Aesaya 19 - mzwDBL

Korowii bol Ijipt tena chɔɡa wa

¹ Waa aa chiɡ Ijipt harɛ ta, Korowii bol baɡle Aesaya chaahna ta laanee nɔ. Hé na! Korowii cheɡɛ bam ta, dɛɛ ba Ijipt harɛ ta wɔrɔbe nɛ. Voɡare aa lɔ bela bwa jum jah o sie, asɛ bela tena bwa bwara yɔr.

² Korowii ŋɔ, “Mɛɛ kpɔ naɡraa ta Ijipt tena nɛ ba ɡbo yo dɔŋa, dɔɔ ne nime yo, chamena ne o chamenate yo, bwɛjen ne o bwɛjen dɔŋ yo, ásɛ koranar ɡe yo dɔŋa.

³ Ijipt tena hwɛɡa bwa ɛɛ tonɔɔ, ásɛ ba maɡla baa maɡla bil bwa ɛ pɛɛpɛɛ, bá kaa bɔɔ voɡa ne lala ne ba voɡra ne ba bebeela.

⁴ Mɛɛ kpɔ Ijipt tenaa do kooro nyubinikpeɡ te bɛl nɔn ta, o wa do ɔma, wɛɛ nyiŋi ba nɛ. Men Korowii, Koranar Bwa Kooroo bola.”

⁵ Nael Moo waa chɔ bela ɛɛ hweehroo, ásɛ o nenabɔɔ bini hol chɔ.

⁶ Bɔra baa kwia nee palɛ dɛɛ kpɔ a ta bwa ɛɛ sɔɔhnoo, ásɛ nenabɔɔne hweeh. Kpɔɡa aa cheɡɛ nee ta bwa sewɛ.

⁷ Kwaa aa lɔ Nael Moo nyoa, ne kwaa baa dua o nyoa la bwa ɛɛ holoo, peu kpɔa kaa kwara.

⁸ Nɛra baa dɛ ɛ nee toma ɛɛ kpɔ nɔɔraa dawɛ nyu dɛ́ wi, nɛra baa dɛɛ ta ɡoŋa Nael Moo ta, ne banɔ la baa dɛ ta asauri o ta bwa hwɛɡa ɛɛ tonɔɔ.

⁹ Nɛra baa kpɔ jisere dɛɛ ɛ yapondɛɛɡa bwara ɛɛ yɔroo, ásɛ nɛra baa dɛ sɔah bwara hwah.

¹⁰ Nɛra baa dɛ ɛ yale toma bwara ɛɛ yɔroo, ásɛ nɛra baa dɛ di a paane waa do sum.

¹¹ Nomonome baa chɔ Ijipt bwɛjen Soan nyoa la ɛ ɡɛna, nomonome baa jemɛ waa dɛɛ ja Ijipt kooro la aa on liidɛɛɡa tɛ. Aah, hɛɛ won ŋɔ Ijipt kooro be ŋɔ, “N ɛ wejereme kɛŋɔ saŋ la tena wejerema ne koranar la bini bɛl aa?”

¹² Ijipt kooro, namete leperaa he wejerema la dɔɔ? Gel ba baɡle he jemɛ ɡɛ Koranar Bwa Kooro aa kpaŋre Ijipt tena waa bil dɛɛ ba kpɔe ɛɛ ba.

¹³ Nomonome baa chɔ Soan nyoa berɛ ɡɛna, Mɛmfes nomonome ɡe wili. Banee fe chɛ kɛŋɔ ba tɔ Ijipt tena sie, dɛ berɛ ɡel ba nyoɡre.

¹⁴ Korowii perewi sibir ta ba nɛ, dɛ ɡel Ijipt tena ɛ sakaa ba we-ɛɛla ta, kɛŋɔ sennyɔdɛɛ yon chwɛɛ dɛɛ ɡbaɡre a ta la.

¹⁵ Wobɛlbwa toole Ijipt tena won ɛ kpa, nomonome kɛɛ dansaara aa won cha ba, nɛnjena kɛɛ nɛmpɛɛne aa won cha ba.

¹⁶ Awola tɔpere, Ijipt tena ɛɛ ɛo kɛŋɔ haahna ken. Baa ɔmɔɔ ba bwara chel Koranar Bwa Kooro nɔn waa ɡɔɔra dɛ́ kpɔ tɛr ba deŋne la wa.

¹⁷ Juda harɛ sɔn ɛɛ ɡeloo ɔmee kohona lawɛ Ijipt tena. Nomɛlbwa yerɛ Juda harɛ sɔn aa, Ijipt tena bwara ɛɛ yɔroo, kpaŋra Koranar Bwa Kooro aa kpaŋre ba waa bil nomanta.

¹⁸ Awola tɔpere la, Ijipt harɛ bwɛjena anue tena ɛɛ bol Juda tena wobolee, dɛ́ kpɔ ba te tɛ kɛŋɔ baa tomɛ Koranar Bwa Kooro. Baa pa bwɛjena la bɛl sɔnee ‘Bwɛjen waa dɛ ba Chɔɡa’.

¹⁹ Baa ɛ saraha kon Ijipt harɛ baah taa tɛ Korowii, ásɛ dɛ kpɔ bwe ka pa o jwɛh ta tɛ Korowii, dɛ́ kpɔ dɛɛ lii, awola tɔpere.

²⁰ Aa cheo dɛɛ baɡle waa dɛ tɛ Koranar Bwa Kooro Ijipt harɛ ta. Dɛ nɛra dɛ ɛɛ ba hɔhɔrɔwa asɛ ba do lɔŋɔ tɛ Korowii aa, wɛɛ tɛɛ baa lɛɛree ó lɛɛ ba.

²¹ Korowii ɛɛ kpɔ o tenee baɡle Ijipt tena bá jemɔ awola, dɛ́ tomɔ dɛ́ kpoo kwaa tɛo, ásɛ dɛ kpɔ mea sarahare ɡe tɛo. Baa baɡɔ nyoa dɛɛ teŋɛ a ta.

²² Korowii ɛɛ tɛr Ijipt tena deŋnee mɔɔ dɛ lɛɛ ba. Baa ba o bee ásɛ o no ba wesoŋa dɛ́ chaah ba.

²³ Awola tɔpere la, ŋwɛnɛ ɛɛ chɔɔ le Ijipt harɛ ka ta Asiiria harɛ ta, ásɛ Asiiria tena won Ijipt laŋa, Ijipt tena ɡe won Asiiria bala. Gɛ nɛmbele banɛ nɔ ɛɛ pɛo dɛɛ tomɛ Korowii.

²⁴ Awola tɔpere la, Israel tena dɛ ba Ijipt ne Asiiria tena nɛɛ jae, dɛ́ ɡel harɛ nɔ ta nɛra bwa na som.

²⁵ Koranar Bwa Kooro ɛɛ swee andɛɛɡaa tɛɛ ba dɛ́ ŋɔ, “Ijipt tena baa ɛ n nɛra, ne Asiiria tena maa ta ba, dɛ Israel tena maa lee ba tɛ n te la, ba na som.”