2 Webena 25 - mzwDBL

Juda Kooro Amasea

¹ Amasea di bene fifraanɛ dɛ anue mɔɔ dɛ di kora. O di kora Jerusalam bene fifraanɛ dɛ anuanaarɛ. O nya sɔne Jehoadin dɛ le Jerusalam.

² Kooro Amasea ɛ waa aa too Korowii tea, kɛ dɛ o bambile bwa ne laa.

³ Kooro Amasea kora aa baa che kiŋkiŋ name la, o kpoo nomonome baa kpo o mɛɛ o fa aa di kora la.

⁴ Kɛ o ta ɡɛ nomonome la bii kpoorɛ ɡɛ Korowii aa chwera Mosis Mmara la ta kɛŋɔ, “Mɛɛ kɛɛ nya ɛ wechɔɡa aa, haa won kpɔ kpo o bie, bii ɡe ɛ wechɔɡa aa, haa won kpɔ kpo mɛɛ kɛɛ nya. Nɛn o ɡbaɡba aa ɛ wechɔɡa laanee chɛ kɛ ó sewɛ o wechɔɡa wa.”

⁵ Kooro Amasea boa baala bwa baa lɔ Juda ne Bɛnjamen deene, dɛ le ba nomonnyuune ba chɔ laa tena kaɡboŋa ne lafare nyoo ba deene ta. Baala baa di bene fifraanɛ kɛɛ dɛ ɡwaa lɔ nɛra kaɡboŋa lafraatoro. Banee ba le ba kpɔ ba te dɛ jemɛ lampeare ne kwaa baa kpɔa dɛɛ tɔ ba te ɡbemɡbe laa ta ne yoi kɛrɛdɛ.

⁶ O berɔ kpɔ suuɡapoŋa a tɔɡre aa ɛ kilore kaɡboŋa atoro lafraanaarɛ, dɛ ka bɔ Israel laa tena kaɡboŋa lafa paa ŋɔ bá ba yo tɛo.

⁷ Anee Korowii keame bɛl la kooro be ka ŋɔ o be ŋɔ, “N naa kooro, bɛ ɡel Israel laa tena teŋɛ he nɛ. Korowii ta Israel tena baa le weekaŋle nyundua harɛ la nɛɛ teŋɛ.

⁸ He dɛ lii kɛŋɔ ba ja he nɛ aa, anee he do kpeɡri laa la ta, kɛ Korowiirii dɔ kpeɡri, dɛ ɡel nɛn ɛɛ pɔ o dɔŋ nɛɛ kɛɛ wɛɛ chole. Wɛɛ ɡeloo he dɔma pɔ he nɛ.”

⁹ Anee Kooro Amasea bɔɔ Korowii keame la ŋɔ, “Ɛrɛɛ suuɡapoŋa a tɔɡre aa ɛ kilore kaɡboŋa atoro lafraanaarɛ maa bɔa tɛ Israel laa tena la waɔ?” Anee o ŋɔ, “Korowii ɛɛ won berɛ tɛɛ ane a ɡwaa ɡɛ.”

¹⁰ Anomanta, Kooro Amasea ɡelɔ Israel laa tena la berɛ kaa ba bwɛɛre ta. Ba baah di Juda tena nɛɛ kɛrɛdɛ, dɛ berɛ kaa.

¹¹ Asɛ Kooro Amasea do ɡbemba dɛ tɔ laa tena la sie dɛ kaa Yar Fɛlembɔjen ta. Ba kpoo Edom laa tena kaɡboŋa fi bela.

¹² Ba berɔ lawɛ Edom laa tena la bini kaɡboŋa fi ɡe, dɛ kpɔ ba ka che bwejen bɛl doa waa lɔ bwɛjen Sela, dɛ taɡ ba ta, ba lee o lɔɡa dɛ serewe.

¹³ Israel laa tena Kooro Amasea aa ɡela ba berɛ kaa ŋɔ ba bɛ o nɛɛ teŋɛ la laa la ta la, kaa lɔ tɔ Juda bwɛjena ta, le Samaria kaa Bɛt Hɔrɔn, dɛ kpoo nɛra kaɡboŋa batoro, dɛ pa laala aa wara le bela kaa.

¹⁴ Kooro Amasea aa kaa kpoo Edom tena dɛ ba la, o pa bela voɡa dɛ ba cheɡa, dɛ toma dɛ kpoo kwaa dɛɛ ɛ sarahare a ta.

