2 Webena 35 - mzwDBL

Kooro Josia Galekaa Tɔpejen dii

¹ Kooro Josia di Galekaa Tɔpejen la Jerusalam Korowii sɔn ta, dɛ kpo pebie waa kpɔa di tɔpejen la korobiloɡle tɔpera fi dɛ anaarɛ ta.

² O kpɔ tomare sɔfore la aa ɛ do ba nɔn ta, dɛ do ba ɡbemba ŋɔ bɛlbwa ɛ o toma kɛrɛdɛ Korowii Dea bela.

³ O ŋɔ Lewi dea tena baa laa doŋa bɛlbwa kpɔ ba nɛɛ, dɛ le ba te cheɡ tɛ Korowii dɛɛ ɛ toma o Dea, dɛɛ baɡle nɛra o Mmarare la be ŋɔ, “Hé kpɔ Korowii Fɔo Daka waa do ɡoroŋ la ka cheɡ Korowii Dea Kooro Devid bibaa Kooro Solomɔn aa doo la bini. He bɛ che dɛɛ ɡaaɡe kpa, dɛɛ tomɛ Korowii ne o nɛra Israel tena.

⁴ Hé ka che he chebɔra Korowii Dea la bini denaa ta, ɡɛ Israel Kooro Devid ne o bibaa Kooro Solomɔn aa bɔne tomare tɛ heya, Korowii Dea bela la.

⁵ Hé bɔne he bini, dɛ́ che Dea la bini, ásɛ dɛ won dɛɛ cha lolanar bɛlbwa baa lɔ bela Israel tena la bini.

⁶ Hé kpoo Galekaa Tɔpejen pebiiri la, dɛ́ sɔ he doŋa ta, dɛ́ do ɡoroŋ Korowii be pera, ásɛ dɛ kwaa saraha kwaa la tɛ he bala la, ásɛ ba won dɛɛ teŋɛ waa Korowii aa cheɡɛ Mosis nɛɛ dɛ bol la ta.”

⁷ Kooro Josia lawɛ peera ne boohna kaɡboŋa fifraatoro, dɛ nae kaɡboŋa atoro tɛ nɛmpɛɛne la ŋɔ bá kpɔ ɛ Galekaa sarahare.

⁸ Kooro nomonome ɡe le ba bambile ta kpɔ kwaa tɛ nɛra la ne sɔfore dɛ Lewi dea tena. Asɛ Sɔfonomoa Hilkia ne Sekaria dɛ Jehiel baa ɛ nomonome, dɛɛ nyiŋi toma aa lɔ Korowii Dea la ɡe le ba bambile ta, dɛ tɛ nɛra la pebiiri ne boohna kaɡboŋa anɛ lafraanumɛl, dɛ nabala lafraatoro ŋɔ bá kpɔ ɛ sarahare Galekaa Tɔpejen la ta.

⁹ Konania ne o nimanar Sɛmaya ne Nɛtanɛl, ne Hasabia ne Jeyɛl dɛ Josabad, ba bwa aa ɛ Lewi dea tena nomonome la ɡe lawɛ pebiiri ne bombiire kaɡboŋa anue, ne nabala lafraanue tɛ Lewi dea tena la ŋɔ bá kpɔ ɛ Galekaa Tɔpejen sarahare la.

¹⁰ Baa ɛ wobɛlbwa tonɛ, dɛ pa Galekaa Tɔpejen la dii mun la, sɔfore ne Lewi dea tena la kaa che ba chebɔra ɡɛ Kooro Josia aa ŋɔa la.

¹¹ Baa kpoo pebiiri ne bombiire la tonɛ la, sɔfore la kpɔ a chal merɛ kon baa ɛ saraha o ta dɛɛ tɛ Korowii la ta, asɛ Lewi dea tena la ɡe ɛɛ swea.

¹² Ba laa anɔ la baa fuah ɛ sarahare la kpɔ, dɛ bɔna denaa ta tɛ nɛra la, asɛ ba kpɔ ɛ saraha tɛ Korowii ɡɛ aa lɔ Mosis Tɔn bini la. Gɛ tentenee ba ɛ nabali la ɡe.

¹³ Lewi dea tena la wɔɔ Galekaa Tɔpejen ola la ɡɛ baa baɡla, dɛ daa anɔ la aa do ɡoroŋ la viine ne loɡa bwa soo siwi ne, dɛ bɔne ola la warane tɛ nɛra la bwa.

