2 Webena 24 - mzwDBL

Juda Kooro Joas

¹ Kooro Joas aa di kora Juda harɛ dɛ o dɔ bene anuanɛ. O soɡe Jerusalam di kora bene fifraanaarɛ. O nya sɔne Sebea, dɛ le bwɛjen Beɛseeba.

² Kooro Joas ɛ waa aa too Korowii tea, ɡɛ saŋ sɔfo Jehoiada aa dɛ di sɔfore bwa.

³ Sɔfo Jehoiada mo haahna banɛ tɛ Kooro Joas, asɛ o dɔ bibaala ne bihaahna.

⁴ A habɔɔ la, Kooro Joas liiro kɛŋɔ wɛɛ berɔɔ kwaa Korowii Dea la.

⁵ Asɛ o yerɛ sɔfore ne Lewi dea tena cheme, dɛ ŋɔ ba be ŋɔ, “Hé ɡaaɡe Juda harɛ bwɛjena ta, dɛ́ lɛ toɔ aa chɛ kɛ bɛlbwa bɔ benanyoa la ba, ásɛ n kpɔ kwaa Korowii Dea la. Hé ɛa warane.” Kɛ Lewi dea tena la ta mun pae warane.

⁶ Anomanta, o yerɛ Sɔfonomoa Jehoiada dɛ ŋɔ o be ŋɔ, “Ɛrɛɛ he ta nyiŋe Lewi dea tena la Juda ne Jerusalam, dɛ ka lɛ benanyoa bɛlbwa toɔ, Korowii bonɔɔ Mosis ne Israel tena bwa aa ŋɔa bá ka lɛ ba kwaa Korowii Dea Cheremibɔr laɔ?”

⁷ Dɛ Haŋkooro Atalia nyubinikpeɡ te la habɔteŋra ku Korowii Dea la, dɛ pa kwaa aa do ɡoroŋ la bini ane kaa tomɛ voɡ Baalre.

⁸ Ate, Kooro Joas do Lewi dea tena la ŋɔ, bá kwaa daka cheɡ Korowii Dea la doonyoa dɛɛ lɛ suuɡare.

⁹ Ate, ba kpɔ kala ka tɛ Juda ne Jerusalam tena ŋɔ, nómɛlbwa kpɔ toɔ Korowii bonɔɔ Mosis fa aa lɛa Israel tena be pua hɛŋle ɡbo harɛ ta la ba.

¹⁰ Nɛra la ne ba nomonome kpɔ ba toɔre ba silɛɛ ne, asɛ daka la su.

¹¹ Tɔpere bɛlbwa, Lewi dea tena la yon kpɔ daka la ba koodem karakere baa dɛ nyiŋi o ta la be. Dɛ o suu waa, karakere la ne Sɔfonomoa nachiɡe yon fuɡa, dɛ berɛ kpɔ daka la ka cheɡ o buɡ ta. Gɛɛ baa ɛ tɔpere bɛlbwa dɛ dɔ suuɡa a warɛ.

¹² Kooro Joas ne sɔfo Jehoiada yon kpɔ suuɡa la do nɛra Korowii Dea kwaara aa lɔ ba nɔn ta. Ásɛ ba kpɔ mamaala ne kapenta tena, dɛ nɛra baa jemɛ bune ne ayaawa toma ŋɔ ba kwaa Dea la.

¹³ Tom-ɛɛra la do sie ɛ toma kohona, dɛ ɡel Korowii Dea la berɛ do ɡɛ o fa aa doa wubwa la, dɛ do kpeɡri kɛrɛdɛ.

¹⁴ Tom-ɛɛra la aa tona la, ba kpɔ suuɡaswɛm ne suuɡapoŋa la kar tɛ kooro ne sɔfo Jehoiada, asɛ ba kpɔ kwaa loɡbaala ne konjeɡre bwa soo siwi baa hiah cheɡ Korowii Dea la bini. Sɔfo Jehoiada bere saŋ, nɛra kpɔ saraha kwaa baa fuah dɛɛ ba Korowii Dea bela saŋ bɛlbwa.

