2 Webena 19 - mzwDBL

¹ A balɔ kɛŋɔ Juda Kooro Jehosafat berɔ ba o koodem Jerusalam deŋnesɔɔhna ta,

² asɛ Hanani bibaa Jehu waa ɛ Korowii keame la ka cheme Kooro Jehosafat dɛ ŋɔ, “A chɛ kɛŋɔ hé cha nyubinikpeɡ tena, ásɛ dɛɛ nyin nɛra baa hah Korowii aa? Gɛ nomanta, Korowii bandia ba he nɛ.

³ Kɛ he ɛ wedɛɛɡa tama ane, dɛkalkɛ he teŋni voɡ Asera daa nɛra aa dɛ tomɛ le he harɛ ta, dɛɛ teŋɛ waa Korowii aa dɛ nyin ta.”

Kooro Jehosafat le o nomonome

⁴ Dɛ Kooro Jehosafat soɡe Jerusalam, kɛ o yon ir la harɛ la nɛra be, le Beɛseeba waa lɔ weekaŋle harɛbɔr, ne Efrem deŋɡarere harɛ waa lɔ weekaŋle nyunduabɔr, dɛ charɛ ba liire le Korowii ba naawa aa tomɔ la be.

⁵ O le nɛra baa bol waa dɛɛ pa bole bwɛjen bɛlbwa baa ma danjwɛkpeɡ baro Juda harɛ ta,

⁶ dɛ ŋɔ ba be ŋɔ, “Hé nyiŋi dɛ́ bol waa dɛɛ pa bole aŋwɛnɛ ta, nɛn kpeɡri ne laa, Korowii kpeɡri taa, wɛɛ ja he nɛɛ he waa bola dɛɛ pa bole ta.

⁷ Hé kpɔ duure dɛɛ tɛ Korowii, dɛ́ nyiŋi kɛrɛdɛ dɛɛ bol waa aŋwɛnɛ ta, dɛkalkɛ Korowii yaa dɛ tomɔ be te, waa waa sie berɛ bole pae ta, waa nɛn siebɔr kɛɛ sen yawa nyiŋi.”

⁸ Jerusalam ɡe la, Kooro Jehosafat le Lewi dea tena ne sɔfore, dɛ Israel nomonnyuune baa chɔ ba lolanar nyoo ŋɔ, baa nyiŋi nomɛlbwa waa koni Korowii Mmara la, dɛ́ bol nɛn ne o dɔŋ baah wa, dɛɛ pa bole Jerusalam.

⁹ O do ɡɛ nomonome la ŋɔ, “Hé kpɔ kasinteŋ ne bambidɛɛɡe, dɛ Korowii ɔma dɛɛ ɛ he toma.

¹⁰ He bini bɛlbwa le bwɛjena nɔ ta, dɛ ba waa aa ɛ nɛŋkpoa kɛɛ Korowii Mmara la bini bɛlbwa ne naa, hé kah ba ŋɔ ba bɛ wechɔɡa ɛ dɛ́ jo Korowii nɛ, ásɛ o bandia bɛ he nɛɛ ba. He ɛ ɡɛ naa, haa bolchɔɡee di.

¹¹ Sɔfonomoa Amariaa dɛɛ ba he sie tɔe Korowii waa bwa ta, ásɛ Ismael bibaa Sebadia waa ɛ Juda dea nomoa la chɔ waa aa ɛ kooro waa nyoa, ásɛ Lewi dea tena la ɡe ɛɛ cha heya. Hé ɛa bambile bwa ne, Korowiirii dɛ ja banɔ la baa ɛa kɛrɛdɛ la nɛ.”