2 Webena 33 - mzwDBL

Kooro Manasɛ di kora Juda harɛ

¹ Kooro Manasɛ aa baa di kora Juda harɛ ta la, dɛ o di bene fi dɛ anɛ. O soɡe Jerusalam di kora bene fifraanue dɛ anue.

² O ɛ wechɔɡa dɛ jo Korowii nɛ, dɛ teŋɛ harɛre nɛra baa tɔ sie ba so bela, Korowii aa doŋ ba le ba harɛre ta tɛ Israel tena we-ɛɛla baa ɛa Korowii kia la ta.

³ Kooro Manasɛ kwaarɔ cheɡ voɡa o mɛɛ Kooro Hɛsɛkea aa paɡra bela voɡtoroma aa dɛ tomɛ la, dɛ berɛ ɛ kwaa baa dɛ ɛ saraha a ta tɛ voɡ Baal waa ɛ baa, dɛ paaɡe voɡhaah Asera dajaŋa, ɡɛ Israel Kooro Ahab fa aa ɛa la. O berɔ tomɛ kwaa aa lɔ nyundua kɛŋɔ wee ne korobie, dɛ weweela bwa.

⁴ O ɛ kwaa voɡtoroma aa dɛ ɛ saraha a ta Korowii Dea, bela Korowii aa ŋɔa belaa a chɛ kɛ baa tomɔ saŋ bɛlbwa la.

⁵ Korowii Dea dembaahna anɛ la bini la, o ɛ kwaa baa dɛ ɛ saraha a ta, baa tomɛ kwaa aa lɔ nyundua kɛŋɔ wee ne korobie, dɛ weweela.

⁶ O kpoo o bibaala, dɛ fuuh ba ɛ saraha Henɔm Fɛlembɔjen bini. O ɛ sɔm we-ɛɛla, dɛ voɡɛ dɛ yerɛ lala, dɛ la tɛɡre tena be. O ɛ wechɔɡa taeh, dɛ jo Korowii nɛɛ dɛ ir o bandia kohona.

⁷ Kooro Manasɛ sɛh voɡ dɛ kpɔ ka cheɡ Korowii Dea, bela Korowii aa ŋɔ Kooro Devid ne o bibaa Kooro Solomɔn be ŋɔ, “Dea nɔ ne Jerusalamee n le cheɡ, dɛ le Israel deene bwa bini kɛŋɔ baa tom mɛ o bini saŋ bɛlbwa dɛɛ la la.

⁸ Dɛ Israel tena ɛɛ teŋɛ waa maa do ba a ta, ne mmarare la bwa n fa aa cheɡɛ n bonɔɔ Mosis nɛɛ dɛ kpɔ tɛɛ ba la ta tenaa, maa ɡel ba doŋ ba le harɛ maa kpɔa tɛ ba naawa la ta.”

⁹ Kooro Manasɛ ɡelɔ Juda harɛ ta nɛra nyoɡre, dɛ ɛ wechɔɡa ɡwaa harɛre nɛra Korowii fa aa doŋ ba le o nɛra Israel tena sie la.

¹⁰ Korowii kah Kooro Manasɛ ne o nɛra, kɛ ba vɛh o be noe.

¹¹ Anomanta, Korowii ɡelɔ Asiiria koojen laa sitɔɔla ne ba laa tena lɔ ba tɔ Juda harɛ tena nɛɛ dɛ yoo ba. Ba lawɛ Kooro Manasɛ, dɛ do ɡoŋa o mee ta, dɛ vɔrɔwo ayaawa jɔɡrɔre ne, dɛ kpɔɔ kaa Babelɔn harɛ ta.

¹² O bwara aa ba dɛ nyɛɡo la, o soŋe Korowii o naawa aa tomɔ la, dɛ pwɛr o te tɛo.

