2 Webena 27 - mzwDBL

Juda Kooro Jotam

¹ Kooro Jotam aa di kora dɛ o dɔ bene fifraanɛ dɛ anue. O soɡe Jerusalam di kora bene fi dɛ anumɛl. O nya sɔne Jerusa, asɛ o nya ɡe mɛɛ sɔne Sadɔk.

² Kooro Jotam ɛ waa aa too Korowii tea, dɛ teŋɛ waa o mɛɛ Kooro Ussia aa ɛa la ta. Kɛ o te ta Korowii Dea joɛ, dɛ ka fuh daawiile a sɔɔh aa soma, dɛ ɛ wechɔɡa jo Korowii nɛ. Dɛ harɛ la ta nɛra ta teŋɔ, dɛɛ ɛ wechɔɡa.

³ Kooro Jotam berɔ kwaa ma Korowii Dea doonyoa baa dɛ yerɔ Weekaŋle Nyundua Doonyoa la. Dɛ berɛ kwaa ɛ toma kɛrɛdɛ danjwɛɛ waa bar Jerusalam Ofel deŋɡare ta.

⁴ O vɔrɔwe bwɛjena Juda harɛ bwejena ta, dɛ ma dekpeɡa ne dejaŋa kɔne bini ɡe.

⁵ O kaa yo Amɔn kooro ne o laa tena, dɛ pɔ ba nɛ. O ham ba dɛ ɡel ba kpɔ harɛ la kwaa baa tɛo benanyoa bɛlbwa. Kwaa kɛŋɔ suuɡapoŋa a tɔɡre aa ɛ kilore kaɡboŋa atoro lafraanaarɛ, ne mea baaɡe a tɔɡre aa ɛ kaɡboŋa fifraanɛ, dɛ mea ane ɡe soo siwi baaɡe a ɡe tɔɡre aa ɛ kaɡboŋa fifraanɛ. Ba teŋɔ kpɔ ɡɛ tenten ba tɛo bennɛɛte ne bentooro te ta.

⁶ Kooro Jotam baa do kpeɡri kɛrɛdɛ, dɛkalkɛ o teŋɛ Korowii waa dɛ tomɔ la nɛɛ kasinteŋ ne.

⁷ Waa aa chiɡ Kooro Jotam kora dii ta, ne laa waa yoa, ba chwera do Juda ne Israel Koranar Waa Tɔne bini.

⁸ Kooro Jotam aa di kora dɛ o dɔ bene fifraanɛ dɛ anue. O soɡe Jerusalam di kora bene fi dɛ anumɛl.

⁹ Kooro Jotam aa baa sewɛ la, ba huɡo Jerusalam waa ɛ Kooro Devid Bwɛjen bela baa huɡe o naawa. Asɛ o bibaa Ahas chiɡ o naa ta, dɛ di kora.