2 Webena 20 - mzwDBL

Kooro Jehosafat yo Amɔn ne Moab tena

¹ A habɔɔ la, Moab ne Amɔn dɛ Meuni tena vɔrɔwe laa, dɛ́ ba yo Juda Kooro Jehosafat ne o nɛra.

² Asɛ nɛra bane ba ŋɔ Kooro Jehosafat be ŋɔ, “Laa tena damanta le Edom harɛ Yar Mpo baŋ le dɛɛ ba dɛ́ ba yoi. Ba tel Hasasɔn Taama.”

³ Kooro Jehosafat ɔmɔ, dɛ bɔɔ le Korowii be ŋɔ ó baɡlo ɡɛ waa ɛ, asɛ dɛ ŋɔ Juda te bɛlbwa vɔwɛ nyoa, á baɡle kɛ ba dɛ di suna.

⁴ Juda tena baa cheme Jerusalam, dɛ ba bɔɔ le Korowii be. Juda harɛ bwɛɛ bɛlbwa taa nɛra le, dɛ ba soŋe Korowii.

⁵ Ate, Kooro Jehosafat ir che nɛra baa le Juda ne Jerusalam bwa sie, Korowii Dea dembaah onfale la sie,

⁶ dɛ ŋɔ, “N Naa Korowii ya naawa aa tomɛ, henee dɛɛ di kora nyundua ne harɛre nɛra bwa nɛ. Henee dɔ bokpeɡa ne kpeɡri kohona, nomɛlbwa toole dɛ́ won che he sie.

⁷ Henee Korowii yaa dɛ tomɛ. He doŋi nɛra ba fa aa soɡe harɛ nɔ ta le he nɛra Israel tena sie, dɛ kpɔ tɛ he dam Abraham naanar, o ɛ ba kon saŋ bɛlbwa dɛɛ la.

⁸ Ba soɡe harɛ nɔ ta dɛ do Dea he sɔn ta dɛ ŋɔ,

⁹ ‘Dɛ wechɔɡa ane bɛlbwa ba ya nɛ, dɛ laa kɛɛ weechɔɡa kɛɛ lɔr aa, yaa ka che Dea nɔ sie he siee, dɛ́ wi noe a wa, ásɛ he no dɛ́ lɛ yaa.’

¹⁰ Taraken, Amɔn ne Moab ne Edom tena balɔ dɛ́ ba yo yaa. Ya naawa fa aa le Ijipt harɛ ta dɛɛ ba la, he ta ɡelɛ ba jo ɡɛ harɛre la ta. Ba valɔ dɛ bar ba, dɛ ɡel ba kpoora.

¹¹ Na waa taraken baa kpɔa dɛɛ ba ba bɔ yaa kem kɛŋɔ, bá doŋi yaa le harɛ haa kpɔa tɛ yaa o ɛ ya kapɛrɛ kon la ta.

¹² Henee Korowii yaa dɛ tomɛ. Tɛr ba deŋne, dɛkalkɛ ya ta kpeɡri dɔe dɛ́ won che laa tena baa wara dɛɛ ba ya nɛɛ nɔ sie. Yaa jemɛ ɡɛ yaa ɛ, he siwi taa yaa nyiŋi.”

¹³ Dɛ Juda harɛ ta baala ne ba haahna ne bii bwa cheɡɛ Korowii Dea la sie.

¹⁴ Belaa Korowii Doma ba so Sekaria bie Jahaseɛl nɛɛ nɛnlaa la baah. Sekaria mɛɛ sɔne Bɛnaya, Bɛnaya lolɛ Jeyɛl, Jeyɛl lolɛ Matania. Jahaseɛl ɛ Lewi dea te dɛ le Asaf dea.

¹⁵ Anee Jahaseɛl ŋɔ, “N naa kooro, ne nɛra haa lɔ Juda ne Jerusalam bwa, hé no. Waa Korowii aa dɛ bol he be laanee nɔ, ‘He bɛ ɔmɛ, he bɛ ɡel he bwara yɔr laa tena baa wara nɔ wa. Korowiirii dɛ́ yo tɛ heya.

¹⁶ Hé ir ka yoo ba kere, ɡɛ saŋ baa teeh kpɔ ŋwɛnɛ bɛl waa chɔa kaa Sis dɛɛ ba la. Hɛɛ ka chem ba fɛlembɔjen la nyoa Jeruel waa lɔ pua hɛŋle ɡbo harɛ la bɔr.

¹⁷ He laa dɛɛ ba laa nɔ yoi. Hé te ka che he chebɔra dɛɛ kpa. Hé che kiŋkiŋ, ásɛ dɛ na ɡɛ Korowii aa yo tɛ heya, dɛ́ ɡel he pɔ ba nɛ. Juda ne Jerusalam tena, he bɛ ɔmɛ, he bɛ ɡel he bwara yɔr, hé te le ka puu ba kere, dɛ́ na ɡɛ Korowii aa ja he nɛ.’ ”

¹⁸ Asɛ Kooro Jehosafat ɡuŋi dɛ kpɔ sie pi harɛ. Asɛ nɛra la ɡe bwa ɡuŋi dɛ jam Korowii.

¹⁹ Ate, Lewi dea tena bane baa le Kohat ne Kora deene ta la ir che, dɛ kpɛɛ Korowii Israel tena aa dɛ tomɔ takpeɡ ne.

