2 Webena 30 - mzwDBL

Kooro Hɛsɛkea Galekaa Tɔpejen dii

¹ Kooro Hɛsɛkea tomɛ nɛra Israel ne Juda harɛ ta, dɛ chwerɛ tɔn ta nɔn yerɛ Efrem ne Manasɛ deene tena ŋɔ, bá cheme Korowii Dea Jerusalam, dɛ́ di Korowii Israel tena aa dɛ tomɔ Galekaa Tɔpejen la.

² Kooro Hɛsɛkea ne o nomonome, dɛ nɛra baa cheme Jerusalam la bwa sɛoh kɛŋɔ bá di Galekaa Tɔpejen la, korobinɛɛte ta.

³ Dɛ baa di tɔpejen la o saŋ ta biɡro, dɛkalkɛ dɛ sɔfore ta warɛ dɛ́ won laa doŋa bɛlbwa kpɔ ba nɛɛ bá do ɡoroŋ, asɛ dɛ nɛra la ɡe bwa aa won Jerusalam cheme.

⁴ Dɛ waa nɔ maɡrɔ tɛ kooro ne nɛra baa cheme bela la bwa.

⁵ Anomanta, ba yerɛ Israel harɛ nɛra le Dan waa lɔ weekaŋle nyunduabɔr, ka le Beɛseeba waa lɔ weekaŋle harɛbɔr ŋɔ, bá ba cheme Jerusalam dɛ́ di Galekaa Tɔpejen la Korowii Israel tena aa dɛ tomɔ la sɔn ta. Dɛ nɛra ta warɛ dɛ ba di tɔpejen la, ɡɛ baa chwerɛ o waa do tɔn bini la bwa.

⁶ Kooro la ɡelɔ toroma kpɔ tɔne la kaa Israel ne Juda harɛre bwa ta kɛŋɔ, “Israel tena, he le Asiiria tena laa baa yo heyaa la nyoa. Hé berɛ kpɔ he te tɛ Korowii Abraham ne Aesek dɛ Jekɔb aa tomɔ la, ásɛ o ɡe lawɛ heyaa ba o be.

⁷ He bɛ do kɛ he naawa ne he bala Israel tena ba waa fa aa wola kasinteŋ dɔe tɛ Korowii baa dɛ tomɔ la, asɛ o tɛr ba deŋne kohona ɡa he siwi ta la.

⁸ He bɛ lwɛmkpeɡ ɛ kɛ ban, dɛ́ kpɔ he te do Korowii haa dɛ tomɔ la lɔɡa. Hé ba o Dea waa ɡela o do ɡoroŋ saŋ bɛlbwa la bini Jerusalam, dɛɛ tomɔ ásɛ o bandia le he nɛ.

⁹ Dɛ he berɔ kpɔ he te tɛ Korowii aa, aa ɡeloo nɛra baa lawɛ he lolanar laa ta kaa la dɔ tedoma tɛɛ ba, dɛ́ tɛɛ ba ŋwɛnɛ ba berɛ ba ya harɛ nɔ ta. Dɛkalkɛ Korowii haa dɛ tomɔ la dɔ tedoma dɛɛ na nɛn sum. Hé ba o be naa, waa habɔɔ berɛ kpo heya.”

¹⁰ Toroma la le bela, dɛ la bwɛjen bɛlbwa ta Efrem ne Manasɛ deene harɛre ta, dɛ ka le Sebulon dea harɛ ɡe ta bwa, kɛ nɛra la mam ba dɛɛ muɡli ba baah.

¹¹ Kɛ dɛ ba bini bane le Aasa ne Manasɛ, dɛ Sebulon deene ta, dɛ sɛh kɛŋɔ baa ba Jerusalamee.

¹² Gɛɛ Korowii ɛ, dɛ ja Juda tena nɛ, dɛ ɡel ba dɔ nyopɛo, dɛ teŋɛ waa kooro ne o nomonome aa do ba la ta, ɡɛ waa bola la.

Galekaa Tɔpejen dii

¹³ Korobinɛɛte ta la, nɛra warɔ dɛ ba cheme Jerusalam, dɛ di Paanoo Iisi Aa Wola Toole a ta Tɔpejen.

¹⁴ Ba le kwaa harɛre ane nɛra baa dɛ tomɛ voɡa aa dɛ ɛ saraha a ta ne Jerusalam, dɛ chɔɡ anɔ la baa dɛ fuh daawiile a ta, dɛ pa a bwa ka ta Kedrɔn Fɛlembɔjen bini.

