2 Webena 8 - mzwDBL

Kooro Solomɔn waane waa wona ɛ

¹ Bene fifraanɛɛ Kooro Solomɔn kpɔ do Korowii Dea ne o koodem la.

² Kooro Solomɔn kwaarɔ vɔrɔwe bwɛjena Kooro Hiram aa kpɔa tɛo la, dɛ ɡel Israel tena ka so a ta.

³ Kooro Solomɔn kaa yo dɛ lɛ bwɛjen Hamat Soba,

⁴ dɛ ka vɔrɔwe bwɛjen Tadmɔ waa lɔ pua hɛŋle ɡbo harɛ ta, dɛ bwɛjena aa lɔ Hamat harɛ waa dɛ cheɡ laala a bini bwa.

⁵ O berɔ kwaa vɔrɔwe bwɛjena Bɛt Hɔrɔn waa chɔ nyunduabɔr, ne Bɛt Hɔrɔn waa chɔ harɛbɔr. O ma danjwɛɛre bara, dɛ do ɡbeni a nyoo, dɛɛ kaɡra bune ne,

⁶ ne bwɛjen Baalat ne bwɛjena waa dɛ cheɡ laala a ta bwa, dɛ bwɛjena o jaɡre ne kwaa aa do kɛ torɔɡore ba vɔwɛ dɛɛ pɛl jaɡre aa lole. O berɔ ɡel ba ma komɛlbwa waa dɛ nyin Jerusalam, ne Lɛbanɔn dɛ harɛ waa dɛ di kora o ta bwa.

⁷ Nɛra baa kaa dɛ le Hiti ne Amɔre, ne Pɛrɛs ne Hivi, dɛ Jebus tena bini, ba ta Israel tena ɛɛ la,

⁸ ba naanaree kaa Israel tena aa wola kpoorɛ, ɡɛ saŋ baa doŋi nɛra baa tɔ sie so bela la. Banee Kooro Solomɔn ɛɛ ba yoma baa ɛ tomkpeɡa Israel harɛ ta ba le fini.

⁹ Kɛ Israel tena la te, Kooro Solomɔn ta bɛlbwa kpɔe ɛ yom. Bane ɛ laa tena dɛ yo dɛɛ tɛo, dɛ ɛ nomonnyuune, laa sitɔɔla ne nomonome baa chɔ kwaa aa do kɛ torɔɡore, dɛ banɔ la baa dɛ so jaɡre ta bwa nyoa.

¹⁰ Kooro Solomɔn nomonome baa dɛ nyiŋi nɛra baa dɛ ɛ tomkpeɡa nɛɛ la lɔ lafraanɛ fifraanue.

¹¹ Ijipt kooro bihaah Kooro Solomɔn aa moo la, le Jerusalam waa ɛ Kooro Devid Bwɛjen la ta, dɛ ba koodemfale o jaa Kooro Solomɔn aa doa tɛo ta. O ŋɔ o haah ta chɛ kɛ ó so Kooro Devid koodem, dɛkalkɛŋɔ bobɛlbwa baa kpɔ Korowii Ne Nɛwɛnyina Fɔo Daka la jo la do ɡoroŋ.

¹² Kooro Solomɔn kpoo kwaa dɛ fuah ɛ sarahare tɛ Korowii, saraha kon baa mao cheɡ Korowii Dea pato la sie,

¹³ ɡɛ Mosis aa doa ŋɔ baa ɛ sarahare tɔpere bɛlbwa, Ona Tɔpera ne Korobifala Tɔpejena. Dɛ Tɔpejena atoro ane kɛŋɔ, Paanoo Iisi Aa Wola Toole A Ta Tɔpejen, ne Koo Kondikwaa Koma Tɔpejen, dɛ Kukure Tɔpejen dii ta la.

¹⁴ O teŋɛ waa o mɛɛ Kooro Devid aa ɛa la ta. O bɔne toma aa lɔ Korowii Dea bela tɛ sɔfore la ne Lewi dea tena la, asɛ Lewi dea tena la ɛɛ cha sɔfore la baa ɡo yela, dɛɛ ɛ ba toma ɡe. O le nɛra baa dɛ daah doonyoo la, dɛ bɔne ba bini baa nyiŋi doonyoo la ta, dɛkalkɛ dɛ ɡɛɛ Korowii nɛn Kooro Devid do ba.

¹⁵ Ba ta waa kooro aa do ba a ta ŋɔ, ba ne sɔfore la ne Lewi dea tena ta leɛ, hale deene baa dɛ cheɡ laala a yoɡ aa kpeɡa a bini waa bwa.

¹⁶ Kooro Solomɔn toma waa maɡla bil ŋɔ wɛɛ ɛo la, ba ɛ a bwa tonɛ kɛrɛdɛ ken, le awola baa pa Korowii Dea la mun, hale dɛ ba tonɛ.

¹⁷ Ate, Kooro Solomɔn la Eseɔn Gɛba ne Elat aa ɛ leebɔɔ bwɛɛre, dɛ do Edom harɛ Mposwɛm nyoa.

¹⁸ Kooro Hiram tomɛ o nɛra baa jemɛ mpo nee toma wa, ba kpɔ stiimaere. Ba ne Kooro Solomɔn nɛra pɛ dɛɛ ɛ toma mpo ta. Ba la Ofir harɛ ta, dɛ ka lɛ suuɡaswɛm a tɔɡre aa ɛ kilore kaɡboŋa fi dɛ anue lafraatoro, ba tɛ Kooro Solomɔn.