2 Webena 31 - mzwDBL

Kooro Hɛsɛkea mmarafala dɔe wa

¹ Baa di tɔpejen la tonɛ la, Israel tena baa lɔ bela la jo Juda harɛ bwɛɛre ta, dɛ paɡre bwea baa paaɡa dɛɛ duura, dɛ teŋni voɡ Asera dajaŋa ta. Ba chɔɡ bɔra baa dɛ tomɛ voɡare deŋɡarere ta, ne kwaa baa dɛ ɛ sarahare a ta, Juda harɛ ne Bɛnjamen ne Efrem, dɛ Manasɛ harɛre deene ta bwa. Baa chɔɡ a bwa tonɛ la, asɛ ba bwa berɛ kaa ba bwɛɛre.

² Kooro Hɛsɛkea bɔne sɔfore ne Lewi dea tena la bini, ɡɛ aa chɛ kɛŋɔ bɛlbwa ɛɛ ɛ o toma. Asɛ ba fuh kwaa dɛɛ ɛ sarahare ne deŋnesɔɔhna sarahare, dɛɛ tomɛ Korowii dɛ ɡo yela dɛɛ kpɛɛro o Dea doonyoo la ta.

³ Kooro Hɛsɛkea lawɛ o ɡbaɡba nae ne boohna ne peera tɛ ŋɔ, bá kpɔ ɛ sarahare baa dɛ fuah chɔɔ ne jɔmɔra, ne Ona Tɔpera ne Korobifala Tɔpejena, dɛ tɔpejena ane baa lea cheɡ ta, ɡɛ baa chwera do Korowii Mmara tɔn bini la.

⁴ Kooro berɔ ŋɔ Jerusalam tena be ŋɔ, bá kpɔ saraha kwaa aa chɛ sɔfore ne Lewi dea tena la dɛɛ tɛɛ ba, ɡɛ aa ɛ, ásɛ ba won kpɔ ba te tɛ kɛrɛdɛ, dɛɛ teŋɛ ɡɛ Korowii Mmara la aa dɛ baɡle.

⁵ Baa no waa kooro aa bola la, Israel tena la le ba bambile ta, dɛ kpɔ ba kooni kondikonloɡla kɛŋɔ mea ne senfala, ne ɔleve noo ne tooh dɛ kondikwa bɛlbwa baa dɔa dɛ le kooni ta, ba tɛ Korowii toma. Kwaa baa ba a ne warɔ kɛrɛdɛ. Nomɛlbwa bɔne komɛlbwa waa dɔa bini bɔre fi, dɛ́ kpɔ bɔrbeŋkpoŋ ba.

⁶ Israel ne Juda baala baa soɡe Juda harɛ bwɛɛre ta ɡe bɔne ba nae ne boohna dɛ peera bini bɔre fi, dɛ kpɔ bɔrbeŋkpoŋa ba. Gɛɛ ba kpɔ kwaa baa lea cheɡ tɛ Korowii ba, dɛ bila a daŋɛ chɔ.

⁷ Ba pa mun le korobitooro te ta ba koŋkɛɛla la ne, dɛ ba tel korobinuanɛ te ta.

⁸ Kooro Hɛsɛkea ne o nomonome aa baa na ɡɛ koŋkɛɛla la aa daŋa chɔ la, ba kpɛɛ Korowii, dɛ swee andɛɛɡa tɛ o nɛra Israel tena.

⁹ Kooro Hɛsɛkea pɛɛ sɔfore ne Lewi dea tena la koŋkɛɛla nɔ wa,

¹⁰ asɛ Sɔfonomoa Asaria waa ɛ Sadɔk lole la chaŋe ŋɔ, “Dɛ le saŋ nɛra la aa pa mun kpɔ koŋkɛɛla dɛɛ ba Korowii Dea bonɔ la, ya dɔɔ dɛɛ di, ásɛ ane ka chɔ warɛ, dɛkalkɛ Korowii swee o nɛra andɛɛɡa, asɛ andamanta nɔ ta ka dɛ daŋɛ chɔ la.”