¹⁵ Korobinɛɛte tɔpera fi dɛ anaarɛ ta la, ba kpo Galekaa Tɔpejen pebie la. Sɔfore ne Lewi dea tena laa doŋa bɛlbwa kpɔ ba nɛɛ dɛ do ɡoroŋ, dɛ kpɔ saraha kwaa baa fuah la ba Korowii Dea.

¹⁶ Ate, bɛlbwa ka che o chebɔr, ɡɛ Korowii bonɔɔ Mosis Mmarare aa dɛ baɡle la. Asɛ Lewi dea tena la kpɔ kwaa baa kpoora ɛ saraha chale la tɛ sɔfore la, asɛ ba ɛ merɛ saraha kon la ta.

¹⁷ Nɛra la ɡalɡa aa wola doŋa bɛlbwa aa lɔ ba nɛɛ laa kpɔ dɛ do ɡoroŋ nomanta, Lewi dea tena laanee kpoo Galekaa Tɔpejen pebiiri la ɛ saraha tɛ Korowii tɛɛ ba.

¹⁸ Nɛra ɡalɡa ba ɡe aa le Efrem ne Manasɛ ne Isaaka, dɛ Sebulon deene dɛ ba la, dɛ ba ta doŋa bɛlbwa laa kpɔ ba nɛ dɛ do ɡoroŋ, anomanta, dɛ ɡɛ bɛlbwa nee baa di Galekaa Tɔpejen la. Asɛ Kooro Hɛsɛkea soŋe Korowii tɛɛ ba dɛ ŋɔ,

¹⁹ “N Naa Korowii ya naawa aa tomɛ, che he wer haa doa ta dɛ́ kpɔ kɛ nɛra baa dɛ tomɛ bambile bwa ne nɔ, a lole kɛŋɔ ba ta doŋa laa kpɔ ba nɛ.”

²⁰ Asɛ Korowii no Kooro Hɛsɛkea wesoŋa la, o kpɔ ba wechɔɡa kɛ ba, o ta ban wobɛlbwa ɛɛ.

²¹ Israel tena aa baa cheme Jerusalam la, ba di Paanoo Iisi Aa Wola Toole a ta Tɔpejen la silɛɛ kohona ne, tɔpera anuanɛ. Asɛ Lewi dea tena ne sɔfore ɡe kpɔ kwaa bwa soo siwi baa kpɔa dɛɛ hɛlɛ lɔ yela, dɛɛ kpɛɛ Korowii kohona tɔpere bɛlbwa, bokpeɡa bwa ne.

²² Kooro Hɛsɛkea jam Lewi dea tena wejema ne kpɛɛra baa dɔa, dɛ kpɔ cha tɔpejen la dii la. Tɔpera anuanɛ bwa la, ba tɛɛ ba saraha kwaa aa ɛ ba dibɔra la ba di, dɛ ɛ deŋnesɔɔhna sarahare, dɛ kpɛɛ Korowii ba naawa aa tomɔ la.

²³ Nɛra la bwa sɛoh kɛŋɔ ba berɛ di tɔpejen la tɔpera anuanɛ ja. Anomanta, ba berɔ di tɔpejen la tɔpera anuanɛ silɛɛ ne ja.

²⁴ Juda Kooro Hɛsɛkea tɛ nɛra baa cheme bela nabala kaɡboŋ, dɛ boohna ne peera kaɡboŋa anuanɛ, asɛ o nomonome la ɡe tɛɛ ba nabala kaɡboŋ, dɛ boohna ne peera kaɡboŋa fi. Asɛ sɔfore baa wara laa doŋa bɛlbwa kpɔ ba nɛ, ba do ɡoroŋ.

²⁵ Anomanta, Juda tena baa cheme bela sie lɛo kohona, ba ne sɔfore ne Lewi dea tena, dɛ Israel tena baa ba bela bwa, ne hɔɔhra baa le Israel ne Juda harɛre ta bwa.

²⁶ Silɛɛ kohona ba Jerusalam, dɛkalkɛ, le Kooro Devid bibaa Kooro Solomɔn aa di kora Israel harɛ ta bwa, a ɡɛ waa nɔ dɔŋa ta chiɡe bwa.

²⁷ Sɔfore ne Lewi dea tena la iro, dɛ swee andɛɛɡa tɛ nɛra la, asɛ Korowii no ba wesoŋa le nyundua dɛ ɛ tɛɛ ba.