Aesaya 14 - mzwDBL

Israel tena bojaŋ harɛfale ta lee ba wa

¹ Korowii ɛɛ dɔ tedomaa tɛ Israel tena, wɛɛ berɔ lee ba tɛ o te ja, dɛ́ kpɔ ba ba so ba ɡbaɡba harɛ ta. Hɔɔhra ɛɛ ba ja ba nɛɛ ba ne ba pɛ so.

² Harɛre nɛra ɛɛ cha baa dɛ kpɔ ba ba, ba ɡbaɡba harɛ ta. Ásɛ Israel tena berɛ kpɔ harɛre la nɛra berɛ ba yoma Korowii harɛ waa kpɔa tɛ Israel tena la ta. Nɛra Israel tena fa aa lɔ ba lɔɡa la berɛ ba do ba lɔɡa, ásɛ dɛ baa tom ba.

³ Awola tɔpere Korowii aa tɛ heyaa ona le weweele ne hɔhɔrɔwa dɛ dochɔɡa he fa aa lɔ a ta la,

⁴ hɛɛ kpɔ yelee sɛɡle Babelɔn kooro dɛ ŋɔ, “Hé na ɡɛ nyubinikpeɡ te la aa bera sɔɔh! Hé na ɡɛ o bandia aa ba a jaɡa!

⁵ Korowii kuuɡi wechɔɡ-ɛɛra daŋɡbale, o ɡelɔ koranar kpeɡri sɔɔh.

⁶ Banee kpɔ bwaawee dɛ do nɛra ba ta ba lɔɔra ɡelɛ bwa, harɛre nɛra baa pɔ ba nɛɛ la, ba ta ba fiiɡa ɡelɛ bwa.

⁷ Harɛ bwa dɔ deŋnesɔɔhna, nomɛlbwa ɛɛ ɡo yela silɛɛ ne.

⁸ Lɛbanɔn harɛ peleme daa, ne anɔ la aa jaa kwaraa sie lɛ wechɔɡ-ɛɛ la kora la ɡui wa, dɛɛ ŋɔ, ‘Taraken baa ba he ne harɛ nɔ, nomɛlbwa toole dɛ́ teŋe yaa kpa.’

⁹ Lala kpɔ ba te ba sie beɡre baa kpa Babelɔn kooro bala. A ɡelɔ nɛra ba fa aa dɛ di kpeɡri harɛ nɔ ta dɛ sewɛ la ir dɛɛ jaamo. Nomonome ba fa aa dɛ di kpeɡri harɛre ta ir ba kookane ta dɛɛ kpao.

¹⁰ Ba bwa ɛɛ ŋɔ o bee ŋɔ, ‘He ɡe sɔɔhnɔ ɡɛ yaa doa nɔ, ya bwa kɛrɛdɛ!

¹¹ He jenu bwa tonɛ lalabwɛ, janjela baa lɔa dɛɛ duuri bwa chiɡo. Dudulee he kalaŋ, dɛ tɔe yal.’

¹² Babelɔn kooro, na ɡɛ haa le nyundua ba le harɛ. Chɔmbibi wewee, chɔmbibi bonɔɔ! Ba taɡɛ ta harɛ, nɛn he fa aa pɔ harɛre nɛ!

¹³ He fa liiro ŋɔ, ‘Mɛɛ teehnoo kaa nyundua. Korowii weweela baŋ lee mɛɛ ba n kookara kpɔe ka cheɡ, dɛ́ so kɛŋɔ kooro weekaŋle nyunduabɔr bwejen la ta, bela kwaa aa bea baa wola an na aa dɛ cheme la.

¹⁴ Mɛɛ teehnoo ka so baama baŋ, dɛ́ ɛ n te kɛŋɔ Nemenɛ Korowii ken.’

¹⁵ Kɛ ane a bwa, Korowii ba he ne harɛ, dɛ kpɔe kaa lala huɡribɔr bɔɔ bini.

¹⁶ Banɔ la baa nae la ɛɛ nyiŋii jeiih ken, dɛɛ lii ŋɔ, ‘Baa la waa ɡela harɛ jiɡri dɛ ɡel koranar chel laanee nɔ kɛɛ?

¹⁷ Onee chɔɡ bwɛjena dɛ ɡel bela bwa berɛ pua hɛŋle ɡbo harɛ, waa wola nɛra baa laɡ ba laa ta kpɔe ta la aa?’

