2 Webena 7 - mzwDBL

Korowii Dea kpɔe dɛ́ do o nɔn ta

¹ Kooro Solomɔn aa soŋe Korowii tonɛ la, nii le nyundua dɛ ba fuh kwaa baa kpoora ne kwaa bwa soo siwi baa kpɔa dɛɛ ɛ sarahare la, asɛ Korowii jirima su o Dea la bini bwa.

² Korowii jirima aa su Dea la bini nomanta, sɔfore la ta wone jo o bini.

³ Israel tena la bwa aa na nii la ne Korowii jirima la, ba ɡuŋo, dɛ kpɔ sie pi harɛ bobɛl baa mao bwea ne o ir nyundua, dɛɛ kpɛɛ Korowii ŋɔ, “Korowii wer, o nyina waa dɛ nyin yaa lole saŋ bɛlbwa dɛɛ la.”

⁴ Belaa Kooro Solomɔn ne Israel tena baa ja o nɛɛ la bwa kpɔ kwaa ɛ sarahare Korowii sie bela.

⁵ Kooro Solomɔn kpɔ nae kaɡboŋa fifraanɛ dɛ anɛ, ne peera dɛ boohna kaɡboŋa lafa fifraanɛ ɛ deŋnesɔɔhna sarahare tɛ Korowii. Gɛɛ Kooro Solomɔn ne Israel tena bwa ɛ, dɛ kpɔ Dea la do Korowii nɔn ta.

⁶ Baa taa kpɔ Dea la dɛɛ do Korowii nɔn ta la, sɔfore kaa che ba chebɔr, Lewi dea tena ka che ba chebɔr, dɛ kpɔ kwaa baa kpɔa dɛɛ hɛlɛ Kooro Devid aa kpɔa tɛ la, dɛ ɡo kpɛɛra yela dɛɛ kpɛɛ Korowii ŋɔ, “O nyina waa dɛ nyin yaa lole saŋ bɛlbwa dɛɛ la.” Gɛ Kooro Devid aa do ba la. Sɔfore la sie chaɡɛ Lewi dea tena dɛɛ hoh bɛle, asɛ nɛra la kabora ɡe che.

⁷ Kooro Solomɔn le Korowii Dea dembaah sie la cheɡ o do ɡoroŋ tɛ Korowii. Belaa o kpo kwaa dɛ fuah, dɛ ɛ mea sarahare, dɛ fuh ola la noorare ɛ deŋnesɔɔhna sarahare, dɛkalkɛ saraha kon baa kpɔ ayaawa ɛo la aa kanɛ kɛ a ɡɛ kwaa la bwa won jo o ta.

⁸ Kooro Solomɔn ne Israel tena la bwa di Kukure Tɔpejen la tɔpera anuanɛ. Nɛnlaa tenten le ŋwɛnɛ bɛl waa chɔa kaa bwɛjen Hamat waa lɔ weekaŋle nyunduabɔr, ne Ijipt harɛ jwɛh ta waa lɔ weekaŋle harɛbɔr dɛ ba.

⁹ Ba di tɔpera anuanɛ dɛ kpɔ kon baa kpo kwaa ɛ saraha o ta la do Korowii nɔn ta, dɛ kpɔ tɔpera anuanɛ di tɔpejen la ɡe. Tɔpere waa ka mun la, ba kpɔ tɔpejen dii la ba a jaɡa.

¹⁰ Tɔ aa pera la, korobie anuanɛ la tɔpera fifraanɛ dɛ atoro wee la, Kooro Solomɔn tɛ bɛlbwa ŋwɛnɛ o kaa o bwɛ. Ba sie lɛ andɛɛɡa Korowii aa sweera tɛ o nɛra Israel tena, ne Kooro Devid dɛ Solomɔn la wa.

Korowii kpɔ o te baɡle Kooro Solomɔn ja

¹¹ Kooro Solomɔn aa do Korowii Dea la ne koodem, dɛ tonɛ anɔ la waa dɛ nyin bwa la,

¹² Korowii ba o be deera ta jwaana dɛ ba ŋɔ o be ŋɔ, “N no he wesoŋa la, n sɛoh kɛŋɔ Dea nɔ binii bá kpo kwaa ɛ sarahare dɛɛ tɛ mɛ.

¹³ Dɛ n ta ɡelɛ bwaala nɛ, kɛɛ dɛ ɡel tontombɛ ba chɔɡ koo kwa, kɛɛ dɛ kpɔ weechɔɡa ba ta n nɛra nɛ,

¹⁴ asɛ ba charɛ liire dɛ le wechɔɡa baa dɛ ɛ la ta, dɛ wi noo mɛ naa, mɛɛ no ba bee le nyundua, dɛ́ kpɔ ba wechɔɡa kɛ ba dɛ́ berɛ ɡel ba harɛ la do wer.

¹⁵ Mɛɛ cheɡ deŋnee dɛɛ no wesoŋa baa dɛ ba a ne Dea nɔ bini,

¹⁶ dɛkalkɛ n le Dea nɔ cheɡ dɛ ɡel o do ɡoroŋ, ásɛ baa tom mɛ o bini saŋ bɛlbwa dɛɛ la. Mɛɛ dɛɛ daahno n sie do o ta.

¹⁷ Dɛ hen Solomɔn tom mɛ kɛrɛdɛ, dɛ teŋɛ me Mmarare ne waa maa doe a ta, ɡɛ he mɛɛ Devid aa ɛa la aa,

¹⁸ amɔ te mɛɛ ɡeloo kora haa dɛ di Israel tena nɛɛ la che kiŋkiŋ saŋ bɛlbwa, ɡɛ maa baɡɛ he mɛɛ Devid nyoa ŋɔ, ‘He naanaree dɛɛ ba Israel tena nɛɛ nyiŋa saŋ bɛlbwa,’ la.

¹⁹ Kɛ dɛ he ne he nɛra berɛ habɔɔ kpo mɛ, dɛ vɛh me Mmarare ta teŋa, dɛ kaa tomɛ voɡa ane dɛɛ ɡuŋa aa,

²⁰ ate mɛɛ le Israel tenaa le harɛ maa kpɔa tɛɛ ba nɔ ta, dɛ vɛh n Dea maa lea cheɡ dɛ ɡel o do ɡoroŋ ŋɔ ó ɛ bela baa dɛɛ tom mɛ nɔ ta. Ásɛ Israel tena berɛ wesoma nɛra, harɛ nɔ ta bwa.

²¹ Dea nɔ dɛ ba kuuɡa chɔ, ásɛ nomɛlbwa waa teŋe ba kaa la nyoa kpo o bwara yɔr o ŋɔ, ‘Bɔkwa waa ɡela Korowii ɛ harɛ nɔ ne Dea nɔ ken?’

²² Ásɛ nɛra chaŋe ŋɔ, ‘Baa le Korowii baa dɛ tomɔ, o le ba naawa ne Ijipt harɛ ta habɔɔ, dɛ berɛ kaa yarada voɡa ane dɛɛ toma la waa Korowii kpɔ ɡɛ wekpeɡa nɔ ta ba nɛɛ la.’ ”