2 Webena 34 - mzwDBL

Kooro Josia di kora Juda harɛ

¹ Josia aa di kora dɛ o dɔ bene anuatoro. O soɡe Jerusalam dɛ di kora bene fifraatoro dɛ beŋkpoŋ.

² O ɛ waa aa too Korowii tea, o teŋɛ waa o nabaa Kooro Devid aa ɛa ta. O teŋɛ Korowii waa ta kɛrɛdɛ.

³ Kooro Josia aa di kora bene anuatoro la, dɛ o ta ɛ bonɔmbi, asɛ o pa mun dɛɛ tomɛ Korowii o nabaa Kooro Devid aa tomɔ la. Bene fi dɛ anɛ ta la, o pa mun dɛɛ chɔɡ bela Juda harɛ ne Jerusalam tena aa dɛ tomɛ voɡa, ne voɡ Asera dajaŋa ne voɡare baa sɛah ne anɔ la bwa aa jaa.

⁴ Kooro Josia ɡelɔ ba chɔɡ voɡ Baalre kwaa baa kpoo kwaa a ta dɛɛ ɛ sarahare, dɛ paɡre kwaa baa dɛ fuh daawiile a ta a bɛna la, dɛ kuuɡi Asera voɡare ne voɡare bwa soo siwi burbur ken, dɛ paa ka ta nɛra baa ɛ sarahare a ta mɔɔ dɛ serewe la ŋwama ta.

⁵ O ɡelɔ ba fuh kerekpoŋra baa soɡe voɡa ta hoɡa kwaa baa ɛ sarahare a ta la doa. Gɛɛ o ɛ dɛ laa doŋa bɛlbwa kpɔ le voɡa toma ne, Juda harɛ ne Jerusalam.

⁶ Gɛ tentenee o ɛ Manasɛ ne Efrem ne Simeon, dɛ Naftale deene harɛ bwɛjena aa paɡra bwa ta.

⁷ Kooro Josia ɡelɔ ba paɡre kwaa baa kpoo kwaa a ta, dɛ ɛ sarahare dɛɛ tɛ voɡare la, dɛ chɔɡ voɡ Asera dajaŋa Israel harɛ ta bobɛlbwa. O paɡre voɡare la mohooh ken, dɛ paɡre kwaa baa fuh konsɔɔhsoma a ta dɛɛ tɛ voɡare la ɡe, dɛ berɛ laa berɛ kaa Jerusalam.

⁸ Kooro Josia aa di kora bene fi dɛ anuatoro ta, dɛɛ nyin o laa doŋa bɛlbwa kpɔ harɛ la ne Korowii Dea la, o tomɛ Asalia bibaa Safan, ne harɛ nomoa Maaseya waa lɔ Jerusalam, dɛ Joahas bibaa Joa waa chwerɛ waa dɛɛ do tɔn bini ŋɔ, bá la ka kwaa Korowii waa dɛ tomɔ la Dea.

⁹ Ba la Sɔfonomoa Hilkia be, dɛ kpɔ suuɡa Lewi dea tena baa dɛ daah Korowii Dea doonyoo aa lɛa le Manasɛ ne Efrem deene tena, ne Israel tena baa kaa la be, ne Juda harɛ nɛra bwa, ne Bɛnjamen dea tena, dɛ nɛra baa lɔ Jerusalam tena be la ba tɛo.

¹⁰ Asɛ ba kpɔ do nɛra baa dɛ nyiŋi Korowii Dea kwaara ta la nɔn ta, ásɛ ba kpɔ bɔ tom-ɛɛra baa dɛ kwaa Korowii Dea la kem.

¹¹ Ba berɔ tɛ kapenta tena ne demamaala suuɡa ŋɔ bá kpɔ yawɛ daa ne bwea, dɛ́ kwaa deene Juda koranar aa ɡela a chɔɡ la.

¹² Tom-ɛɛra la ɛ toma kasinteŋ ne. Baala baa lee ba baa nyiŋi ba nɛɛ laanee, Lewi dea tena Jahat ne Obadia dɛ le Merari dea, ne Sekaria dɛ Mɛsolam ba ɡe aa ɛ Lewi dea tena dɛ le Kohat dea. Dɛ ba bwa dɔ kwaa baa kpɔa dɛ hɛlɛ wejema, dɛ kpɔ dɛɛ hɛlɛ kɛrɛdɛ.

¹³ Dɛ Lewi dea tena bane ɡe chɔ tom-ɛɛra nyoa, dɛɛ nyiŋi tom-ɛɛra bwa soo siwi nɛ, ba tomare ta. Ba bini bane chwerɛ waa dɛɛ do tɔne bini, bane ɡe chwerɛ webena aa chiɡa dɛɛ bil, bane ɡe ɛɛ daah Korowii Dea doonyoone.

Ba na Korowii Mmara Tɔn la

¹⁴ Baa laa suuɡa la dɛɛ kpɔ Korowii Dea bela baa cheɡa la, sɔfo Hilkia na Korowii Mmara Tɔn waa cheɡɛ Mosis nɛɛ dɛ kpɔ tɛ, o nyoɡre la.

¹⁵ Asɛ sɔfo Hilkia ŋɔ karake Safan waa chwerɛ waa dɛɛ bil la be ŋɔ, “N na Korowii Mmara Tɔn waa nyoɡra la Korowii Dea.” Asɛ o kpɔ tɔn la tɛ Safan.