¹¹ Ate, Kooro Hɛsɛkea ɡel ba kwaa deene baa dɛɛ cheɡ laala a bini Korowii Dea bɔr bela.

¹² Asɛ ba pa koŋkɛɛla la ne kwaa baa bɔne a bini fi, dɛ kpɔ bɔrbeŋkpoŋa ba, dɛ kwaa baa lea cheɡ tɛ Korowii la cheɡ bela. Ba kpɔ Lewi dea te bɛl baa dɛ yerɔ Konania ɛ nomoa ŋɔ wɛ́ɛ nyiŋi a ta, asɛ o nime Simee ja o nɛ.

¹³ Ba le Lewi dea tena nɛra fi ŋɔ bá do Konania ne o nime Simee lɔɡa dɛɛ ɛ toma bela. Banee, Jehiel ne Asasia ne Nahat, ne Asahɛl ne Jerimot ne Josabad ne Eliel, ne Ismakia ne Mahat dɛ Bɛnaya. Kooro Hɛsɛkea ne Sɔfonomoa Asaria kpeɡri taa a che, ba lee ba.

¹⁴ Lewi dea te Imna bibaa Koree ba le wɛɛ nyiŋi Korowii Dea wee leebɔr doonyoa la ta, dɛ chɔ sarahare koŋkɛɛla aa le nɛra bambile ta ba kpɔ baa tɛ Korowii ne a bɔna nyoa.

¹⁵ Dɛ Kore dɔ o bala Lewi dea tena baa chao bwɛɛre ane sɔfore aa soɡe a ta. Banee, Eden ne Miniamin ne Jesua ne Sɛmaya ne Amaria dɛ Sɛkania. Ba ɡe dɛ lɛ koŋkɛɛla la dɛ bɔna kasinteŋ ne tɛ Lewi dea tena baa lɔ bela ɡɛ bɛlbwa toma aa doa, bechala kɛɛ nomoa toole.

¹⁶ Ba berɔ dɛɛ tɛ bibaala baa di bene atoro, kɛɛ dɛ ɡwaa ba chwerɛ ba sɔna teŋɛ dɔŋa nɛɛ la. Gɛ ba bini bɛlbwa waa jo Korowii Dea bela, ka ɛ toma baa kpɔa do o nɔn ta tɔpere bɛlbwa la aa doa.

¹⁷ Ba bɔne tomare tɛ sɔfore la ɡɛ baa chwerɛ ba sɔna teŋɛ dɔŋa nɛɛ lolanar ta, dɛ tɛ Lewi dea tena ɡe baa di bene fifraanɛ kɛɛ dɛ ɡwaa, ɡɛ bɛlbwa toma ne dea waa le o ta aa doa.

¹⁸ Bane ba haahna ne ba bechale, dɛ nɛra ba ne baa soɡa sɔnaa ba chwerɛ, dɛkalkɛ dɛ a chɛ kɛ bá kpɔ kasinteŋ dɛɛ ɛ toma baa lea cheɡ tɛ Korowii.

¹⁹ Kɛ sɔfore baa ɛ Arɔn naanar dɛ so harɛre baa dɛ parɛ a ta, dɛ so ba bwɛɛre ta kɛɛ bobɛlbwa la te, ba le baala ba bɔne kondikwaa dɛɛ tɛ baala baa le sɔfore dea, ne nomɛlbwa baa chwerɛ o sɔn o le Lewi dea la bwa.

²⁰ Gɛɛ Kooro Hɛsɛkea ɛ Juda harɛ ta bwa, dɛɛ ɛ waa aa wera dɛ toɡre Korowii waa dɛ tomɔ la be.

²¹ Wobɛlbwa Kooro Hɛsɛkea aa ɛa Korowii Dea Jerusalam, ne ɡɛ waa teŋɛ Korowii Mmarare, ne waa waa doo a ta bambile bwa ne la ɡelɔ o wobɛlbwa chiɡu kɛrɛdɛ.