2 Webena 5 - mzwDBL

¹ Kooro Solomɔn aa ɛ Korowii Dea toma bɛlbwa tonɛ la, o kpɔ suuɡapoŋa ne suuɡaswɛm ne laala bwa o mɛɛ Kooro Devid aa kpɔa tɛ Korowii la ka cheɡ deene baa dɛ cheɡ laala a yoɡ aa kpeɡa a bini, Korowii Dea la bini.

Korowii Ne Nɛwɛnyina Fɔo Daka Korowii Dea bala

² Ate, Kooro Solomɔn yerɛ Israel nomonome, ne nomonome baa chɔ ba deene nyoo, ne nomonome baa chɔ ba lolanar nyoo bwa ba cheme o sie Jerusalam, kɛŋɔ bá la ka kpɔ Korowii Ne Nɛwɛnyina Fɔo Daka la le Saayɔn, Kooro Devid Bwɛjen ta, ba cheɡ Korowii Dea.

³ Dɛ ba bwa balɔ dɛ ba cheme Kooro Solomɔn sie Kukure Tɔpejen dii saŋ, korobinuanɛ ta.

⁴ Israel nomonome la bwaa baa cheme la, Lewi dea tena la kpɔ Korowii Ne Nɛwɛnyina Fɔo Daka la,

⁵ dɛ berɛ kpɔ Korowii Dea Cheremibɔr, ne kwaa aa do ɡoroŋ dɛ do o bini la bwa ba cheɡ Korowii Dea la bini. Lewi dea tena baa ɛ sɔfore laanee cheɡa ba,

⁶ asɛ Kooro Solomɔn ne Israel tena baa chema la bwa che Korowii Ne Nɛwɛnyina Fɔo Daka la sie, dɛɛ kpoo peera ne nae baa wola won kura ɛ saraha tɛ Korowii.

⁷ Asɛ sɔfore la kpɔ Korowii Ne Nɛwɛnyina Fɔo Daka la ka cheɡ o Dea la bini, Boɡoroŋ Tenten bela, Kerobim la kena lɔɡre.

⁸ Kerobim la kena bɔle bela Korowii Fɔo Daka la aa cheɡa la bwa, dɛ tɔ o ne daa baa kpɔa suuɡi o keŋkeŋni dɛɛ cheo bwa ta.

⁹ Daa aa suuɡi o ta la jaŋne nomanta, dɛ nɛn cheɡɛ Korowii Dea la bini, Boɡoroŋ Tenten bela aa, o dɛ naa. Haa won che bobɛlbwa ɡe dɛ naa, a ta lɔ bela ba le fini.

¹⁰ Komɛlbwa toole Korowii Ne Nɛwɛnyina Fɔo Daka la bini ka ja bwepɛle anɛ Mosis aa kpɔa teɡli o bini Sinai Bwejen ta, bela Korowii ne Israel tena aa fɔwɛ fɔo ɡɛ saŋ baa le Ijipt harɛ ta la.

¹¹ Ate, sɔfore la le Boɡoroŋ bela. Sɔfore baa lɔ bela la sɔ ba doŋa bɛlbwa ta Korowii be pera, peɡra toole o dɔŋ ne o dɔŋ baah.

¹² Dɛ Lewi dea yelɡoola baa ɛ Asaf ne Heman ne Jedutun nɛra, ne ba bibaala dɛ lolanar cheɡɛ saraha kon la wee leebɔr pera. Dɛ do laala baa kpɔ yapondɛɛɡa nyara, dɛɛ lɔ kwaa anɛ ane baa kpɔ ayaawa ɛa dɛɛ hɛlɛ ne janjelare, asɛ sɔfore lafa fifraanɛ ja ba nɛɛ dɛɛ hoh bɛle.

¹³ Bɛlhoohla la ne yelɡoola la bwa pɛo, dɛ kpɔ tabeŋkpoŋ ɡo yela kpɛɛ dɛɛ jam Korowii. Asɛ bɛlhoohla ne nɛra baa dɛ lɔ kwaa anɛ ane baa kpɔ ayaawa ɛa dɛɛ hɛlɛ, dɛ kwaa bwa soo siwi ɡe kpɔ ɡo yela kpɛɛ Korowii ŋɔ, “Korowii wer, o nyina waa dɛ nyin yaa lole saŋ bɛlbwa dɛɛ la.” Ate, bam ba tɔ Korowii Dea la ta ɡɛ saŋ sɔfore la aa dɛ le bela la.

¹⁴ Sɔfore la ta wone ɛ ba toma, bam waa baa tɔ Korowii Dea la bini la wa, asɛ Korowii jirima do Dea la bini bwa.