2 Webena 32 - mzwDBL

Asiiria Koojen Senakerib kaa yo Juda tena

¹ Waa Kooro Hɛsɛkea aa ɛa kasinteŋ ne la bwa habɔɔ, Asiiria koojen Senakerib kpɔ o laa tena ba lɔ tɔ Juda harɛ nɛra nɛ. O ɡelɔ o laa tena chɔ bar bwɛjena baa ma danjwɛkpeɡa bara bwa, dɛɛ lii kɛŋɔ wɛɛ won yoo ba dɛ́ pɔ ba nɛ.

² Kooro Hɛsɛkea aa naa kɛŋɔ Koojen Senakerib balɔ dɛɛ nyin ó ba yo Jerusalam tena la,

³ o ne o nomonome ne o laa nomonome chemo, dɛ vɔrɔwe kɛŋɔ bá tɔɔɡe neerare nyuune aa lɔ Jerusalam dahare, asɛ ba sɛh dɛ chao.

⁴ Belaa nɛra warɛ dɛ cheme, dɛ tɔɔɡe neerare nyuune bwa, ne nee waa pala dɛ kpɔ harɛ la ta bwa dɛ ŋɔ, “A chɛ kɛ Asiiria koranar ba ya be dɛ́ ba na nee nyɔ aa?”

⁵ Kooro Hɛsɛkea ɛ toma taeh, dɛ ɡel ba kwaa ma danjwɛɛ waa bar Jerusalam la bobɛla aa kuuɡa la, dɛ ma dejaŋa chɔŋɛ danjwɛɛ la ta. O berɔ ɡel ba ma danjwɛfale bɛl bar ombene la, dɛ che bwea su harɛ waa ɛ bɔɔ Kooro Devid Bwɛjen la ta. O berɔ ɛ dɔmkwaa ne kwaa baa kpɔa dɛɛ tɔ ɡbemɡbe laa ta warɛ.

⁶ Kooro Hɛsɛkea le laa sitɔɔla ba chɔ baala baa lɔ Jerusalam nyoo, dɛ ɡel ba ba cheme o sie bela bwɛɛla bwa yon dɛɛ cheme bwɛjen la doonyojen ta, asɛ dɛ ŋɔ ba be ŋɔ,

⁷ “Hé che kiŋkiŋ, hé dɔ bambile. He bɛ ɔmɛ, he bɛ ɡel he bwara yɔr Asiiria koojen ne o laa tena baa wara kohona nɔ wa. Kpeɡri waa ja ya nɛɛ la ɡwaa kpeɡri waa ja ba nɛ.

⁸ Nɛwɛnyini kpeɡrii ba dɔ, kɛ ya te, Korowii yaa dɛ tomɔ laanee dɛ́ cha yaa, dɛ́ yo tɛ yaa.” Ate, nɛra la dɔ hwɛɡa dɛ le waa Juda Kooro Hɛsɛkea aa bola la ta.

⁹ A habɔɔ la, Asiiria koojen Senakerib ne o laa tena baa chɔ bar bwɛjen Lakes, anomanta, o tomɛ o nomonome Jerusalam ba kpɔ kala ka tɛ Juda Kooro Hɛsɛkea ne o nɛra baa lɔ bela ŋɔ,

¹⁰ “Men Asiiria koojen Senakerib, n dɛ bɔɔ he Jerusalam tena waa haa dɛ hwɛɡɛ a ta dɛ ta so bela n laa tena tɔ heyaa do la.

¹¹ Kooro Hɛsɛkea ŋɔ, ‘Korowii haa dɛ tomɔ la ɛɛ lɛ heyaa le n nɔn taa,’ yaa, neɡraa wɛɛ neɡre heya, ásɛ nyɔɡre ne lɔr kpo heyaa he serewe.

¹² Kooro Hɛsɛkea laa paɡre kwaa baa ɛ saraha a ta dɛɛ tɛ Korowii ne bela baa dɛ tomɔ, dɛ ŋɔ Juda ne Jerusalam tena be ŋɔ, báa tomɛ dɛɛ fuh daawiile saraha kombeŋkpoŋ ɡbo ta la aa?

¹³ Hé ta ɡɛ n ne n naawa aa kpɔa ɛ harɛre nɛra noɛ kɛɛ? Gɛ harɛre la voɡare wono lɛ a nɛra le n nɔn ta naa?

¹⁴ Harɛre nɔ voɡ besoo n naawa aa chɔɡa wona lɛ a nɛra le n be nɔ? Ɛrɛɛ voɡ haa dɛ tomɔ ɛɛ ba wona lɛ heyaa le n nɔn ta nɔ?

¹⁵ He bɛ ɡel Kooro Hɛsɛkea lɔ nepor ta he sie ta, dɛɛ neɡre heyaa ɡɛ. Harɛ bɛlbwa voɡ ta wone lɛ o harɛ le Asiiria koojen bɛlbwa nɔn ta bwa. He voɡ haa dɛ tomɔ nɔ laa dɛ́ won lɛ heya!”

¹⁶ Gɛɛ Asiiria koojen Senakerib nomonome teŋɛ bol waa yaɡɛ Korowii ne o bonɔɔ Kooro Hɛsɛkea kohona.

