Aesaya 17 - mzwDBL

Korowii bol Damaskɔs tena chɔɡa wa

¹ Waa aa chiɡ bwɛjen Damaskɔs Korowii bol baɡle Aesaya chaahna ta laanee nɔ. “Damaskɔs aa bwɛjen ɛɛ ba kpa, wɛɛ ba chɔɡoo dɛ́ berɛ dimɡbia chɔ.

² Bwɛjena aa lɔ Siiria harɛ dɛ́ ba dimɡbia bera dɛ chɔ. Aa berɛ peera ne nae dibɔraa, nomɛlbwa aa lee do dɛ́ doŋa.

³ Bwɛjen baa ma danjwɛkpeɡ baro toole Israel harɛ ta kpa. Bwɛjen Damaskɔs ɡe aa koobwɛɛ ɛ kpa. Siiria tena ɛɛ ba ka tamaa ba jirima tonɛ, ɡɛ Israel tena jirima aa tona la.” Koranar Bwa Kooroo bola.

⁴ Korowii ŋɔ, “Awola tɔpere la, Israel jirima waa dɔa la ɛɛ tonɔɔ, ásɛ nyaa chiɡ o kondɔɔh naa ta.

⁵ Wɛɛ ɛo kɛŋɔ koo baa komɛ o mea dɛ paa kaa la ken. Wɛɛ ɛo kɛŋɔ koo baa kuuh mea Refaim Fɛlembɔjen bini, o chɔ pɛɛ.

⁶ Kɛ mea tamaa dɛɛ ba kae, kɛŋɔ ba yon chaa ɔleve daa nɔna, ásɛ a yon ba ka nɔna anɛ kɛɛ atoro daa la nyundujaɡla kɛɛ tama aa ka o kpala ta la.” Korowii Israel tena aa dɛ tomɔ laanee bola.

⁷ Awola tɔpere la, nɛwɛnyina bwa ɛɛ kpɔ sie dawɛ Korowii nɛ. Onee Israel Nɛŋɡoroŋ waa ta ba baa tomɔ.

⁸ Baa kwaa ba ɡbaɡba aa maa dɛ kpɔ saraha kwaa dɛɛ tɛ voɡa a ta laanee nyiŋi kpa. Baa voɡhaah Asera dajaŋa ba ɡbaɡba aa paaɡa, ne bela baa maa dɛɛ fuh daawiile a sɔɔh aa soma la ta hwɛɡɛ kpa.

⁹ Awola tɔpere la, ba bwɛjena aa do kpeɡri ɛɛ berɛ dimɡbeenii, dɛ le kpɔɡa ne daa, ɡɛ Israel tena fa aa pɔ a ɡɛ bwɛɛre la nɛɛ a nɛra chwa a berɛ dimɡbeeni dɛ che la.

¹⁰ Israel tena, he liire le he Lɛɛ Korowii nɛ. Onee Bwetal haa kpɔ he te marɔ wɛɛ tɔ heyaa ɡbemɡbe la, kɛ he soh o wa. He du dadɛɛɡa bodɛɛɡa, dɛ kwaa bela dɛɛ tomɛ harɛre voɡare.

¹¹ He fe wono ɡel a le awola tenten haa dua la, dɛ moɡɛ dɛ fe aa, haa komɛlbwa a ta chaa. Wahala ne weweele aa wola tonɛ ɡboo hɛɛ ba dɔe.

¹² Sibeɡra chole harɛre aa wara nɛ, a nɛra ɛɛ si kɛŋɔ mpo ken, dɛɛ do ɡbɔɡa kɛŋɔ mpo nehɛma ken.

¹³ Hale nɛra warɔ dɛɛ moo kɛŋɔ mpo nehɛma sii aa, Korowii ɛɛ kah baa ásɛ ba chwa kaa bojaŋ. Baa chwao dɛ́ peɡre kɛŋɔ peu aa kpɔ haahra, kɛɛ kawulewule aa kpɔ doŋa kaa la ken.

¹⁴ A tel jɔmɔra aa, ba dɛ ɛ ɔmewa, kɛ tɔɔ ne pera chɔɔ dɛ ba kaalɔ. A ɡɛ waa nɔɔ dɛ́ chiɡ nɛra baa bal ya laala kɛ laa ta kwa kaa la nɛ.