2 Webena 36 - mzwDBL

Juda Kooro Jehoahas

¹ Juda harɛ tena lawɛ Kooro Josia bibaa Jehoahas, dɛ fuɡe noo do o nyu ta, o chiɡ o mɛɛ naa ta, dɛ di kora Jerusalam.

² Kooro Jehoahas di bene fifraanɛ dɛ atoro mɔɔ dɛ di kora Juda harɛ ta. O soɡe Jerusalam di kora korobie atoro.

³ Ijipt Kooro Neko ir Kooro Jehoahas kora ta, asɛ dɛ ɛɡre Juda tena lɛ toɔ suuɡapoŋa a tɔɡre aa ɛ kilore kaɡboŋa atoro lafraanaarɛ, ne suuɡaswɛm a tɔɡre aa ɛ kilore fifraatoro dɛ anaarɛ.

⁴ Ijipt Kooro Neko kpɔ Kooro Jehoahas nime Eliakim chiɡ o dɔɔ naa ta, o di kora Jerusalam ne Juda harɛ. Dɛ kpɔ Kooro Jehoahas kaa Ijipt harɛ ta, dɛ charɛ Kooro Eliakim sɔn la, dɛ pao Jehoiakim.

Juda Kooro Jehoiakim

⁵ Kooro Jehoiakim di bene fifraanɛ dɛ anue mɔɔ dɛ di kora Juda harɛ ta. O soɡe Jerusalam di kora bene fi dɛ beŋkpoŋ. O ɛ wechɔɡa dɛ jo Korowii waa dɛ tomɔ nɛ.

⁶ Asɛ Babelɔn Kooro Nebukadnesa kpɔ o laa tena dɛ ka lɛ Juda harɛ dɔɔh, dɛ lawɛ Kooro Jehoiakim dɛ doo ayaawa jɔɡrɔre, dɛ kpɔɔ kaa Babelɔn harɛ ta.

⁷ Kooro Nebukadnesa berɔ pa laala a yoɡ aa kpeɡa, dɛ do Korowii Dea la kaa Babelɔn ka do o koodem bela.

⁸ Wobɛlbwa Kooro Jehoiakim aa ɛa ne kii wa, dɛ wechɔɡa waa ɛa bwa, ba chwera do Israel ne Juda Koranar Waa Tɔn bini. Asɛ o bibaa Jehoiachin ba chiɡ o naa ta dɛ di kora.

Juda Kooro Jehoiachin

⁹ Kooro Jehoiachin di bene fi dɛ anuatoro mɔɔ dɛ di kora. O soɡe Jerusalam di kora korobie atoro dɛ tɔpera fi. Kooro Jehoiachin ɡe ɛ wechɔɡa dɛ jo Korowii nɛ.

¹⁰ Benanyoa aa chema la, Kooro Nebukadnesa ɡelɔ ba ba lawɛ Kooro Jehoiachin kaa Babelɔn harɛ ta, dɛ pa kondɛɛɡa a yoɡ aa kpeɡa dɛ do Korowii Dea ja kaa. O kpɔ Kooro Jehoiachin naara Sedekia chiɡ o naa ta, o ɛ Juda harɛ ta kooro, dɛ so Jerusalam.

Juda Kooro Sedekia

¹¹ Kooro Sedekia di bene fifraanɛ dɛ beŋkpoŋ dɛ di kora. O soɡe Jerusalam di kora bene fi dɛ beŋkpoŋ.

¹² Kooro Sedekia ɛ wechɔɡa dɛ jo Korowii nɛ, o ta o deŋne pwɛrɛ dɛ no Korowii keame Jeremia waa Korowii aa cheɡɛ o nɛɛ dɛ bol la.

Jerusalam paɡra wa

¹³ Kooro Sedekia berɔ ɛ Kooro Nebukadnesa waa ɡela o ŋwɛɛ Korowii sɔn ta ŋɔ, wɛɛ kpɔ o tenee do o lɔɡa la deŋnekpeɡ. O taŋ deŋne, o ta o liire charɛ dɛ ba Korowii Israel tena aa dɛ tomɔ la be.

