Aesaya 10 - mzwDBL

¹ Nɛra baa dɛ do mmarare aa wola aŋwɛnɛ ta ɛɛ, ne mmarakpeɡa dɛ́ fiiɡi nɛra la, ba bwɛɛlɛ.

² Ba laa nyaara waa sie dɛɛ berɛ, dɛ laa nɛra baa lɔ wahala ta waa dɛɛ ɡole, dɛ lɛ luhaahna kwaa dɛɛ le ba be, dɛ berɛ dɛɛ kah bilalbii ɡe kwa.

³ Ɛrɛɛ hɛɛ ba ɛɛ awola Korowii aa dɛ ba he deŋne tɛra, ne wenaale aa le bojaŋ ba he nɛɛ laɔ? Umee hɛɛ ba chwae ka marɔɔ? Leperaa hɛɛ ba he kondɔɔh la ɡela ɔ?

⁴ Wobɛlbwa toole hé ɛ kpa, nemenɛ hé ja nɛra baa laɡ ba laa ta, kɛɛ banɔ la baa ka kpoo la nɛ. Anɔ nɔ bwa habɔɔ, o baah aa sɔɔh, o nɔn waa ira dɛ́ tɛr ba deŋne la ɡe ta cheɡɛ ɡɛ.

Asiiria tena bole pae

⁵ Korowii ŋɔ, “Asiiria tena bwɛɛlɛ! Mɛɛ kpɔ baa ɛ kɛŋɔ n ɡuli maa kpɔ dɛɛ tɛr nɛra n baah aa di ba nɛɛ deŋne.

⁶ Nɛra baa wola men tomɛ la bee mɛɛ ba Asiiria tena toma, nɛra baa dɛ ɛ n bandiwaa la bee mɛɛ ba ba doe bá ka yoo ba, dɛ́ pa ba laala dɛ́ kah ba kondɔɔh, ásɛ dɛ tiɡri ba nɛɛ kɛŋɔ kpechɛɡre aa lɔ fɔɡbaahna ken.

⁷ Kɛ Asiiria koojen te fe aa an ɡɛ nyin, dɛ o liire laa. O waa bwaa kɛŋɔ o fee den chɔɡ harɛre ɡalɡa bwa kwara.

⁸ O dɛ maŋkura o te ŋɔ, ‘N laa sitɔɔla bwa ɛ koranar!

⁹ Gɛ maa chɔɡ bwɛjena Kaakɛmes ne Kalno ne Aapad ne Hamat dɛ Damaskɔs la, ɡɛɛ n chɔɡ Samaria ɡe.

¹⁰ Gɛ maa wona tɛr harɛre a voɡare aa wara dɛ ɡwaa bwɛjena Jerusalam ne Samaria voɡare deŋne la,

¹¹ maa won ɛ Jerusalam harɛ ne o voɡare ɡe ɡɛ maa ɛ Samaria harɛ ne o voɡare la kɛɛ?’ ”

¹² Dɛ Korowii baa tonɛ ɡɛ waa ɛ nɛra baa lɔ Saayɔn Bwejen doa ne Jerusalam bwa naa, wɛɛ ŋɔɔ, “Mɛɛ ba tɛr Asiiria koojen deŋnee o mbarafo ne nyiŋa waa nyiŋi nɛn dɛɛ vah la wa.

¹³ Dɛkalkɛ o dɛ bol ŋɔ, ‘N ɡbabir bokpeɡa ne n wejemaa n kpɔ ɛ waa nɔ bwa. N chɔɡ harɛre jwɛhre dɛ yoo ba dɛ pa ba kondɔɔh. Banyoo tentenee men. N ir koranar ba kora ta.

¹⁴ N pa ba kondɔɔh kɛŋɔ jumbie kɔr ne hala ken. Gɛ nɛn yon ka pu kwaa hala kɛŋɔ a chɔ pɛɛpɛɛ o yon pa la, ɡɛɛ n kpɔ harɛre la bwa. Bɛlbwa ta parawe kɛɛ dɛ si.’ ”

¹⁵ Kpanfɛ ɛɛ won ŋɔ o ɡwaa nɛn waa kpɔɔ dɛɛ teŋe daa aa, kɛɛ saradaa ɛɛ won ŋɔ o ɡwaa naate waa dɛ ɛ o ne toma aa? Guli ɛɛ won ɡɔɔ o te dɛ nɛn laa kpɔɔ waa? Kɛɛ da ɛɛ won ɡɔɔ nɛn aa?

¹⁶ Anomanta, Korowii, Koranar Bwa Kooro ɛɛ kpɔ ɡwaŋa weelaa ta Asiiria koojen laa tena baa kpeɡa kohona nɛ, ásɛ dɛ chɔɡ o jirima kɛŋɔ nii yon fuh kon tonɛ la.

