Aesaya 15 - mzwDBL

Korowii bol Moab tena chɔɡa wa

¹ Waa aa chiɡ Moab harɛ ta Korowii bol baɡle Aesaya chaahna ta laanee nɔ, Moab harɛ ta bwɛjena Ar ne Kir chɔɡɔ. Jwaana beŋkpoŋii ba chɔɡa.

² Debɔn tena teehnɔ kaa deŋɡare ta, bela ba voɡ aa lole dɛ́ ka wi. Moab harɛ ta nɛra bwa ɛɛ wi bwɛjena Nɛbo ne Medeba waa, dɛ́ fonɛ ba nyuune ne tampona bwa ta, aa baɡle suna dii.

³ Ba tɔ lweyale fɔɡbaahna bwa, saldor ne bela baa dɛ cheme bwa, ba ne siniiree, ba wio dɛ ba tal.

⁴ Hɛsbɔn tena ne Eleale tena dɛ wi, ba lɔŋɔre tel Jahas. A ɡelɔ ɔmee lawɛ Moab laa tena bwa ba lɔŋɔre bɔle, ba bwara yɔr.

⁵ N bambile dɛ wee mɛ Moab tena wa. Nɛra baa soɡe harɛ la ta chwao kaa Soar, hale dɛ ka tel Eɡlat Sɛleseya. Bane teehnɔ kaa Luhit, baa dɛ kaa la bwa, dɛ ba ne wii. Bane chwao kpɔ Horonaim ŋwɛnɛ dɛɛ wi ba chɔɡa wa.

⁶ Nimrim nenabɔɔ nee bwa hweehrɔ kwaraa, kpɔɡa aa lɔ o nyoa bwa holɔ, papo-lwɛɛ bɛlbwa toole dɛ ta che bela kpa.

⁷ Ba cheɡɛ ba kondɔɔh baa dɔa bwa ɡale Dajaŋa Nenabɔɔ, dɛɛ ba kpɔe ka sɔh.

⁸ Moab harɛ jwɛhre bobɛlbwaa baa wi, ba wii tel bela bwɛɛre Eɡlaim ne Beɛ Elim.

⁹ Chal ɡboo Demɔn neerare bwa, kɛ Korowii ta dɔ waane aa ɡwaa ken, dɛ́ kpɔ ɛ nɛra baa soɡe bela. Seo chɔ le dɛɛ kpa Moab tena baa dɛ chwa, ne banɔ la baa ka harɛ la ta.