¹⁷ Koojen Senakerib chwerɛ tɔne dɛ chɛɡre Korowii Israel tena aa dɛ tomɔ la ŋɔ, “Gɛ harɛre ane voɡare aa wola wone lɛ a nɛra n be la, ɡɛɛ voɡ Kooro Hɛsɛkea aa dɛ tomɔ la aa wola won lɛ o nɛra.”

¹⁸ Ate, nomonome la kpɔ takpeɡ dɛ bol waa waa bola la Hibru tena wobol ta, ɡɛ aa ɛ nɛra baa cheɡɛ Jerusalam danjwɛɛ ta ɔmɛ, ásɛ o dɔ bɔr ba lawɛ bwɛjen la tena.

¹⁹ Ba bol waa yaɡɛ Korowii Jerusalam tena aa dɛ tomɔ, ɡɛ tenten baa bol harɛre ane voɡare nɛwɛnyini aa kpɔ nɔn ɛa la.

²⁰ Ate, Kooro Hɛsɛkea ne Emɔɔs bibaa Korowii keame Aesaya wi no Korowii ŋɔ ó cha ba.

²¹ Asɛ Korowii tomɛ nyundua torome bɛl o ba kpoo Asiiria laa tena ne ba laa sitɔɔla, dɛ nomonome baa lɔ bela baa soɡa bwa. Anomanta, Koojen Senakerib kpɔ sihiih berɛ ba kaa Asiiria harɛ ta. Waa laŋa la, o kaa jo o voɡ dea, asɛ o bibaala bane ka kpoo keri ne.

²² Gɛɛ a do Korowii lɛ Kooro Hɛsɛkea ne Jerusalam tena le Asiiria koojen Senakerib, ne ba dɔma baa kaa bwa nɔn ta. O ɡelɔ ba dɔ deŋnesɔɔhna le harɛre aa bar ba nɛra nɛ.

²³ Nɛra warɔ kpɔ saraha kwaa ba tɛ Korowii Jerusalam pirim, ne koŋkɛɛla a yoɡ aa kpeɡa ba tɛ Juda Kooro Hɛsɛkea. Le bela dɛɛ kaa la, harɛre nɛra bwa kpɔ jirima tɛo kohona.

Kooro Hɛsɛkea weela ne o mbarafo ɛɛ

²⁴ Aa ba dɛ la sie la, weela lɔ Kooro Hɛsɛkea wɛɛ ba sewa. Asɛ o soŋe Korowii a wa ŋɔ, ó ɡel o na waane kɛŋɔ waa sewɛ.

²⁵ Kɛ mbarafo nomanta, o siwi ta waa Korowii aa ɛa tɛo la sui, anomanta, Korowii baah di o ne Juda ne Jerusalam tena nɛ.

²⁶ Ate, Kooro Hɛsɛkea ne Jerusalam tena charɛ ba liire le mbarafo we-ɛɛla la ta, anomanta, Korowii bandia ta ba nɛɛ balɛ Kooro Hɛsɛkea bere saŋ waa di kora.

²⁷ Kooro Hɛsɛkea dɔ kondɔɔh ne jirima taeh, asɛ dɛ ma deene dɛɛ cheɡ suuɡapoŋa ne suuɡaswɛm, ne bwedɛɛɡa a yoɡ aa kpeɡa ne konsɔɔhsoma, ne kwaa baa kpɔa dɛɛ tɔ ba te ɡbemɡbe laa ta, dɛ kondɛɛɡa bwa soo siwi a bini.

²⁸ O berɔ ma dea waa dɛ cheɡ mea ne senfala, dɛ ɔleve no. Dɛ do naleɡa ne peera leɡa tɛ o nae ne peera.

²⁹ A habɔɔ la, Korowii ɡelɔ o dɔ suuɡa kɛrɛdɛ, dɛ dɔ nae ne peera taeh, asɛ dɛ vɔrɔwe bwɛɛre ɡe.

³⁰ Gɛ saŋ Kooro Hɛsɛkea aa di kora la, onee ɡela ba kwi bɔɔ le Gehɔn bule ta, asɛ nee kpɔ o bini palɛ dɛɛ ba Jerusalam. Kasinteŋ, wobɛlbwa Kooro Hɛsɛkea aa ɛa la, a chiɡu kɛrɛdɛ.

³¹ A balɔ kɛŋɔ Babelɔn harɛ ta nomonome tomɛ nɛra Kooro Hɛsɛkea be ŋɔ, bá ba pɛɛro ŋwɛnɛ waa cheɡɛ o ta, dɛ ɛ nyokpowe-ɛɛla la o harɛ la ta. Asɛ Korowii le o habɔɔ, dɛ daahno na kɛ wɛɛ di kasinteŋii kɛɛ.

³² Waane ɡe Kooro Hɛsɛkea aa ɛa o kora dii saŋ, ne ɡɛ waa kpɔ o te tɛ Korowii la bwa, ba chwera do Emɔɔs bibaa Korowii keame Aesaya waa waa naa chaahna ta do Juda ne Israel Koranar Waa Tɔn bini.

³³ Kooro Hɛsɛkea sewɔ ka pu o naawa, asɛ ba huɡo deŋɡare bɛl ta, bela baa dɛ huɡe Kooro Devid naanar. Juda ne Jerusalam tena bwa kpɔ duure tɛo o serewe wee. Asɛ o bibaa Manasɛ ba chiɡ o naa ta, dɛ di kora.