2 Webena 26 - mzwDBL

Juda Kooro Ussia

¹ Kooro Amasea aa sewa la, Juda tena bwa lawɛ o bibaa Ussia baa chiɡ o mɛɛ naa ta o di kora. Dɛ o di bene fi dɛ anumɛl.

² Kooro Ussia berɔ ka yo lɛ Elat dɛ kwaa vɔrɔwo, o mɛɛ seo habɔɔ.

³ Waa di kora dɛ o dɔ bene fi dɛ anumɛl. O soɡe Jerusalam di kora bene fifraanue dɛ anɛ. O nya sɔne Jekolia dɛ le Jerusalam.

⁴ Kooro Ussia ɛ waa a too Korowii tea, ɡɛ o mɛɛ Kooro Amasea fa aa ɛa la.

⁵ O tomɛ Korowii o bambile bwa ne ɡɛ saŋ Korowii keame Sekaria, waa dɛ jao Korowii waa ta taa soɡe le, asɛ Korowii sweero andɛɛɡa.

⁶ Kooro Ussia ne Filisti tena yo laa, asɛ dɛ ka paɡre danjwɛkpeɡa aa bar bwɛjena Gat ne Jamnia dɛ Asdɔd. O berɔ kwaa vɔrɔwe bwɛjena aa bɛne Asdɔd dɛ Filisti harɛ la ta bobɛla bwa.

⁷ Korowii chao o pɔ Filisti tena ne Arab tena baa soɡe Gur Baal, dɛ Meuni tena nɛ.

⁸ Amɔn tena kpɔ harɛ la ta kwaa baa tɛ Kooro Ussia, asɛ o sɔn le dɛ ba Ijipt harɛ ta bwa, dɛkalkɛ dɛ o dɔ kpeɡri kohona.

⁹ Kooro Ussia ɡelɔ ba ma dejaŋa aa do kpeɡri Jerusalam Loŋkora Doonyoa, ne bɛl baa dɛ yerɔ Fɛlembɔjen Doonyoa, dɛ bela danjwɛɛ baa maa bar bwɛɛ la loŋkora ta.

¹⁰ O berɔ ɡel ba ma dejaŋa pua hɛŋle ɡbo harɛ ta, dɛ kwi bɔɔne aa won nee lɛɛ bwea lɔɡre, ne deŋɡarere harɛ aa chɔa kaa la ta, dɛkalkɛ o dɔ kondɛɛra kɛrɛdɛ. Dɛ o dɔ nɛra baa dɛ ɛ toma o kooni ne daa kooni aa lɔ deŋɡarere ne harɛpare andɛɛɡa ta, dɛkalkɛ dɛ o sie dɛ lɛ para ta.

¹¹ Dɛ o dɔ laa tena baa jemɛ yoi, dɛ́ kpɔ ba te saŋ bɛlbwa dɛ́ ka yo laa. O karakere banɛ Jeyɛl ne Maaseyaa chwerɛ waa aa dɛ chiɡ dɛɛ bil, asɛ kooro nomoa Hanania chɔ ba nyoa.

¹² Dɛ nomonnyuune baa dɛ nyiŋi laa tena la nɛɛ lɔ kaɡboŋa banɛ lafraanumɛl.

¹³ Laa tena kaɡboŋa lafraatoro dɛ banuanɛ lafraanue baa dɛ ba wona yo kooro dɔma tɛo kɛrɛdɛ la lɔ ba lɔɡa.

¹⁴ Kooro Ussia tɛ o laa tena la kwaa baa kpɔa dɛɛ tɔ ba te ɡbemɡbe laa ta, ne lampeare ne bune ɡbɛrɛre, ne laa batakaani ne tori, dɛ vamtor bwea.

¹⁵ O ɡelɔ nɛra baa dɔ wejema kpɔ bune kwaa kwaane nɛra aa dɛ ba wona che a ta dejaŋa dor, ne danjwɛkpeɡa aa bar bwɛjen Jerusalam loŋkoni ta, dɛɛ ta hɛma ne bwejena. O sɔn leɔ kaa bobɛlbwa, dɛkalkɛ Korowii chao kohona mɔɔ o dɔ kpeɡri.

¹⁶ Kɛ Kooro Ussia aa ba dɛ di kpeɡri la, mbarafo nomanta o cholo. O waa ta kasinteŋ dɔe tɛ Korowii waa dɛ tomɔ, dɛ ka jo Korowii Dea ŋɔ o ka fuh daawiile a sɔɔh aa soma kon baa dɛ fuah a ta la ta.

¹⁷ Sɔfo Asaria ne sɔfore fifraanuatoro bane ɡe ba bambile aa kpeɡa teŋɛ o nɛɛ kaa Korowii Dea bela.

¹⁸ Asɛ ba la o be ka bɔɔro ŋɔ, “N naa kooro, he ta ŋwɛnɛ dɔe kɛŋɔ he fuh daawiile a sɔɔh aa soma tɛ Korowii. Sɔfore baa ɛ Arɔn naanar baa sɔ ba doŋa ta, ba do ɡoroŋ Korowii be pera la, banee dɔ a ŋwɛnɛ kɛ bá ɛ ɡɛ toma nɔ. Le Korowii Dea bonɔ kaa, dɛkalkɛ he waa ta kasinteŋ dɔe o sie, waa andɛɛɡaa swee tɛɛ kpa.”

¹⁹ Dɛ Kooro Ussia cheɡɛ Korowii Dea bela, kon baa dɛ fuh daawiile a sɔɔh aa soma o ta la jwɛh, dɛ kpoŋe kon baa kpɔa dɛɛ fuh konsɔɔhsoma. O baah di sɔfore la nɛ, asɛ buɡ la ta, bwadabii weechɔɡa ane ba le o tile ta.

²⁰ Sɔfo Asaria ne sɔfore la nyoa kpoo baa nyiŋu, dɛ na kɛ wee lɔ o tile ta, asɛ ba doŋu le buse warane. Dɛ o ɡbabir kwaraa fe dɛ nyin buse lee wubwa, dɛkalkɛŋɔ Korowiirii dɛɛ tɛr o deŋne.

²¹ Korowii kpɔ wee ta Kooro Ussia nɛɛ ka tel kɛŋɔ waa baa sewɛ. O ta ŋwɛnɛ dɔe jo Korowii Dea dɛ so o ɡbaɡba dem. Wobɛlbwa toole wɛɛ ɛ kpa, asɛ o bibaa Jotam ba so koodem bela dɛɛ nyiŋi harɛ la tena nɛ.

²² Waane ɡe aa chiɡ Kooro Ussia kora dii ta, le mumpar kaa a jaɡa la, Emɔɔs bibaa Korowii keame Aesaya chwera do tɔn bini.

²³ Kooro Ussia baa sewɛ asɛ ba huɡo bɛne o naawa koo bɛl koranar harɛ ta, dɛkalkɛ ba ŋɔ o we wee. O bibaa Jotam chiɡ o naa ta dɛ di kora.