2 Webena 28 - mzwDBL

Juda Kooro Ahas

¹ Kooro Ahas di bene fifraanɛ mɔɔ dɛ di kora. O soɡe Jerusalam dɛ di kora bene fi dɛ anumɛl. Dɛ o ta doe kɛŋɔ o nabaa Kooro Devid, o ta waa aa too Korowii tea ɛɛ.

² O teŋɛ waa Israel koranar aa ɛa la ta, dɛ ɛ voɡa dɛɛ tomɛ voɡ Baalre.

³ O kpoo kwaa dɛ fuah ɛ saraha Bɛn Henɔm Fɛlembɔjen bini. O kpo o bibaala, dɛ fuuh ba ɛ saraha, dɛ teŋɛ harɛre ane nawee waa Korowii aa kia, dɛ koh a wa doŋ ba le ba Israel tena sie la ta.

⁴ Kooro Ahas kpoo kwaa dɛ ɛ saraha, dɛ fuh daawiile a sɔɔh aa soma tɛ voɡare bela voɡtoroma aa dɛ tomɛ, ne deŋɡarere dor, dɛ dajen bɛlbwa mun.

⁵ Anomanta, Korowii waa dɛ tomɔ la kpɔɔ do Siiria kooro nɔn ta. Siiria laa tena baa yoo dɛ pɔ o nɛ, dɛ lawɛ o nɛra ɡalɡa, dɛ ba ba ne Damaskɔs. O berɔ kpɔɔ do Israel kooro nɔn ta o yoo, dɛ kpoo o laa tena taeh.

⁶ Tɔpebeŋkpoŋ ɡbo ta, Remalia bibaa Kooro Pɛka ne o laa tena iro ka kpoo Juda laa tena kaɡboŋa lafa fifraanɛ, dɛkalkɛ ba vɛh Korowii ba naawa aa tomɔ la.

⁷ Sikri waa ɛ banyoo dɛ le Efrem dea kpo Kooro Ahas bibaa baa dɛ yerɔ Maaseya, ne koodem nomoa Asrikam dɛ Ɛlkana. Dɛ kooro toole naa Ɛlkanaa lole.

⁸ Israel tena lawɛ Juda tena ba fe aa ɛ ba lolanar laa ta, nɛra kaɡboŋa lafraanɛ baa ɛ ba haahna ne bihaahna dɛ bibaala. Ba berɔ pa ba laala aa wara laa la ta, dɛ ba a ne Samaria.

⁹ Dɛ Korowii keame Ɔdɛd lɔ Samaria bela. O iro dɛ la ka cheme laa tena la ɡɛ saŋ baa ba Samaria la. O ŋɔ ba be ŋɔ, “Korowii he naawa aa tomɔ la baah di Juda tena nɛɛ waa o ɡel he yoo ba dɛ pɔ ba nɛɛ la. Kɛ he berɔ kpoo ba warɛ kohona to.

¹⁰ Taraken he dɛ́ nyin he ɛ baala ne haahna baa lɔ Juda ne Jerusalam bwa he yoma. He ɛ ɡɛ naa, haa jemɛ kɛŋɔ he di bolchɔɡe dɛ ɛ wechɔɡa jo Korowii haa dɛ tomɔ la nɛ aa?

¹¹ Hé no n be! Hé ɡel he lolanar haa laɡ ba yoma nɔ berɛ kaa, dɛkalkɛ Korowii baah di he nɛɛ kohona.”

¹² Belaa Israel nomonome la bane baa ɛ Jehohanan bibaa Asaria, ne Mɛselɛmɔt bibaa Bɛrekea, ne Salum bibaa Jehiskia, dɛ Hadlai bibaa Amasa ir ka cheme nɛra baa le laa ta dɛɛ ba la.

¹³ Ba ŋɔ ba be ŋɔ, “He bɛ nɛra haa laɡ ba la kpɔ ba bonɔ, ɡɛ laa aa, yaa di bolchɔɡe Korowii siee. He bɛ ɡel ya kpɔ wechɔɡa ja bolchɔɡe dii ta, a kan ya nɛɛ wubwa, ásɛ Korowii baah di ya nɛɛ kohona.”