¹³ Korowii no o wesoŋa, a che a ta o ɡel ba berɛ kpɔɔ ba Jerusalam o ba di kora ja. Anɔɔ ɡela Kooro Manasɛ jemɛ kɛŋɔ Korowii ɛ kasinteŋ Korowii.

¹⁴ A habɔɔ la, Kooro Manasɛ ɡelɔ ba kwaa ma danjwɛɛ waa lɔ Jerusalam, waa ɛ Kooro Devid Bwɛjen habɔɔ la, dɛ le Gehɔn bule waa lɔ felembɔjen bini wee cholibɔr, dɛ kaa Pɛŋe Doonyoa waa bar Ofel deŋɡare bɔr. O ɡelɔ ba mao o do jaŋne kohona, asɛ o kpɔ laa sitɔɔla ka so Juda harɛ bwɛjena baa ma danjwɛkpeɡa bara bwa ta.

¹⁵ O berɔ le harɛre ane voɡa, ne voɡ waa sɛah ka cheɡ Korowii Dea, ne kwaa waa ɛa ba kpoo kwaa a ta ɛ sarahare dɛɛ tɛ voɡare, a do Korowii Dea deŋɡare doa Jerusalam la bwa ne, dɛ paa le bwɛjen la bini ka ta.

¹⁶ O berɔ ɡel ba kwaa ma kon baa ɛ saraha o ta dɛɛ tɛ Korowii la, asɛ o kpoo kwaa ɛ deŋnesɔɔhna ne jam sarahare o ta. O ŋɔ Juda harɛ nɛra be ŋɔ, bá tomɛ Korowii Israel tena aa dɛ tomɔ la.

¹⁷ A lole kɛŋɔ dɛ bela voɡtoroma aa dɛ tomɛ voɡa laanee nɛra la kaa ɛ sarahare, kɛ dɛ Korowii baa dɛ tomɔ la ɡboo ba yon ɛ dɛɛ tɛ.

¹⁸ Kooro Manasɛ waa waa ɛa bwa, ne soŋa waa soŋe Korowii o naawa aa tomɔ, ne waa Korowii keamere aa bol o be Korowii Israel tena aa dɛ tomɔ sɔn ta la, ba chwera do Israel Koranar Waa Tɔne Bini.

¹⁹ Gɛ waa soŋe Korowii asɛ o no o be, ne o wechɔɡa waa ɛa mɔɔ dɛ charɛ o liire, ne bɔra waa ɛa tɛ voɡtoroma baa tomɛ voɡare, ne voɡ Asera dajaŋa waa paaɡa, dɛ voɡa waa toma la, ba chwera do Korowii Keamere Waa Tɔne bini.

²⁰ Kooro Manasɛ sewɔ ka pu o naawa, asɛ ba huɡo o koodem. Asɛ o bibaa Amɔn chiɡ o naa ta, dɛ di kora.

Juda Kooro Amɔn wa

²¹ Kooro Amɔn aa di kora la, dɛ o di bene fifraanɛ dɛ anɛ. O soɡe Jerusalam di kora bene anɛ.

²² Kooro Amɔn ɛ wechɔɡa, dɛ jo Korowii nɛɛ ɡɛ o mɛɛ Kooro Manasɛ aa ɛa la, dɛ tomɛ voɡa o mɛɛ fa aa toma la, dɛ kpoo kwaa dɛɛ tɛa.

²³ Kooro Amɔn ta o te pwɛrɛ tɛ Korowii kɛ o mɛɛ, dɛ o wechɔɡa ɡwaa o mɛɛ kwaa kohona.

²⁴ Kooro Amɔn nomonome la bini bane vɔrɔwe o vɔrɔwa dɛ kpoo o koodem.

²⁵ Asɛ Juda harɛ nɛra kpoo nɛra baa vɔrɔwe Kooro Amɔn vɔrɔwa dɛ kpoo la. Dɛ kpɔ o bibaa Josia chiɡ o naa ta, o di kora.