2 Webena 2 - mzwDBL

Korowii Dea mae wa

¹ Kooro Solomɔn ɛ o liire kɛŋɔ wɛɛ do Dea tɛ Korowii baa tomɔ o bini Jerusalam, dɛ́ berɛ do o ɡbaɡba koodem.

² O le nɛra kaɡboŋa fifraanuanɛ ŋɔ baa che a laala, nɛra kaɡboŋa fifraanuatoro ba ɡe aa dɛ peɡri bwea deŋɡarere ta. Dɛ kpɔ nɛra kaɡboŋa batoro lafraanumɛl ba ɡe aa dɛɛ nyiŋi tom-ɛɛra la nɛ.

³ Kooro Solomɔn kpɔ kala tɛ Taaya Kooro Hiram ŋɔ, “Tɛ mɛ peleme daa ɡɛ haa tɛ n mɛɛ Kooro Devid o do koodem la.

⁴ N dɛ ba Dea doe tɛ Korowii maa dɛ tomɔ, ásɛ baa tomɔ o bini. Wɛɛ do ɡoroŋee, ásɛ n ne n nɛra fuh daawiile a sɔɔh aa soma dɛɛ tomɔ bela, dɛ́ kpɔ paanoo baa lea cheɡ tɛ Korowii o do ɡoroŋ dɛɛ ba o sie tɔpere bɛlbwa, dɛɛ fuh saraha kwaa chɔɔ ne jɔmɔra, ne Ona Tɔpera ne Korobifala Tɔpejena, dɛ tɔpejena ane Korowii yaa dɛ tomɔ aa lea cheɡ. Gɛ waa nɔ chɔ le tɛ Israel tena saŋ bɛlbwa dɛɛ la.

⁵ Korowii Dea maa dɛ ba doe nɔ kan, dɛkalkɛ Korowii yaa dɛ tomɔ la kan ɡwaa voɡare bwa.

⁶ Nomɛlbwa toole dɛ́ won do Dea tɛ Korowii, dɛkalkɛ nyundua ɡba aa kanɛ tɛo ó so bela. N ɡee ume, n ŋɔ ń do Dea tɛo ó ba so o bini nɔ? Atane bɔr baa fuh saraha kwaa dɛɛ tɛo o sie ɡbo.

⁷ Anomanta, tɛ mɛ nɛn waa dɔ wejema, dɛ́ won di ɡwine dawɛ suuɡaswɛm kɛɛ suuɡapoŋ kɛɛ ayaawa dɛ bune ta, dɛ́ berɛ won kpɔ jiseburum ne jisekɔl, dɛ onswɛm sɔh yal. Wɛɛ ba ja Juda ne Jerusalam nɛra baa dɔ kwaa sɛɛh wejema n mɛɛ Kooro Devid lee ba la nɛɛ baa ɛ toma.

⁸ N ɡbabir jemɛ ɡɛ he tom-ɛɛra aa dɔ daa teŋna wejema, anomanta, tɛ mɛ peleme daa ne dadɛɛɡa ane soo siwi aa lɔ Lɛbanɔn harɛ. N nɛra ɛɛ ba ja ba nɛɛ,

⁹ bá nyin daa a warɛ ba tɛ mɛ, dɛkalkɛŋɔ Korowii Dea maa dɛ ba doe la chɛ kɛŋɔ ó do kan dɛ́ do wer kohona.

¹⁰ Mɛɛ bɔ he nɛra baa ba ɛ daa la toma la kemee. Mea a tɔɡre aa ɛ boyu baaɡe kaɡboŋa fifraanaarɛ, ne ane soo siwi a tɔɡre aa ɛ boyu baaɡe kaɡboŋa fifraanaarɛ, dɛ sen ɡalɔŋre kaɡboŋa lafa, dɛ ɔleve noo ɡalɔŋre kaɡboŋa lafa.”

¹¹ Asɛ bwɛjen Taaya Kooro Hiram chwerɛ tɔn ba tɛ Kooro Solomɔn ŋɔ, “Korowii aa dɛ nyin o nɛra la waa o cheɡe ŋɔ he ɛ ba kooro.”

¹² Dɛ berɛ ŋɔ, “Yá kpɛɛ Korowii Israel tena aa dɛ tomɛ, o ta nyundua ne harɛ. O tɛ Kooro Devid bibaa waa dɔ wejema, dɛ dɔ waa mun noe kohona, dɛɛ ba Dea doe tɛ Korowii dɛ́ berɛ do o koodem.

¹³ N berɔ dɛɛ tomɛ nɛn waa dɔ kwaa sɛɛh wejema kɛrɛdɛ, baa yerɔ Hiram Abi he be.

¹⁴ O nya le Dan dea, asɛ o mɛɛ le Taaya. O dɔ suuɡaswɛm ne suuɡapoŋ ne ayaawa dɛ bune ne bwea, dɛ daa kpɔe dɛ ɛ kwaa wejema. Dɛ jemɛ jisekɔl ne jiseburum, ne onswɛm ne ompoŋ bwa kpɔe sɔh yapondɛɛɡe. Wɛɛ di ɡwine bɛlbwa baa baɡlo dawɛ kon ta. Gel o ba ja he nɛra baa dɔ kwaa ɛɛ wejema, ne he mɛɛ Kooro Devid nɛra baa dɔ kwaa ɛɛ wejema la nɛ.

¹⁵ Anomanta, ɡel mea ne ane soo siwi ne ɔleve noo dɛ sen haa baɡɛ nyoa la tel he bonɔɔ be.

¹⁶ Ásɛ ya teŋe daa haa dɛ nyin la bwa le Lɛbanɔn dɛ́ vɔrɔwa, ásɛ dɛ taɡa kpɔ mpo sie ba tɛɛ Jopa waa lɔ mpo nyoa, he ba kpɔ kaa Jerusalam.”

Korowii Dea mae mumpar

¹⁷ Ate, Kooro Solomɔn ɡel ba kure hɔɔhra baa soɡe Israel harɛ ta bwa, ɡɛ tenten o mɛɛ Kooro Devid fa aa kure nɛra la. Ba lɔ nɛra kaɡboŋa lafa fifraanue dɛ batoro lafraanumɛl.

¹⁸ O le ba bini kaɡboŋa lafraanuanɛ baa che bone, kaɡboŋa lafraanuatoro baa peɡri bwea deŋɡarere ta, asɛ kaɡboŋa batoro lafraanumɛl ɡe ɛɛ nyiŋi ba nɛ, bɛlbwa ɛ toma aa chɛ kɛŋɔ ó ɛ.