Aesaya 13 - mzwDBL

Korowii bol Babelɔn tena chɔɡa wa

¹ Babelɔn waa Korowii aa kpɔa baɡle Emɔɔs bie Aesaya chaahna ta laanee nɔ.

² Hé kpɔ laa fraŋkaa ka pa deŋɡare daa aa wola toole o ta, ásɛ dɛ kpɔ takpeɡ ŋɔ laa tena ba, dɛ́ ir nɔɔra baɡ ba bá ka jo nɛnjena bwɛɛ la ta dɛ́ yoo ba.

³ Korowii nɛra waa lee ba cheɡ tɛ o te, dɛ yerɛ o banyoola ŋɔ bá tɛr nɛra baa dɛ ɛo bandiwaa la deŋne. Ba sie dɛ lɛ kan waa doa la ta, dɛ́ ɡel ba won pɔ nɛra la nɛ.

⁴ Hé no! Gbɔɡa dɛ le bwejena dor dɛɛ ba birbir kɛ nɛnlaa aa dɛ valɛ ken, kɛ harɛre nɛra ne ba koranar aa baa pɛ ken. Nemenɛ Korowiirii dɛɛ yer ba bá kaa laa la.

⁵ Ba le harɛre jaɡa bojaŋ dɛɛ ba. Bandia nee Korowii ɛɛ ba ba ne, bá ba chɔɡ harɛ la bwa.

⁶ Hé kpɔ nɔɔra dawɛ nyu dɛ́ wi. Tɔpere Korowii aa lea cheɡ la telo. Korowii Waa Ɛ Kpeɡri Bwa Dɔɔ la tɔpere waa dɛ ba nɛra chɔɡa la telo.

⁷ Gɛ saŋ telaa, nomɛlbwa bwara ɛɛ yɔroo, ásɛ ba hwɛɡa ɡe tonɛ.

⁸ Ɔmee ɛɛ chole ba nɛɛ, ba bwara wee ba chweeh, baa beɡre ba te kɛŋɔ loltea aa lɔ haah. Ba nyoa ɛɛ kpoo kohonaa, ásɛ sihiih kpo ba, baa nyiŋi dɔŋa.

⁹ Hé na! Tɔpere Korowii aa lea cheɡ la dɛ ba. Awola tɔpere la aa werii do kwara, o baah ɛɛ diu taeh. Wɛɛ ɛ harɛ nɔɔ kɛŋɔ pua hɛŋle ɡbo harɛ ken, dɛ́ chɔɡ wechɔɡ-ɛɛra le o ta.

¹⁰ Weweela aa chaah ɡɛ saŋ, wee aa bɔr chaahna ba kpa, korobie ɡe aa won chaah.

¹¹ Korowii ŋɔ, “Mɛɛ ba chɔɡ harɛ nɔɔ. Mɛɛ tɛr wechɔɡ-ɛɛra deŋnee ba wedoŋa wa, dɛ́ ɡel ɡɔɔra nɛra aa dɛ ɡɔɔ ba te la teŋe. Dɛ́ ba banɔ la baa dɛ ɛ mbarafo la ɡe ne harɛ.

¹² Nɛra baa le a nyoa ɛɛ ka tama kenii, ba waa do tɔɡre ɡwaa suuɡaswɛm tenten.

¹³ Mɛɛ ɡeloo nyundua yiiɡi, ásɛ harɛ jiɡri dɛ́ le o chebɔr, ɡɛ tɔpere men Koranar Bwa Kooro aa baɡle n bandia harɛ nɔ ta la.

¹⁴ Hɔɔhra baa soɡe Babelɔn ɛɛ lɔɔ peɡre, dɛ́ kaa ba harɛre ta kɛŋɔ kpaahna aa jo kweɡli baah a lɔ peɡre la. Baa chwao peɡre kɛŋɔ peera aa wola teɡre dɔe ken.

¹⁵ Nomɛlbwa baa lawɔ la, baa yaɡɔɔ kere nee kpo.

¹⁶ Baa cheo dɛɛ nyiŋi ba lɔɔ ba bii kpoo, dɛ́ jo ba deremi dɛ́ bal ba laala dɛ paɡɛ ba haahna ɡe.”

¹⁷ Korowii ŋɔ, “Hé no! Mɛɛ ɡeloo Midia tena ba yo Babelɔn tena. Ba waane laa suuɡapoŋa wa, haa won kpɔ suuɡaswɛm yaɡ ba sen.

¹⁸ Baa kpɔ ba tori ne hɛmaa le bonɔɔna nɛɛ dɛ́ kpoo ba. Ba te waane laa bechasɔɔhne wa, ba ta tedoma dɔe tɛ bechajeɡre ɡe.

¹⁹ Babelɔn kora wer ɡwaa bwɛɛre bwa kora, bela tena kpɔɔ dɛɛ ta nyoa. Kɛ men Korowii, mɛɛ chɔɡ kora laanee kɛŋɔ maa ɛ Sodom ne Gomoora la.

²⁰ Nomɛlbwa aa belaa so kpa bwa, nɛra ba taa dɛ lol ba ne banɔ la ba ta aa dɛ ba ba lola bwa. Arab tena baa vala dɛɛ valɛ aa ba tɛnte deene baŋre bela, peteɡra kwara aa ba peeraa teɡɛ la bela á ka di kpa.

²¹ Pua hɛŋle ɡbo harɛ ta ola dɛ ba bela doe dɛɛ si deremi la bini, kwiure sɔh a kɔne bela, ásɛ kpɔɡ bini ola aa do kɛŋɔ boohna do bela dɛɛ jah.

²² Kalampoŋare ɛɛ dɛɛ si dekpeɡa binii, ásɛ ɡboli si koranar dedɛɛɡa bini. Babelɔn chɔɡa saŋ telo, waa jaŋɛ kpa.”