²⁰ Tɔ aa pera chɔɔ la, ba leɔ kaa Tekoa pua hɛŋle ɡbo harɛ ta bela. Baa dɛ ba kaala la, Kooro Jehosafat iro che dɛ ŋɔ, “Hé no, Juda ne Jerusalam tena. Hé yarada Korowii haa dɛ tomɔ la, dɛ́ yarada waa o keamere ɡe aa bola la, aa chiɡ heyaa kɛrɛdɛɛ.”

²¹ Kooro ne nɛra la bane bol wa, asɛ o le yelɡoola bane ŋɔ bá ɡo yela kpɛɛ Korowii, o ɡoroŋ waa doa dɛ do kan kohona la wa, asɛ ba tɔ laa tena la sie dɛɛ ɡo yela ŋɔ, “Hé kpɛɛ Korowii o nyina waa dɛ nyin yaa lole saŋ bɛlbwa dɛɛ la.”

²² Baa pa mun dɛɛ ɡo yela la, Korowii ɡelɔ Amɔn ne Moab, dɛ Edom laa tena baa dɛ ba ba lɔ tɔ Juda tena nɛɛ dɛ́ yoo ba la wili.

²³ Amɔn ne Moab laa tena pɛo, dɛ yo Edom laa tena dɛ kpoo ba bwa kwaraa. Baa kpoo ba tonɛ la, ba berɛ sie dɔŋa be dɛɛ kpoo dɔŋa, ka tel kɛŋɔ ba bwa aa tona.

²⁴ Juda laa tena la baa tel bobɛl o sie aa chaɡɛ pua hɛŋle ɡbo harɛ la ta, asɛ dɛ ha sie nyiŋi, dɛ na kɛŋɔ laa tena damanta la bwa serewɔ chɔ. Beŋkpoŋ kwaraa ta kae.

²⁵ Ate, Kooro Jehosafat ne o laa tena la ka pa ba laala kɛŋɔ laa ta kwa. Ba na nae ne dɔmkwa dɛ suuɡaswɛm koŋkwaare a yoɡ aa kpeɡa warɛ taeh. Tɔpera atoroo ba won kpɔ boa a bwa nyoa, kɛ ba ta wone kpɔ a bwa, dɛkalkɛ dɛ a warɔ kɛrɛdɛ.

²⁶ Tɔpenaarɛ wee la, ba kaa cheme Bɛraka Fɛlembɔjen ta ɡo yela, dɛ kpɛɛ Korowii a wa. A waa baa yerɔ Bɛraka Felembɔjen ba le fini la.

²⁷ Ate, Kooro Jehosafat tɔ o laa tena sie, asɛ ba berɛ ba Jerusalam silɛɛ ne, dɛkalkɛ Korowii ɡelɔ ba pɔ ba dɔma nɛ.

²⁸ Baa tel Jerusalam la, ba lɔ janjelare dɛ hoh bɛle ka jo Korowii Dea.

²⁹ Harɛ bɛlbwa nɛra no ɡɛ Korowii aa yo Israel tena dɔma tɛɛ ba la aa, dɛ ɔmee kohona laɡ ba.

³⁰ Anee ɡela Kooro Jehosafat dɔ deŋnesɔɔhna o harɛ waa dɛ di kora o ta, dɛkalkɛ Korowii waa dɛ tomɔ ja o nɛ ŋwɛnɛ bɛlbwa ta.

Kooro Jehosafat kora dii jaɡa

³¹ Kooro Jehosafat aa di kora Juda harɛ dɛ o di bene fifraatoro dɛ anue. O soɡe Jerusalam dɛ di kora bene fifraanɛ dɛ anue. Dɛ o nyaa Silhi bihaah Asuba.

³² Kooro Jehosafat ɛ ɡɛ o mɛɛ Kooro Asa aa ɛa wobɛlbwa ta, o ta an ɡelɛ. O ɛ waa aa toɡra Korowii be.

³³ Deŋɡarere voɡtoroma aa dɛ tomɛ voɡa la te, o ta an chɔɡɛ. Ba ta ba bambile bwa kpɔe tomɛ Korowii ba naawa fa aa tomɔ la.

³⁴ Waane ɡe Kooro Jehosafat aa ɛa, le mumpar ba a jaɡa, ba chwera ja Hanani bibaa Jehu bwara waa aa lɔ Israel Koranar Waa Tɔne bini.

³⁵ A habɔɔ, Juda Kooro Jehosafat ne Israel Kooro Ahasia o nyu bini aa kpeɡa kohona la fɔwɛ nyopɛo fɔo.

³⁶ Kooro Jehosafat ne Kooro Ahasia pɛo, dɛ ɛ stiimaere aa kpeɡa, ba kpɔ dɛɛ kpɔ mpo sie dɛɛ la bonadibɔr. Baa kwaara Eseɔn Gɛba tonɛ la,

³⁷ Dodavahu waa le Maresa bibaa Korowii keame Eliesa cheɡɛ Korowii waa ta, dɛ kah Kooro Jehosafat ŋɔ, “He ne Kooro Ahasia aa fɔwɛ nyopɛo fɔo nomanta, Korowii ɛɛ chɔɡ kwaa haa ɛa nɔɔ.” Anomanta, stiimaere la paɡrɔ ba ta wone kpɔa la bonadibɔr.