¹⁴ Anɔ habɔɔ, Lewi dea tena la yon kpɔ ola la ane, dɛ tɛ sɔfore baa ɛ Arɔn naanar sɔfore la ɡe, dɛkalkɛ jwaana bwaa sɔfore la yon so dɛɛ fuh saraha kwaa ne a noorare bɔra la. Gɛɛ Lewi dea tena la yon laa ba dibɔr kpɔ, dɛ laa anɔ la ɡe aa ɛ sɔfore baa le Arɔn luɡe ta dibɔr kpɔ tɛɛ ba.

¹⁵ Asaf naanar bane baa ɛ yelɡoola, yon ka che ba chebɔra, ɡɛ Kooro Devid ne Asaf ne Heman, dɛ kooro keame Jedutun aa do ba la. Nɛra baa dɛ daah doonyoo la ta chɛ kɛ bɛlbwa le kɛrɛ, dɛkalkɛ ba bala Lewi dea tena la daa Galekaa Tɔpejen kondikwaa la ane baa tɛɛ ba.

¹⁶ Anomanta, awola tɔpere la te, ba dɛ di Galekaa Tɔpejen la Korowii sɔn ta, dɛɛ fuh saraha kwaa kon baa ɛ sarahare dɛɛ tɛ Korowii la ta, ɡɛ Kooro Josia aa do ba la.

¹⁷ Israel tena baa lɔ bela la di Galekaa Tɔpejen la, ne Paanoo Iisi Aa Wola Toole A Ta Tɔpejen la tɔpera anuanɛ.

¹⁸ Le Korowii keame Samoɛl bere saŋ, ba ta Galekaa Tɔpejen waa do ken dii bwa. Gɛɛ Israel kooro bɛlbwa ɡe aa wola Galekaa Tɔpejen dii, kɛŋɔ Kooro Josia kon o ne sɔfore ne Lewi dea ne Juda ne Israel tena, dɛ Jerusalam tena nɔ dɔŋ dii bwa.

¹⁹ Kooro Josia aa di kora bene fi dɛ anuatoro taa ba di ɡɛ Galekaa Tɔpejen nɔ.

Kooro Josia Kora dii jaɡa

²⁰ Kooro Josia aa ɛ anɔ bwa, dɛ kwaa Korowii Dea tonɛ la, Ijipt Kooro Neko kpɔ o laa tena dɛ́ ka yo laa Kaakɛmes waa lɔ Yufretis Moo nyoa. Kooro Josia kpɔ o laa tena ka chem ba, dɛ yoo ba.

²¹ Kɛ Kooro Neko kpɔ kala tɛ Juda Kooro Josia ŋɔ, “Juda kooro, n ne he laa dɛɛ yo laa nɔ, n ne n dɔmaa mɛɛ ba dɛ́ ba yoo ba, asɛ Korowii ŋɔ ń ɛ warane, o cheɡɛ n mun ta, anomanta, bɛ men tɔŋle, ásɛ o ba kpoe.”

²² Ane a bwa, dɛ Kooro Josia ta dɛ nyin ó ka yo. O ta waa Korowii aa cheɡɛ Kooro Neko nɛɛ dɛ bol la ta teŋɛ, anomanta, o beɡre o te dɛ la ka yoo Meɡido harɛ waa chɔa kaa la ta.

²³ Baa dɛ yo la, Ijipt laa tena ta hɛm yaɡɛ Kooro Josia, asɛ o ŋɔ o bonɔɔna be ŋɔ, “Hé le n ne bonɔ kaa, ba do mɛ bol kohona.”

²⁴ Kooro Josia bonɔɔna lawɔ le o torɔɡo bini, dɛ kpɔɔ do onfale waa lɔ bela bini kaa Jerusalam. O sewɛ bela ba huɡo o naawa hoɡa ta, asɛ Juda ne Jerusalam tena bwa ɛ o lwe.

²⁵ Korowii keame Jeremia taa Kooro Josia wiile. Dɛ kpoŋe ba le fini haahna ne baala dɛ́ taa wiile, dɛ kpɔ dɛɛ lii Kooro Josia. Ba chwera do Israel tena Wiile Taara Tɔn bini a ɛ ba nawee wa.

²⁶ Wobɛlbwa Kooro Josia aa ɛa o kora dii saŋ, ne ɡɛ waa kpɔ o te tɛ Korowii ɡɛ aa lɔ Korowii Mmara tɔn bini,

²⁷ ne waa bwa waa ɛa le mumpar ba a jaɡa la, ba chwera do Israel ne Juda Koranar Waa Tɔn bini.