¹⁴ Anɔ la aa bera ja laanee kɛŋɔ, Juda harɛ nomonome ne sɔfore, dɛ bela tena teŋɛ harɛre aa bar ba cheme kii we-ɛɛla Korowii aa kia ta, dɛ kaa tomɛ voɡa. A che a ta, ba kpɔ doŋa kah Korowii Dea Korowii ɡbaɡba aa ɡela o do ɡoroŋ Jerusalam la.

¹⁵ Korowii ba naawa aa tomɔ la cheɡɛ o keamere nɛɛ bol waa baɡ ba keraŋwɛnɛ bwa, dɛkalkɛ o dɔ tedoma tɛ o nɛra ne o Dea la.

¹⁶ Kɛ ba nyiŋi keamere la nyubaah, dɛ mam ba, dɛ vɛh o waa la ka tel kɛŋɔ Korowii baah aa di o nɛra nɛɛ kohona, baa wola won le a nyoa kpa.

¹⁷ Anomanta, Korowii ɡelɔ Babelɔn Kooro Nebukadnesa ba yoo ba, dɛ kpo bonɔmbie baa lɔ Korowii Dea keri ne. Ba ta bonɔɔ kɛɛ tolo, banjena kɛɛ nomɛlbwa waa hwɛɛhra ɡelɛ. O kpɔ ba bwa do Kooro Nebukadnesa nɔn ta.

¹⁸ Babelɔn Kooro ɡelɔ ba pa laala aa lɔ Korowii Dea, ne anɔ la a yoɡ aa kpeɡa, dɛ do deene baa dɛ cheɡ laala a yoɡ aa kpeɡa a bini Korowii Dea, dɛ anɔ la aa lɔ kooro ne o nomonome be bwa, kɛŋɔ laa ta kwaa kaa Babelɔn harɛ.

¹⁹ O ɡelɔ ba fuh Korowii Dea la, dɛ kuuɡi danjwɛɛ waa bar Jerusalam la, dɛ fuh kooderemi bwa ne komɛlbwa a yoɡ aa kpeɡa bwa.

²⁰ Nɛra baa kaa waa wola ban kpoorɛ la, o laɡ ba kaa bojaŋ harɛ Babelɔn, ba kaa tomɛ o ne o bii dɛ ka tel kɛŋɔ harɛ bɛl baa dɛ yerɔ Pɛɛsea aa baa ir dɛɛ di kpeɡri.

²¹ Anee ɡela waa Korowii aa cheɡɛ o keame Jeremia nɛɛ bol la ɛ kpela. O ŋɔ, “Harɛ la ɛɛ chɔɡoo, dɛ́ chɔ kɛ dimɡbia bene fifraanuanɛ baa wola won parɛ o ta.”

Koojen Saeros berɔ ɡel Juda tena ba Jerusalam

²² Koojen Saeros baa di kora Pɛɛsea harɛ ta, o kora dii benanyoa beŋkpoŋ ta la, Korowii ɡelɔ waa waa cheɡɛ o keame Jeremia nɛɛ bol la ɛ kpela. O ɡelɔ Pɛɛsea harɛ Koojen Saeros chwerɛ tɔne kaa o harɛ bwa ta ŋɔ,

²³ “Waa men Pɛɛsea Koojen aa dɛ bol laanee kɛŋɔ, ‘Korowii Waa Dɛ Di Kora Nyundua laanee cheɡ mɛ kora harɛre nɛra bwa nɛ, dɛ berɛ lee mɛ ŋɔ ń ma o Dea tɛo Jerusalam waa lɔ Juda harɛ ta. Taraken, hé nɛra haa dɛ tomɛ Korowii bwa ir kaa bela, Kórowii haa dɛ tomɔ ja he nɛ.’ ”