2 Webena 22 - mzwDBL

Juda Kooro Ahasia

¹ Arab tena bane aa baa lɔ tɔ Kooro Jehoram bibanomonome bwa nɛɛ dɛ kpoo ba, asɛ a ka o bibaa bechala Ahasia la, Jerusalam tena cheɡo kora, o so o mɛɛ buɡ ta.

² Kooro Ahasia di bene fifraanɛ dɛ anɛ mɔɔ dɛ di kora. O soɡe Jerusalam dɛ di kora benanyoa beŋkpoŋ. O nya sɔne Atalia, dɛ Kooro Omri o fa aa di kora Israel harɛ ta ka la naa.

³ O ɡe teŋɛ waa Kooro Ahab ne o dem tena aa ɛa la ta, dɛkalkɛ o nya doo o ɛ wechɔɡa.

⁴ O ɛ wechɔɡa dɛ jo Korowii nɛɛ kɛ Kooro Ahab ne o dem tena, dɛkalkɛ o mɛɛ seo habɔɔ la, dɛ banee dɛɛ jao, a che a ta o chole.

⁵ Kooro Ahasia teŋɛ jae baa jao la ta, o ne Israel Kooro Joram ka yo Siiria harɛ Kooro Hasael bwɛɛ Ramɔt Gelead. Yoi la ta la, Siiria laa tena la do Kooro Joram bol.

⁶ Anomanta, o berɔ ba Jesreel dɛ baa chah, asɛ Juda Kooro Ahasia la ka nao.

⁷ Dɛ Korowiirii ɛa kɛŋɔ Kooro Ahasia ka na Kooro Joram dɛ kpoo. Waa laŋa la, o ne Kooro Joram laŋɔ ka cheme Nimsi bibaa Jehu, Korowii aa leo ŋɔ ó ba kpo Kooro Ahab dem nɛra la.

⁸ Kooro Jehu aa dɛ kpoo ba la, o kaa tel Juda nomonome ne Kooro Ahasia naanar baa ja o nɛɛ la, asɛ dɛ kpoo ba bwa.

⁹ O ɡelɔ baa ɡaaɡe Kooro Ahasia bɔr, asɛ o nɛra ka nao bwɛjen Samaria dɛ lawɔ. Ba kpɔɔ ba tɛ Kooro Jehu, asɛ o kpoo. Asɛ ba koh ɡɛ o mɛɛ Kooro Jehosafat aa nyin Korowii o bambile bwa ne waa dɛ huɡo. Anomanta, dɛ nomɛlbwa toole Kooro Ahasia dem, dɛ dɔ kpeɡri dɛ́ won nyiŋi Juda harɛ la ta kpa.

Juda Haŋkooro Atalia

¹⁰ Kooro Ahasia nya Atalia aa naa kɛ o bibaa Kooro Ahasia sewɔ la, o ŋɔ ba kpoo koobii baa ba di kora Juda harɛ ta bwa.

¹¹ Dɛ Kooro Ahasia mɛɛ bihaah bɛl sɔne Jehoseba, dɛ yalɛ sɔfo Jehoiada. O sɔɔh dɛ lɛ Kooro Ahasia bibaa Joas le koobii baa dɛ ba ba kpoora la bini, dɛ kpɔɔ ka sɔh o be dea, dɛ ɡel haah bɛl ɛɛ nyiŋi o nɛɛ Korowii Dea. O ɛ ɡɛ dɛ lɛo le haŋkooro Atalia kpoe o fe aa dɛ nyin o kpoe la nɔn ta.

¹² Jehoseba kpɔ Joas sɔh Korowii Dea bela bene anumɛl, ɡɛ saŋ haŋkooro Atalia aa dɛ nyiŋi harɛ la ta la.