2 Webena 18 - mzwDBL

Korowii keame Mikaya jae waa ja Kooro Ahab

¹ Kooro Jehosafat dɔ kondɔɔh, asɛ o sɔn ɡe le kohona. O cheɡɛ hahmor ta o ne Kooro Ahab kpɔ darame.

² Bene ane aa baa kaa habɔɔ la, Kooro Jehosafat la bwɛjen Samaria, dɛ ka na Kooro Ahab. Kooro Ahab kpoo peera ne nae kohona tɛ Kooro Jehosafat, ne nɛra baa ja o nɛ, dɛ kpɔ tɛɛ ba jirima, dɛ soŋe Kooro Jehosafat ŋɔ, ó ja o nɛ, bá ka yo Ramɔt Gelead tena.

³ Asɛ Israel Kooro Ahab bɔɔ Juda Kooro Jehosafat ŋɔ, “Hɛɛ ja n nɛɛ yá ka yo Ramɔt Gelead tena aa?” Kooro Jehosafat ŋɔ, “N sɛh ɡɛ, n ne he bwa ɛ beŋkpoŋ. N nɛra ɛ he nɛra, yaa ja he nɛɛ dɛ́ ka yo.”

⁴ Dɛ berɛ ŋɔ Kooro Ahab be ŋɔ, “Gel ya soŋe le Korowii be mɔɔ.”

⁵ Anomanta, Kooro Ahab yerɛ Korowii keamere lafraanaarɛ, dɛ kpɔ bil ba sie ŋɔ, “Ń ka yo Ramɔt Gelead tena kɛɛ ń ɡel ɔ?” Ba ŋɔ, “La ka yoo ba, Korowii ɛɛ kpɔ baa do he nɔn taa.”

⁶ Ate, Kooro Jehosafat bɔɔ ŋɔ, “Amɔ Korowii keame bɛlbwa toole yá che o nɛɛ dɛ́ soŋe le Korowii be naa?”

⁷ Anee Kooro Ahab chaŋe ŋɔ, “Korowii keame beŋkpoŋ bɛl lole. Onee Imla bibaa Mikaya. Kɛ n ne waa somɛ, dɛkalkɛ o ta wobɛlbwa nae le Korowii be dɛ tɛ mɛ a ɛ wedɛɛɡa tɛ mɛ bwa, atane wechɔɡa ɡbo.” Kooro Jehosafat ŋɔ, “N naa kooro, bɛ ɡɛ ŋɔ.”

⁸ Asɛ Kooro Ahab yerɛ o nomonome la bini bɛl dɛ ŋɔ, “La ka kpɔ Imla bibaa Mikaya ba taraken.”

⁹ Dɛ Israel Kooro Ahab ne Juda Kooro Jehosafat do ba koolaala, dɛ so ba kookane ta, pɛla bɛl waa bɛne bwɛjen Samaria doonyoa, asɛ Korowii keamere la bwa che ba sie, dɛɛ bol waa baa naa ba be.

¹⁰ Keamere la bini bɛlee, Kenaana bibaa Sedekia. O kpɔ bune ɛ kwaane a do kɛ nyeɡlare. O ŋɔ Kooro Ahab be ŋɔ, “Waa Korowii aa dɛ bol laanee nɔ. ‘Kwaa nɔɔ hɛɛ ba kpɔe yo Siiria tena dɛ́ pɔ ba nɛ.’ ”

¹¹ Dɛ ɡɛ tentenee keamere la bwa bol Korowii waa dɛɛ ŋɔ, “Ka yo Ramɔt Gelead tena, hɛɛ pɔ ba nɛɛ. Korowii ɛɛ ɡeloo he pɔ ba nɛ.”

¹² Torome waa laŋa ka ɡaaɡe Mikaya bɔr la ŋɔ o be ŋɔ, “Korowii keamere la bwa nyoa pɛo ba bol ŋɔ kooro wobɛlbwa chiɡo kɛrɛdɛ. Sɛh dɛ́ ɡel he ne ba waa la ɛ beŋkpoŋ.”

¹³ Anee Korowii keame Mikaya chaŋe ŋɔ, “N ŋwɛɛ Korowii waa lole kɛŋɔ, mɛɛ bol waa Korowii maa dɛ tomɔ aa ŋɔa ń bol o bee.”

¹⁴ Mikaya aa ba Kooro Ahab be la, kooro pɛɛro ŋɔ, “N ne n dɔŋ Kooro Jehosafat ka yo Ramɔt Gelead tena kɛɛ yá ɡel ɔ?” Mikaya chaŋe ŋɔ, “Hé la ka yoo ba, Korowii ɛɛ ɡeloo hé pɔ ba nɛ.”

¹⁵ Asɛ Kooro Ahab ŋɔ o be ŋɔ, “Keraŋwɛnɛɛ ń ɡel he ŋwɛɛ kɛŋɔ hé bol kasinteŋ Korowii sɔn ta nɔ?”