¹⁵ Sɔfo Jehoiada hwɛɛhrɔ taeh mɔɔ dɛ sewɛ, dɛ o di bene lafa fifraatoro.

¹⁶ Ba huɡo koranar huɡribɔr Jerusalam waa ɛ Kooro Devid Bwɛjen ta, o wedɛɛɡa waa ɛa Israel harɛ tɛ Korowii ne Korowii Dea toma la wa.

Kooro Joas nyubinikpeɡ wa

¹⁷ Kɛ sɔfo Jehoiada aa sewa habɔɔ la, Juda nomonome ba Kooro Joas be, dɛɛ soŋo ŋɔ wɛɛ no ba deŋna wa.

¹⁸ Juda harɛ nɛra vɛh Korowii ba naawa fa aa dɛ tomɔ la ka toma o Dea bela, dɛ kaa tomɛ voɡhaah Asera dajaŋa ne voɡa. A ɡɛ wechɔɡa nɔ nomanta, Korowii baah di Juda tena ne Jerusalam tena nɛ.

¹⁹ Korowii tomɛ o keamere ba be, dɛ kah ba ŋɔ bá charɛ dɛ berɛ ba o be, kɛ ba vɛoh.

²⁰ Belaa Korowii Doma ba so sɔfo Jehoiada bibaa Sekaria nɛ, asɛ o ka che nɛra la sie dɛ ŋɔ, “Waa Korowii aa dɛ bol he be laanee nɔ, ‘Ɛrɛɛ he vɛh n waa maa do heyaa a ta nɔɔ? He wobɛlbwa aa werii do tɛ heyaa bwa. Haa vɛh mɛ nomanta, n ɡe vɛh heya.’ ”

²¹ Kooro Joas sɛoh o ne ba vɔrɔwe Sekaria vɔrɔwa. Asɛ o ɡel ba foɡro bwea Korowii Dea dembaah dɛ kpoo.

²² Kooro Joas soh ɡɛ Sekaria mɛɛ sɔfo Jehoiada aa chao la, dɛ ɡarɛ kpo Sekaria. Waa chɔa dɛɛ sewɛ la o ŋɔ, “N dɛ soŋe kɛ Korowii na waa haa ɛa nɔ, dɛ́ bɔe a kem!”

Kooro Joas kora dii jaɡa

²³ Lɔmɔɡa saŋ aa tela la, Siiria laa tena warɔ, dɛ ba Juda ne Jerusalam ba yoo ba, dɛ kpoo ba nomonome bwa. Dɛ pa ba laala bwa kɛŋɔ laa ta kwa ka tɛ ba kooro Damaskɔs.

²⁴ Dɛ Siiria laa tena aa kanɛ, kɛ Korowii ɡelɔ ba yo, dɛ pɔ Juda laa tena baa wara kohona nɛ, dɛkalkɛ ba vɛh Korowii ba naawa aa dɛ tomɔ la. Gɛɛ a do Kooro Joas dɔ o deŋnetɛra.

²⁵ Baa do Kooro Joas bol laa ta la, Siiria laa tena la kaalɔ, belaa o nomonome la banɛ vɔrɔwe o vɔrɔwa dɛ kpoo, kpoe waa kpo sɔfo Jehoiada bibaa la wa. Ba kpoo ɡɛ saŋ dɛ o chɔ mpa ta, asɛ ba huɡo Jerusalam waa ɛ Kooro Devid Bwɛjen ta, kɛ koranar huɡribɔr laa.

²⁶ Nɛra baa vɔrɔwe o kpoe vɔrɔwa la bɛl sɔne Sabad. O nya sɔne Simiat dɛ ɛ Amɔn te, ne Jehosabad, o ɡe nya sɔne Simrit dɛ ɛ Moab te.

²⁷ Ba chwerɛ Kooro Joas bii waa ne ɡɛ Korowii keamere aa bol o wa, ne ɡɛ waa bera kwaa Korowii Dea la waa do Koranar Waa Tɔne bini. O bibaa Amasea baa chiɡ o naa ta, dɛ di kora.