2 Webena 9 - mzwDBL

Seeba kooro waa ɛ haah baa na Kooro Solomɔn

¹ Seeba kooro waa ɛ haah baa no Kooro Solomɔn sɔn lee waa lea kohona. Anomanta, o la Kooro Solomɔn be Jerusalam, dɛ kpɔ wobobeela a bini aa kpeɡa dɛ́ ba daahno dɛ na. Haŋkooro la kpɔ nɛra baa dɛ tomɔ dɛ warɛ ja o nɛ, ne nyoɡmare aa cheɡɛ konsɔɔhsoma ne suuɡaswɛm kohona, ne bwedɛɛɡa a yoɡ aa kpeɡa kohona, dɛ la Kooro Solomɔn be. Waa laŋa o ne o ka cheme la, o bɔɔ Kooro Solomɔn waa aa lɔ o nyu bini bwa.

² Kooro Solomɔn chaŋe waa waa bɔɔro bwa kɛrɛdɛ ken tɛo, wobɛlbwa toole dɛ do kpeɡri waa wola wone baɡle a bini.

³ Haŋkooro la aa na wejema Kooro Solomɔn aa dɔa ne koodem waa doa,

⁴ ne kondikwaa aa cheɡɛ o kondikondibɔr, ne o nomonome sobɔr ne o bonɔɔna baa dɛ tomɔ, ne ba laala baa doa, ne bonɔɔna baa do batakaani dɛɛ doo sen, dɛ kwaa waa kpoora dɛ fuah dɛɛ ɛ sarahare Korowii Dea la, a ɛo nyokpoa.

⁵ Anee o ŋɔ Kooro Solomɔn be ŋɔ, “Waa haa ɛa ne wejema haa dɔa n do n harɛ ta dɛ no la ɛ kpela.

⁶ N ta ɡɛ baa bola la yaradae, atane n ɡbabir aa baa naa siwi ne nɔ. Waa la baa bola la ta waa nɔ bɛne kwara. He wejema ne he kondɔɔh ɡwaa anɔ la maa noa la kohona.

⁷ He nɛra nyu som, he nomonome baa dɛ che he jwɛɛh saŋ bɛlbwa, dɛɛ no he wejemwaa la ɡe na som.

⁸ Korowii haa dɛ tomɔ laanee dɔ jam. O sie lɛ he nɛ, dɛ cheɡe o kora ta Israel tena nɛ o sɔn ta ŋɔ hɛɛ nyiŋi ba nɛ. Korowii nyina aa wola jaɡa dɔe bwa o kpɔ dɛɛ nyin o nɛra Israel tena la nomanta, o cheɡe kora ŋɔ he nyiŋi ba nɛɛ kasinteŋ ne waa aa toɡra ne.”

⁹ O kpɔ suuɡaswɛm a tɔɡre aa ɡwaa kilore kaɡboŋa anaarɛ, ne konsɔɔhsoma aa wara pirim, dɛ bwedɛɛɡa a yoɡ aa kpeɡa tɛ Kooro Solomɔn. Seeba kooro waa ɛ haah konsɔɔhsoma waa kpɔa ka tɛ Kooro Solomɔn kan aa doa la, nomɛlbwa ta a dɔŋa ne balɛ ɡɛ bwa.

¹⁰ Kooro Hiram nɛra ne Kooro Solomɔn nɛra kaa kpɔ suuɡaswɛm ne dadɛɛɡa ane, ne bwedɛɛɡa a bwa yoɡ aa kpeɡa le Ofir harɛ ta ba.

¹¹ Kooro Solomɔn kpɔ dadɛɛɡa la ɛ bela waa kpɔa teeh dɛɛ kaa Korowii Dea la ta, ne koodem bela, dɛ kpɔ ane ɛ janjelare ne kwaa bwa soo siwi baa dɛ ɛ ane yela. Ba ta ɡɛ daa la dɔŋa ne Juda harɛ ta balɛ kpa bwa, hale ba le fini.

¹² Kooro Solomɔn berɔ tɛ Seeba kooro waa ɛ haah komɛlbwa waa dɛ nyin, o tɛo anɔ la waa kpɔa ba tɛo, asɛ a ɡwaa. Ate, haŋkooro ne o nɛra baa ja o nɛɛ berɛ kaa Seeba harɛ ta.

Kooro Solomɔn kondɔɔh

¹³ Suuɡaswɛm Kooro Solomɔn aa dɛ dɔ benanyoa bɛlbwa la tɔɡre ɛɛ ɛ kilore kaɡboŋa fifraanɛ dɛ anɛ, lafraanumɛl fifraanaarɛ dɛ anaarɛɛ.

¹⁴ Anɔ la waa dɔa dɛɛ le bonadiire ne kon-yoɡra ne Arab harɛ koranar, dɛ nomonome baa chɔ harɛre nyoo be te ta jae.