¹⁸ Koranar baa serewa la bɛlbwa chɔ o ɡbaɡba lalbɔɔ bini, ba ɛ ba ŋwama la a do wer.

¹⁹ Kɛ he te, ba kpɔe viɡri kɛŋɔ baa teŋe daa ta ken, ba ta hen huɡe. Nɛra baa ka laa ta la lalaa tɔ he nɛ, ba kpɔ he ne ba bwa ta bwebɔɔ bini dɛ tiɡri he nɛ.

²⁰ Ba ta hen huɡe kɛŋɔ baa huɡe he bala koranar la, dɛkalkɛŋɔ, he chɔɡ he harɛ, he kpoo he nɛra. Baa wechɔɡ-ɛɛra naanar sɔnee yerɛ kpa bwa.

²¹ Kwaa bɔr dɛ́ kpoo o naanar ba naawa chɔɡre baa ɛa la wa, ásɛ ba bɛ ir dɛ́ ba lɛ harɛ nɔ dɔɔh, dɛ́ ma bwɛjena o ta bwa.”

²² Koranar Bwa Kooro ŋɔ, “Mɛɛ ka che bwɛjen Babelɔn ne o nɛra nɛɛ dɛ́ kpoo ba maa komɛlbwaa ɡel, bechale ɡba aa ka, o sɔn he. Men Korowiirii ŋɔa.

²³ Mɛɛ ɡeloo bela berɛ kataŋa ne kwiure dobɔr, dɛ́ ɡbaa bela bwa ó chɔɡ. Men Koranar Bwa Kooroo bola.”

Korowii bol Asiiria tena chɔɡa wa

²⁴ Koranar Bwa Kooro ŋwɛɛrɔ ŋɔ, “Waa maa vɔrɔwa la, anee dɛɛ ba ɛɛ, anɔ la aa dawɛ n sie la ɡee mɛɛ ba ɛɛ.

²⁵ Mɛɛ chɔɡ Asiiria tenaa le n harɛ ta, mɛɛ tiɡri ba nɛɛ Israel harɛ bwejena ta, dɛ́ lawɛ n nɛra le Asiiria tena kpeɡri baa dɛ di ba nɛ, kɛŋɔ baa kpɔ daa dawɛ nae anɛ baŋa ta a pɛ dɛɛ ɛ toma la.

²⁶ Waa nɔɔ n vɔrɔwe bil dɛɛ ba ɛɛ harɛ ta bobɛlbwa. N ir nɔn dɛ́ tɛr harɛre nɛra deŋne.”

²⁷ Waa Koranar Bwa Kooro aa vɔrɔwa nɔ, umee dɛ́ won bera ɔ? O ir nɔn dɛ́ tɛr nɛra deŋne, umee dɛ won ŋɔ o be ŋɔ o bɛ ɛɔ?

Korowii bol Filisti tena chɔɡa wa

²⁸ A bena Kooro Ahas aa chɔ o banɔn ta, waa aa le Korowii be ba laanee.

²⁹ Filisti tena, daŋɡbala baa kpɔa lɔɔ heyaa ka la kuu, kɛ he bɛ ɡel he sie lɛ he hɛɡre. Harɛkon sewaa, onchɔɡe kɛ domkpule dɛ́ chiɡ o naa ta, ásɛ o bii ɡe do kɛŋɔ doh dɛ́ ir.

³⁰ Nɛra baa nyaa kohona ɛɛ dɔ kwaa dɛɛ di, ásɛ banɔ la ba soɡa bini aa kpeɡa tɛɛ ba ɡe dɔ bɔr chɔ bosɔɔhna ta, komɛlbwa aa ban ɛ. Kɛ he Filisti tena te, lɔree mɛɛ ba kpɔe kpoo heyaa he mun he harɛ la ta. He bini bɛlbwa aa kae ba.

³¹ Hé do lɔŋɔre dɛɛ wii, he banɔ la haa lɔ bwɛjena bini la! Filisti tena, hé ɡel he bambile teŋe! Yoyoora tenten le weekaŋle nyunduabɔr dɛɛ ba, kɛŋɔ ninchuu ken, dɛ bwa pɛ dɛɛ ba ba yo heya.

³² Webesoo yaa ba toroma baa le harɛ la ta ba la chaŋa ɔ? “Korowii kpɔ Saayɔn cheɡ, ásɛ o nɛra baa dɛ na wahala dɔ bɔr so dɛ́ dɔ ba nyu.”