¹⁶ Ate, Safan kpɔ tɔn la la Kooro Josia be dɛ ŋɔ, “N naa kooro, he nomonome ɛ wobɛlbwa haa kpɔa do ba nɔn ta kɛrɛdɛ.”

¹⁷ Ba kpɔ suuɡa aa lɔ Korowii Dea la do nɛra baa dɛ nyiŋi tom-ɛɛra la nɛɛ, ne tom-ɛɛra la nɔn ta.

¹⁸ Ate, Safan waa ɛ karake dɛ chwerɛ waa dɛɛ bil la, berɛ ŋɔ kooro be ŋɔ, “N naa, sɔfo Hilkia kpɔ tɔn bɛl tɛ mɛ.” Asɛ o che kooro sie bela kure tɔn la bini waa baɡlo.

¹⁹ Kooro Josia aa no Mmara Tɔn la bini waa la, o laa o batakaare kɛɛ, a baɡle kɛ o dɛ di suna.

²⁰ Buɡ la ta, kooro do sɔfo Hilkia ne Safan bibaa Ahikam, ne Maeka bibaa Abdɔn dɛ Safan waa ɛ karake, dɛ chwerɛ waa dɛɛ bil, dɛ o bonɔɔ Asaya be ŋɔ,

²¹ “Hé la ka bɔɔ le Korowii be tɛ n ne nɛra baa ka Israel ne Juda, tɔn nɔ baa ɡaaɡa dɛ ka nao nɔ wa. Korowii baah di n ne Juda harɛ nɔ ta nɛra bwa nɛɛ taeh, dɛkalkɛ ya naawa ta waa aa lɔ tɔn nɔ bini nɔ ta teŋɛ.”

²² Anee sɔfo Hilkia ne Ahikam ne Akbɔ ne Safan, dɛ Asaya la Korowii keame bɛl waa ɛ haah baa yerɔ Hulda be, dɛ ka bɔɔ le o be. Dɛ Korowii keame Hulda soɡe Jerusalam bampera bofale. O jaaree Tikva bibaa Salum, asɛ o nabaa sɔne Haahas. Onee dɛɛ nyiŋi Korowii Dea batakaarere ta.

²³ Korowii keame Hulda ŋɔ ba be ŋɔ, Korowii Israel tena aa dɛ tomɔ la ŋɔ, “Hé la ka ŋɔ Kooro Josia waa tomɛ heyaa la be ŋɔ,

²⁴ Korowii ŋɔ o dɛ ba Jerusalam nɛra deŋne tɛra, ɡɛ waa baa chwera do Juda kooro tɔn bini aa dɛ baɡle la,

²⁵ dɛkalkɛ ba vɛɛh mɛ dɛ ka fuh konsɔɔhsoma voɡa ta, dɛɛ muɡli n baah voɡa ba ɡbaɡba aa ɛa ne. N baah ɛɛ di ba nɛɛ bonɔ kohonaa, aa wola sɔɔh bwa.

²⁶ Hé ŋɔ Juda kooro waa tomɛ heyaa ŋɔ hé ka bɔɔ le Korowii be la be ŋɔ waa Korowii Israel tena aa dɛ tomɔ aa bola, waa waa noa dɛ le tɔn la bini laanee nɔ.

²⁷ Haa kure tɔn la dɛ no Jerusalam nɛra deŋnetɛra, he loo ku he kɛɛ he batakaare haa doa, dɛ ba he te ne harɛ dɛɛ wi nomanta, n no he wii haa wia la bwa.

²⁸ Anomanta, mɛɛ ɡeloo he sewɛ deŋnesɔɔhna ta ka pu he naawa. Haa deŋnetɛra kohona men Korowii aa dɛ ba a ne bala ba ta nɛra baa soɡe harɛ nɔ ta laanee na.” Asɛ toroma la ka ŋɔ waa la Kooro Josia be.

²⁹ Asɛ Kooro Josia yerɛ Juda ne Jerusalam nomonome bwa cheme.

³⁰ O ne Juda baala ne Jerusalam tena, sɔfore ne Lewi dea tena, le bechale nɛɛ ba kaa nomonjena bwa nɛɛ ba Korowii Dea. Asɛ kooro kure Korowii Ne Nɛwɛnyina Fɔo Tɔn waa nyoɡra ba nao Korowii Dea la, asɛ ba bwa no.

³¹ Kooro Josia cheɡɛ o koochebɔr pila bɛl jwɛh, o ne Korowii berɛ kwaa fɔwɛ fɔo ŋɔ wɛɛ teŋɛ Korowii nɛɛ, dɛɛ teŋɛ waa waa bola ne o Mmarare ta o bambile ne o liire bwa ne.

³² Asɛ o ɡel Jerusalam ne Bɛnjamen dea tena bwa baa lɔ bela ŋwɛɛ ntam ŋɔ, baa dɛɛ teŋɛ Korowii ba naawa aa tomɔ la fɔo la taa.

³³ Kooro Josia ɡelɔ ba le voɡa Korowii aa kia bwa ne Israel harɛ bwa ta, asɛ dɛ ɡel nɛra baa soɡe bela bwa tomɛ Korowii. Waa soɡe le la, o ta ɡelɛ ba vɛh Korowii ba naawa fa aa tomɔ la toma bwa.