dɛ́ jo a bini, dɛ́ le Korowii bandia ne o kpeɡri, ne o jirima kohona la nyoa, ɡɛ saŋ waa ba jiɡri harɛ la.

²⁰ Nɛra ɛɛ pa ba voɡa baa kpɔ suuɡapoŋa ne suuɡaswɛm ɛa, dɛɛ toma laanee ta a wola tɔpere, ásɛ a berɛ daŋɡboŋre ne jereme kwa.

²¹ Baa kpɔ ɔmee chwa ka jo bwebɔɔne, ne bwejena aa peɡra la baah, dɛ́ le Korowii bandia ne o kpeɡri, ne o jirima kohona la nyoa, ɡɛ saŋ waa ba jiɡri harɛ la.

²² He bɛ hwɛɡa kpɔ do nɛwɛnyini nɛɛ kpa. Waa sewaa? Bɔkwaa nɛwɛnyini ɡeɔ?