¹⁵ Kooro Solomɔn loɡɛ kwaa baa kpɔa dɛɛ tɔ ɡbemɡbe laa ta anjena lafraanɛ, suuɡaswɛm aa bɔle bɛlbwa ta tɔɡre lɔ kilore anuanɛ,

¹⁶ O berɔ ɛ kwaa baa kpɔa dɛɛ tɔ ɡbemɡbe laa ta anjeɡre lafraatoro, suuɡaswɛm aa bɔle bɛlbwa ta tɔɡre lɔ kilore atoro. Asɛ o ɡel ba kpɔ kwaa la ka do o koodem, dejen bɛl baa dɛ yerɔ Lɛbanɔn Kɔr Bini Koodem la bini.

¹⁷ Kooro Solomɔn berɔ ɡel ba kwaa kookara waa kana. Ba kpɔ bala nyen ɛ o pera, asɛ o kabora ɛ suuɡaswɛm tenten ba kpɔ ɛ dawɛ o ta.

¹⁸ Ba ɛ bɔre anumɛl, bela waa che teeh kaa so kookara la ta. Ba ɛ komɛl waa do kɛ karajeɡa, dɛ kpɔ suuɡaswɛm ɛ o ta, o kpɔ nakpale dɛɛ chɔŋɛ o ta. Dɛ ɛ bela waa kpɔ nɔɔra dɛɛ dawɛ kara la ta, baŋne anɛ. Dɛ berɛ ɛ kwaane aa le nyujentena anɛ a che kara la jwɛh.

¹⁹ Ba ɛ nyujentena fi dɛ anɛ chɔŋre kwaa waa cheɡɛ a ta teeh kaa so kookara la ta. Ba ta ɡɛ kookara nɔ dɔŋ bɛlbwa ɛɛ ken tɛ koojen bɛlbwa harɛ nɔ ta bwa.

²⁰ Kooro Solomɔn numoli bwa, suuɡaswɛmee ba kpɔ ɛa. Laala aa lɔ Lɛbanɔn Kɔr Bini Koodem ɡe, suuɡaswɛm tenten nee ba kpɔ ɛ a bwa. Ba ta suuɡapoŋa kpɔe ɛ komɛlbwa, dɛkalkɛŋɔ Kooro Solomɔn bere saŋ la, dɛ suuɡapoŋa ta komɛlbwa ɛɛ, dɛ baa ane wobɛlbwa ɛ.

²¹ Dɛ kooro dɔ stiimaere baa kpɔa dɛɛ di bona mpo ta a ja Kooro Hiram kwaa baa kpɔa dɛɛ ɛ toma la ta. Bene atoro bɛlbwa a dɛ ba suuɡaswɛm ne suuɡapoŋa ne bala nyena, dɛ ɡbɛɛne bwa soo siwi ne.

²² Dɛ Kooro Solomɔn dɔ suuɡa ne wejema dɛ ɡwaa kooro bɛlbwa harɛ nɔ ta.

²³ Koranar bwa yon dɛɛ nyin o be bala dɛ́ ba no wejemwaa Korowii aa tɛo la.

²⁴ Benanyoa bɛlbwa ba dɛ ba o be naa, koŋkɛɛla aa ɛ kwaa baa kpɔ suuɡapoŋa ne suuɡaswɛm ɛa, ne batakaani ne dɔmkwa ne konsɔɔhsoma ne jaɡre, dɛ keeɡoree ba kpɔ baa tɛo.

²⁵ Dɛ Kooro Solomɔn dɔ jaɡre deene kaɡboŋa anaarɛ, ne torɔɡore baa vɔwa pɛl jaɡre. Dɛ o dɔ jaɡre baa dɛ la ane laa kaɡboŋa fi dɛ anɛ ɡe. Ane lɔ Jerusalam asɛ a kabora ɡe do bwɛjena ane ta.

²⁶ Dɛ onee nomoa koranar baa le Yufretis Moo ta kaa Filisti tena harɛ ta, dɛ ba le Ijipt harɛ jwɛh ta bwa nɛ.

²⁷ O bere saŋ, dɛ suuɡapoŋa ta nyae Jerusalam kɛŋɔ bwea aa wola nyae nɔ. Peleme daa baa kpɔa dɛɛ do deene ɡe bu kɛŋɔ, fiɡ daa aa cheɡɛ Juda harɛ deŋɡarere lɔɡre ken.

²⁸ Kooro Solomɔn bonadiire yon ka yawɛ o jaɡre dɛɛ le Ijipt harɛ ne harɛre ane ɡe ta.

Kooro Solomɔn seo

²⁹ Waa ane ɡe Kooro Solomɔn aa ɛa o kora dii saŋ, le mumpar ba a jaɡa, ba chwera do Korowii Keame Netan tɔn bini, ne Silo Te Ahija, dɛ Ido waa dɛ na chaahna waa tɔne bini. Ba berɔ chwerɛ Nɛbat bibaa Israel Kooro Jɛroboam ɡe bwara waa do a bini.

³⁰ Kooro Solomɔn di kora Israel harɛ ta Jerusalam bene fifraanaarɛ.

³¹ A habɔɔ, Kooro Solomɔn sewɔ ka pu o naawa, asɛ ba huɡo Jerusalam, o mɛɛ Kooro Devid Bwɛjen ta, asɛ o bibaa Rɛhoboam ba chiɡ o naa ta di kora.