¹⁵ Anomanta, Korowii baah di Kooro Amasea nɛ, dɛ tomɛ o keame bɛl o be ŋɔ, “Ɛrɛɛ hɛɛ tomɛ harɛre ane voɡa aa wola wone lɛ a nɛra le he nɔn ta nɔɔ?”

¹⁶ Korowii keame la nyoa taa lɔ waa la ta wɛɛ bol la, Kooro Amasea ŋɔ o be ŋɔ, “Ya lee ŋɔ hɛɛ ja kooro aa? Tɔ nyoa! Gɛ laa aa, mɛɛ ɡeloo bá kpoe.” Ate, Korowii keame la tɔ nyoa, dɛ berɛ pili nyoa ŋɔ, “Taraken te n jemɔ kɛŋɔ Korowii dɛ ba he kpoe, dɛkalkɛ he vɛh waa maa jae ŋɔ he bɛ ɛ la.”

¹⁷ Juda Kooro Amasea ne nɛra baa dɛ jao vɔrɔwe Israel tena vɔrɔwa. Belaa o kpɔ kala tɛ Israel Kooro Jehoas waa ɛ Kooro Jehoahas bibaa, dɛ ɛ Kooro Jehu o fa aa di kora Israel la naa ŋɔ bá cheme dɔŋa dɛ yo laa.

¹⁸ Anee Israel Kooro Jehoas ɡe tomɛ toroma Juda Kooro Amasea be, dɛ sɛɡlo ŋɔ, “Lɛbanɔn harɛ ta jabalnadaŋɛ bɛlee fa ira, dɛ ka ŋɔ bela dajen bɛl be ŋɔ, ‘Kpɔ he bihaah tɛ mɛ ń tɛ n bie ó mo.’ Asɛ kpɔɡ bini ol bɛl ɡe ir, dɛ ba tiɡri jabalnadaŋɛ la ta dɛ laa kuuɡi.”

¹⁹ O berɔ ŋɔ Kooro Amasea be ŋɔ, “He yo Edom tena dɛ pɔ ba nɛ he nyu bini do he som, ɡel a maɡre he ne dɛ́ so he dem. Ɛrɛɛ hɛɛ nyin waa ba dawɛ ya nɛ, dɛ́ chɔɡ he kora ne Juda tena nɔɔ?”

²⁰ Kɛ Kooro Amasea ta a mun noɛ, dɛkalkɛ Korowii dɛ nyin kɛŋɔ ó kpɔ ba do Kooro Jehoas nɔn ta, toma baa dɛ tomɛ Edom harɛ ta voɡa la wa.

²¹ Anomanta, Israel Kooro Jehoas ne Juda Kooro Amasea kaa cheme dɔŋa Bɛt Sɛmɛs waa lɔ Juda harɛ ta, dɛ yo laa.

²² Israel laa tena pɔ Juda laa tena nɛ, asɛ ba chwa peɡre kaa ba bwɛɛre.

²³ Israel Kooro Jehoas lawɛ Juda Kooro Amasea, dɛ kpɔɔ kaa Jerusalam, dɛ ka kuuɡi danjwɛɛ waa baro la. Ba kuuɡu le Efrem Doonyoa ka tel bobɛl baa dɛ yerɔ Loŋkora Doonyoa. O jaŋne ɛɛ ɛ naɡale lafraanumɛlee.

²⁴ Kooro Jehoas pa suuɡaswɛm ne suuɡapoŋa ne kwaa aa lɔ Korowii Dea, Lewi dea te Ɔbɛd Edom naanar aa dɛ nyiŋi a ta, ne koodem bela laala a yoɡ aa kpeɡa kaa Samaria. O lawɛ nɛra ɡe ja kaa.

²⁵ Juda Kooro Joas bibaa Kooro Amasea di bene fi dɛ anue, Israel Kooro Jehoahas bibaa Kooro Jehoas seo habɔɔ.

²⁶ Waa aa bera chiɡ Juda Kooro Amasea kora dii ta, le mumpar ba a jaɡa la, ba chwera do Juda ne Israel Koranar Waa Tɔne bini.

²⁷ Le ɡɛ saŋ Kooro Amasea aa vɛh Korowii toma la, dɛ ba dɛ vɔrɔwe o kpoe vɔrɔwa Jerusalam. Anomanta, o chwao kaa bwɛjen Lakes ta, asɛ ba tomɛ nɛra ba teŋɛ la, dɛ ka kpoo bela.

²⁸ Ba kpɔ o chɔɔ dawɛ jaaɡɔ ta ba Jerusalam, asɛ ba huɡo bela baa huɡe o naawa Jerusalam waa ɛ Kooro Devid Bwɛjen la ta.