2 Webena 23 - mzwDBL

¹ Bene anuanɛ ta la, sɔfo Jehoiada baɡle o kpeɡri. O ne laa sitɔɔla baa chɔ laa tena lafare nyoo, ne Jɛroham bibaa Asaria, ne Jehohanan bibaa Ismael, ne Ɔbɛd bibaa Asaria, ne Adaya bibaa Maaseya, dɛ Sikri bibaa Elisafat fɔwɛ fɔo.

² Ba la Juda harɛ bwɛjena ta, dɛ ka kpɔ Lewi dea tena ne nomonnyuune baa chɔ Israel deene nyoo bwa ba Jerusalam.

³ Asɛ nɛra la bwa ne kooro bibaa Joas ba cheme Korowii Dea dɛ fɔwɛ fɔo. Anee sɔfo Jehoiada ŋɔ ba be ŋɔ, “Kooro Ahasia bibaa Joas ɛɛ di koraa, ɡɛ Korowii aa baɡɛ Kooro Devid naanar nyoa la.

⁴ Gɛ maa dɛ nyin kɛ he sɔfore ne Lewi dea tena ɛ laanee kɛŋɔ, he balɔ dɛɛ ba ba daah Korowii Dea Ona Tɔpere aa, he bini bele batoro ba daah doonyoone la,

⁵ bele batoro ɡe ka daah koodem, bele batoro ɡe do Mumpar Doonyoa, ásɛ nɛra la kabora ka boa nyoa Korowii Dea dembaahna bela.

⁶ Nomɛlbwa bɛ Korowii Dea la bini jo, atane sɔfore ne Lewi dea tena baa lɔ bela dɛɛ ɛ toma. Ba te ɛɛ won jo bela, dɛkalkɛ ba sɔ ba doŋa ta ba do ɡoroŋ. Kɛ banɔ la baa kaa la te chɛ kɛ bá teŋɛ waa Korowii aa bola la ta, dɛ́ so dahara.

⁷ Lewi dea tena chɛ kɛ bá kpɔ ba dɔmkwaa kpoŋe, dɛ́ che bar Joas, dɛ́ so o jwɛh, bobɛlbwa waa kaa. Ásɛ nomɛlbwa ba dɛ jo Korowii Dea aa, bá kpoo.”

⁸ Lewi dea tena ne Juda baala la ɛ ɡɛ sɔfo Jehoiada aa do ba la bwa. Ba bini bɛlbwa ta nɛra baa dɛ ba toma ta Ona Tɔpere ta, ne banɔ la baa wola toma ta ba Ona Tɔpere ta la ŋwɛnɛ tɛɛ ba kaa ba deremi.

⁹ Sɔfo Jehoiada kpɔ lampeare ne kwaa baa kpɔa dɛɛ tɔ ɡbemɡbe laa ta, a ɛ Kooro Devid kwaa ba kpɔ cheɡ Korowii Dea la tɛ laa sitɔɔla la.

¹⁰ Ate, o ɡel nɛra baa dɛ daah la bɛlbwa kpoŋe o dɔmkon ba che Korowii Dea ne saraha kon la sie, dɛ bar Kooro Joas.

¹¹ Name sɔfo Jehoiada ka lawɛ Joas le buse dɛ fuɡe noo do o nyu ta, dɛ cheɡo kora ta. Ba kpɔ kooɡbɛrɛ piu, dɛ kpɔ fɔo baa fɔwa dɛ che o ta dɛɛ di kora harɛ la ta do o nɔn ta. Asɛ ba lɔ kpaŋa dɛ moo ŋɔ, “Kórowii tɛ kooro mkpajaŋ!”

¹² Haŋkooro Atalia aa no moola nɛra baa dɛ daah ne nɛra baa lɔ bela aa dɛ moo la, o ɛ warane la ba be Korowii Dea bela.

¹³ O baa na kɛŋɔ kooro la cheɡɛ Korowii Dea la sie pila bɛl jwɛh ɡɛ ba nawee wa aa doa. Asɛ laa sitɔɔla ne bɛlhoohla che kooro jwɛh. Asɛ harɛ la ta nomɛlbwa sie lɛ, baa hoh bɛle, dɛɛ lɔ kwaa bwa soo siwi baa kpɔa dɛɛ hɛlɛ, asɛ yelɡoola ɡo yela tɔ ba sie. Belaa haŋkooro Atalia laa o batakaare kɛɛ, a baɡle kɛ o baah diu kohona, dɛ ŋɔ, “He bwa lee mɛ tɛ! He ɛɛ mɛ dɔm!”

¹⁴ Dɛ sɔfo Jehoiada aa nyin kɛ bá kpo Atalia Korowii Dea bɔr bela, anomanta, o do laa sitɔɔla la ŋɔ, “Hé lawɔ le laa tena nɔ baah ta, dɛ́ kpo nomɛlbwa waa dɛ nyin kɛ ó ba lɛo.”

¹⁵ Ate, ba tɛɡro le, dɛ kpoo Jaɡre Doonyoa bela jaɡre aa cheɡa dɛɛ jo koodem la ta.

¹⁶ Sɔfo Jehoiada ne Kooro Joas fɔwɛ fɔo o chɔ Korowii ne harɛ la nɛra baah ta kɛŋɔ nɛra la ɛɛ tomɛ Korowii.

¹⁷ Ate, harɛ la ta nɛra bwa la voɡ Baal dea, dɛ ka paɡre kwaa baa kpoo kwaa a ta dɛ ɛ saraha dɛɛ tɛo, ne voɡare aa lɔ dea la bini bwa, dɛ paɡre o dea la bwa ɡe kwaraa. Dɛ lawɛ o kerekpoŋri baa dɛ yerɔ Matan, dɛ kpoo kwaa ba fa aa dɛ ɛ sarahare o ta la sie.

¹⁸ Ate, Sɔfo Jehoiada kpɔ Korowii Dea bela toma do sɔfore ne Lewi dea tena nɔn ta. Banee Kooro Devid kpɔ do ba nɔn ta ŋɔ, báa fuh saraha kwaa baa kpɔa baa tɛ Korowii la, ɡɛ aa lɔ Mosis Mmara Tɔn bini. Dɛ banee chɔ yela ɡoe ne wobɛlbwa aa dɛ ba silɛɛ ne nyoa.

¹⁹ Sɔfo Jehoiada kpɔ nɛra ba che, baa daah Korowii Dea doonyoo la, ɡɛ aa ɛ ásɛ nomɛlbwa waa kah doŋa la bɛ Dea la bini jo.

²⁰ Sɔfo Jehoiada yerɛ laa sitɔɔla baa chɔ laa tena lafare nyoo ne nomonome dɛ nomonjena, asɛ ba kpɔ Kooro Joas le Korowii Dea bela ba. Ba kpɔ koodem Nyundua Doonyoa la ta jo, asɛ kooro ba so o kookara ta,

²¹ asɛ harɛ la ta nɛra bwa sie lɛ, bwɛjen la sɔɔh, kpoe baa kpo haŋkooro Atalia la wa.