¹⁶ Mikaya ŋɔ, “N na Israel laa tena baa perɛ deŋɡarere ta kɛŋɔ peera aa wola teɡre dɔe ken. Asɛ Korowii ŋɔ, ‘Ba ta sitɔɔ dɔe, ɡel bá berɛ kaa dem deŋnesɔɔhna ne.’ ”

¹⁷ Belaa Kooro Ahab ŋɔ Kooro Jehosafat be ŋɔ, “N ta he be ŋɔe ŋɔ o ta wedɛɛɡa bolɛ n be bwa atane wechɔɡa ɡbo aa?”

¹⁸ Korowii keame Mikaya berɛ teŋɛ dɛ ŋɔ, “No waa Korowii aa bola. N nao kɛŋɔ Korowii aa soɡe o kookara ta nyundua, o dɔm baa ja o nɛ dɛɛ tomɔ che baro.

¹⁹ Ate, Korowii pɛɛ ŋɔ, ‘Umee dɛ́ neɡre Kooro Ahab, ásɛ o la Ramɔt Gelead dɛ́ ka yoo ba, ásɛ ba kpoo bela ɔ?’ Korowii dɔm baa cheɡa baro nyundua la bwa waa koɡrɔ. Bane ŋɔ ken, bane ɡe ŋɔ ken.

²⁰ Ate, doma bɛl ba che Korowii sie dɛ ŋɔ, ‘Mɛɛ neɡroo.’ Asɛ Korowii chaŋe ŋɔ, ‘Ŋwɛnɛ besoo taa hɛɛ ba kpɔe neɡro wɔ?’

²¹ Asɛ doma la ŋɔ, ‘Mɛɛ ɡeloo Korowii keamere baa dɛ tomɛ Kooro Ahab neɡro.’ Asɛ Korowii ŋɔ, ‘Kaa dɛ́ ka ɛ ɡɛ.’ ”

²² Korowii keame Mikaya berɛ ŋɔ, “Korowiirii ɡela he keamere la neɡre, o ɡbabirii bol he chɔɡa waa kɛŋɔ a chɛ kɛ hé sewɛ.”

²³ Ate, Kenaana bibaa Korowii keame Sedekia la, dɛ ka kpaa Korowii keame Mikaya lwɛɛma dɛ ŋɔ, “Saŋ besoo Korowii Doma ɡel mɛ dɛ ba bol wa he be bwa nɔ?”

²⁴ Korowii keame Mikaya chaŋe ŋɔ, “Hɛɛ naa, awola haa ŋɔ he ka jo dea bini ka sɔh la.”

²⁵ Belaa Israel Kooro Ahab ŋɔ o nomonome la bɛl be ŋɔ, “Lawɛ Korowii keame Mikaya kaa Amɔn waa dɛ nyiŋi bwɛjen nɔ ta, ne n bibaa Joas be,

²⁶ dɛ́ ka ŋɔ ba be ŋɔ, n ŋɔ ba lawɔ do dea, dɛɛ tɛo paanoo ne nee ɡbo ka tel kɛŋɔ maa ba jo sɔnɔnɔɔ.”

²⁷ Korowii keame Mikaya ŋɔ, “Dɛ he baa jo sɔnɔnɔɔ naa, amɔ dɛ Korowii laa cheɡɛ n nɛɛ dɛ bol wa.” Dɛ berɛ ŋɔ, “Nomɛlbwa kpɔ waa nɔ do o nyu bini.”

Kooro Ahab kpoe Ramɔt Gelead

²⁸ Ate, Israel Kooro Ahab ne Juda Kooro Jehosafat la bwɛjen Ramɔt Gelead, dɛ ka yoo ba.

²⁹ Israel Kooro Ahab ŋɔ Kooro Jehosafat be ŋɔ, “Mɛɛ beɡre n tenee dɛ́ ka ja laa tena nɔ nɛ, kɛ he te, do he koolaala.” Anomanta, Kooro Ahab beɡre o te, dɛ kaa laa la ta.

³⁰ Dɛ Siiria kooro do o laa sitɔɔla baa dɛ nyiŋi torɔɡore baa vɔwa pɛl jaɡre la be ŋɔ, “He bɛ nomɛlbwa ka yo ka ja Israel kooro ɡbo nɛ.”

³¹ Laa sitɔɔla la aa na Kooro Jehosafat la, ba liiro ŋɔ Israel kooroo, asɛ ba laa berɛ ŋɔ bá ka yoo. Kɛ waa dɛ dooɡe lɔŋɔre la, Korowii chao dɛ ɡel ba laa berɛ kaa.

³² Laa sitɔɔla la nao kɛŋɔ Israel kooro laa, anomanta, ba ɡel o nɛɛ teŋa.

³³ Siiria laa tena la bɛl ta hɛm o ka yaɡɛ Israel Kooro Ahab kon waa kpɔa tɔ ɡbemɡbe la keŋkeŋ, asɛ dɛ ka yaɡɛ o bambinyoa, dɛ o laa saahna. Asɛ kooro la ŋɔ nɛn waa soɡe o torɔɡo baa vɔwa pɛl jaaɡɔ la be ŋɔ, “Ba do mɛ bol, le n ne laa nɔ ta.”

³⁴ Dɛ yoi la kpeɡri tɔpebir la bwa, asɛ ba lawɛ kooro la kpoŋe o so torɔɡo la bini, o sie chaɡɛ Siiria laa tena la. Jɔmɔra ne tela dɛ o sewɔ.