¹⁷ Korowii waa do kɛ kandea dɛɛ chaah Israel tena, wɛɛ berɛ niinii dɛɛ chɔɡ kwa. Korowii Waa Do Goroŋ Israel tena ɛɛ tomɔ la, ɛɛ berɛ ninlawee, dɛ́ fuh komɛlbwa tɔpebeŋkpoŋ, hale sɔɔhne ne jabalnadaŋɛ bwa.

¹⁸ Wɛɛ fuh kɔne aa wera, ne harɛdɛɛɡa bwaa kwara, komɛlbwa ɛɛ chɔɡoo. Aa ɛo kɛŋɔ serewe weela aa lɔ nɛn nɛɛ la.

¹⁹ Daa aa ka o kɔr la bini la, tamaa kenii dɛɛ ba kae, ásɛ bechajeɡa kwaraa won kura.

Israel tena baa kaa wa

²⁰ Gɛ saŋ la, Israel tena baa kaa la aa hwɛɡaa dɔ Asiiria koojen waa lɔ ba harɛ la nɛɛ kpa. Korowii Israel Nɛŋɡoroŋ la nɛɛ baa ba ba kpɔ ba te dawɛ kasinteŋ ne.

²¹ Ba bini tama ɛɛ berɔɔ ba Nemenɛ Korowii be.

²² Israel tena, dɛ he warɔ kɛŋɔ mpo nyoa hɛŋle kwaraa naa, he tamaa dɛɛ ba kae dɛ́ berɛ ba. Chɔɡa chɔ le dɛɛ kpa heya. Gɛ Korowii aa cheɡ heyaa la, he chɛ ɡɛ.

²³ Korowii, Koranar Bwa Kooro dɛɛ ba chɔɡa waa vɔrɔwa cheɡ la ne bala ba ta harɛ la bwa ta.

²⁴ A ɡɛ nomanta, Korowii, Koranar Bwa Kooro dɛ bol ŋɔ, “N nɛra haa lɔ Saayɔn, hale dɛ Asiiria tena kpɔ daa dɛɛ lɔɔ heyaa ɡɛ Ijipt tena fa aa ɛ heyaa la aa, hé bɛ ban ɔmɛ.

²⁵ A ka tamaa ken dɛ n baah sɔɔhnɔ, maa hé deŋnee tɛr kpa, ásɛ dɛ berɛ n bandia ta Asiiria tena ɡe nɛɛ dɛ́ chɔɡ ba.”

²⁶ Koranar Bwa Kooro ɛɛ lɔɔ baa chweema nee, ɡɛ waa ɛ Midian tena dɛ kpoo ba Oreb bwe ta la. Wɛɛ ir o daŋɡbalaa pa nee ta, ɡɛ waa ɛ Ijipt tena ba ka nee ta la.

²⁷ Mɛɛ laa wahala baa dɛ ɛ heyaa a berɛ heyaa bone laanee kpɔ he nɛ, ásɛ wobɛlbwa le he baŋa a ɡɛ saŋ.

²⁸ Hé na! Laa tena jo bwɛjen Aiyat, dɛ kpɔ Meɡrɔn dɛɛ ba, dɛ ka kpɔ bone ka cheɡ Mikmas.

²⁹ Ba le ŋwɛnɛ waa chɔa kaa Geba baŋ, dɛ ŋɔ, “Yaa ka chɔ Gebaa jwaana la bwaa.” Ɔmee lawɛ Rama tena ba bwara ɛɛ sa, Kooro Sɔɔl bwɛɛ Gebea tena ir chwa.

³⁰ Galim tena, hé do lɔŋɔre! Nɛra haa lɔ Laisa ɡe, hé no. Anatɔt tena, hé waa sum.

³¹ Madmena tena dɛ chwaaɡe, ásɛ Gebim tena ɡee ir ba buɡ ta dɛ́ kaa nyin ba nyu.

³² Fini tɔpere nɔ, baa bao dɛ́ ba che Nɔb. Baa nyiŋi Jerusalam Saayɔn Bwejen la taa, dɛ́ ume nɔɔra pa ba nɛɛ dɛɛ aah ba.

³³ Hé no! Korowii, Koranar Bwa Kooro ɛɛ ba ba ne harɛɛ, kɛŋɔ baa choo daa dɛɛ ta la ken. Dajaŋa la, wɛɛ teŋaa ɡo, dajena ɡe bwa choɡli.

³⁴ Wɛɛ teŋ baa ta, kɛŋɔ baa kpɔ kpanfɛ teŋni kɔr baah daa dɛɛ ta la ken. Ba kpeɡri kɛŋɔ Lɛbanɔn daa kwara naa, wɛɛ teŋ baa ta.