¹⁴ Anomanta, laa tena la kpɔ nɛra la ne laala baa paa laa la ta bwa tɛ nomonome baa lɔ bela la bwa, ba siwi ta.

¹⁵ Asɛ nomonome banaarɛ la lawɛ nɛra la, dɛ ka kpɔ yale aa ja laala laa tena la aa paa la bini ane tɛ banɔ la baa cheɡɛ mumɡbal la, dɛ tɛɛ ba yale ne naŋɡaware ne kondikwa, dɛ noo baa kpɔ do ba ŋwɛra ta. Ba bini banɔ la baa ɡwɛɡra ɡe la, ba kpɔ ba so keeɡore ta. Gɛɛ a ɛ ba kpɔ ba bwa berɛ kaa ba bala be Jeriko baa dɛ yerɔ Bambie Bwɛjen la, dɛ berɛ ba Samaria.

¹⁶ Aa ba dɛ la sie la, Kooro Ahas tomɛ nɛra Asiiria koojen be ŋɔ ó ba chao.

¹⁷ Dɛ Edom tena berɔ ba yo Juda tena, dɛ lawɛ nɛra laa ta kaa,

¹⁸ asɛ Filisti tena ɡe ba lɔ tɔ Juda harɛ ta bwɛɛre aa lɔ deŋɡarere ta, ne Nɛɡɛv pua hɛŋle ɡbo harɛ tena nɛ. Ba yoo dɛ lɛ bwɛjena Bɛt Sɛmɛs ne Aejalɔn, ne Gɛdɛrɔt ne Soko ne Temna dɛ Gimso, ne a bwɛjeɡre aa bara bwa dɛ so a ta.

¹⁹ Juda Kooro Ahas wechɔɡa waa ba a ne Juda harɛ ta, ne kasinteŋ waa wola dii tɛ Korowii la nomanta, Korowii kpɔ wahala ba ta Juda tena nɛ.

²⁰ Asiiria koojen Tiɡlat Pilesa ba o be, kɛ wenaale nee o ba ɡwaa kɛ o fe aa ba chao.

²¹ Anee Juda Kooro Ahas kpɔ suuɡaswɛm aa lɔ Korowii Dea, ne anɔ la aa lɔ koodem, ne anɔ la aa le nomonnyuune be, dɛ tomɛ ba kpɔ ka kɛ Asiiria koojen la, kɛ a ta wone chao.

²² Kooro Ahas wenaale aa baa ɡwaa o nɛɛ bwa habɔɔ la, dɛ o ta teŋɔ ɛ wechɔɡa dɛɛ jo Korowii nɛɛ kohona.

²³ O kpoo kwaa ɛ sarahare Damaskɔs tena baa yoo dɛ pɔ o nɛɛ voɡare ta, dɛkalkɛ o liiro ŋɔ, “Siiria koranar voɡa aa cha ba nomanta, mɛɛ kpoo kwaa ɛ sarahaa tɛa, ásɛ a cha mɛ.” Kɛ anee ɡela o ne Israel tena lɔ harɛ.

²⁴ Kooro Ahas berɔ pa kwaa aa lɔ Korowii Dea la, dɛ ka paɡra burbur ken. O laa Korowii Dea waa lɔ Jerusalam la ɡbeni tɔɔɡe, dɛ kwaa bɔra baa ɛ sarahare a ta dɛɛ tɛ voɡa Jerusalam bobɛlbwa.

²⁵ O berɔ ɛ bɔr tɛ voɡtoroma Juda harɛ ta bwɛjena ne bwɛɛre ta, dɛ fuh daawiile dɛɛ tɛ harɛre ane voɡa. Anɔ ɡelɔ Korowii o naawa aa tomɔ la baah di o nɛɛ kɛrɛdɛ.

²⁶ Wobɛlbwa Kooro Ahas aa ɛa la, ba chwera do Juda ne Israel Koranar Waa Tɔne bini.

²⁷ Kooro Ahas sewɔ, asɛ ba ka huɡo Jerusalam waa ɛ Kooro Devid Bwɛjen ta. Kɛ ba ta on koranar huɡribɔr huɡe, asɛ o bibaa Hɛsɛkea ba chiɡ o naa ta, dɛ di kora.