2 Webena 17 - mzwDBL

Juda Kooro Jehosafat

¹ Kooro Asa bibaa Jehosafat chiɡ o mɛɛ naa ta, dɛ di kora. O nyiŋo dɛ ɡel o laa tena do kpeɡri Israel tena nɛ.

² O kpɔ laa tena ka so Juda harɛ bwɛjena baa ma danjwɛkpeɡa bara bwa, ne bwɛɛre bwa ta, dɛ bwɛjena a fa aa lɔ Kooro Asa lɔɡa Efrem harɛ ta bwa.

³ Dɛ Korowii ja Kooro Jehosafat nɛ, dɛkalkɛ o teŋɛ waa o nabaa Kooro Devid fa aa ɛa la ta. O ta voɡ Baalre tomɛ.

⁴ O tomɛ Korowii o mɛɛ aa toma la, dɛ teŋɛ waa waa doo ta. O ta waa Israel koranar aa ɛa ta teŋɛ.

⁵ Korowii ɡelɔ o kora che kiŋkiŋ Juda harɛ, asɛ nɛra la bwa kpɔ koŋkɛɛla baa tɛo, a che a ta o dɔ kondɔɔh ne duure kohona.

⁶ O bambile lawɛ Korowii toma kohona, asɛ dɛ chɔɡ bɔra voɡtoroma aa dɛ tomɛ voɡa ne voɡ Asera dajaŋa aa lɔ Juda harɛ ta.

⁷ Kooro Jehosafat aa di kora bene atoro ta la, o tomɛ o nomonome ŋɔ bá baɡle Korowii waa Juda harɛ bwɛjena ne bwɛjeɡre bwa ta. Banee, Bɛn Hael ne Obadia ne Sekaria ne Nɛtanɛl dɛ Mikaya.

⁸ Dɛ Lewi dea tena banuanaarɛ ne sɔfore banɛ ja ba nɛ. Lewi dea tena laanee, Sɛmaya ne Nɛtanea ne Sebadia, ne Asahɛl ne Sɛmeramɔt ne Jehonatan, ne Adonija ne Tobija dɛ Tob Adonija. Asɛ sɔfore la ɡee, Elisama ne Jehoram.

⁹ Ba iro kpɔ Korowii Mmara Tɔn la, dɛ ɡaaɡe Juda harɛ bwɛɛre bwa ta, dɛɛ baɡle o bini waa nɛra be.

¹⁰ Korowii kpɔ ɔmee ta harɛre aa bar Juda la nɛ kɛŋɔ, bá la ka yo Kooro Jehosafat laa.

¹¹ Filisti tena bane kpɔ harɛ la ta kwaa ne suuɡapoŋa ba kɛo, Arab tena ɡe ba tɛo peera kaɡboŋa anuanɛ lafraanuanɛ, dɛ boohna kaɡboŋa anuanɛ lafraanuanɛ.

¹² Gɛ taa a che Kooro Jehosafat pa mun dɛɛ do kpeɡri kohona. O ma dekpeɡa aa jaŋa ne deene baa cheɡ kondikwaa a bini bwɛjena Juda harɛ ta,

¹³ dɛ dɔ kondikwaa kohona Juda harɛ bwɛɛre ta. O berɔ kpɔ laa tena baa jemɛ yoi kɛrɛdɛ ba so Jerusalam.

¹⁴ Gɛ baa chwerɛ ba sɔna lolanar bini laanee teŋa nɔ, Dɛ le Juda dea, laa sitɔɔla baa chɔ laa tena kaɡboŋa nyoo laanee nɔ. Adna waa ɛ laa sitɔɔ, on chɔ laa tena kaɡboŋa lafraatoro nyoa.

¹⁵ Nɛɛte sɔne Jehohanan, o ɛ sitɔɔ dɛ chɔ laa tena kaɡboŋa lafraanɛ fifraanuatoro nyoa.

¹⁶ Toorotee Sikri bie Amasia, o ɡbabir le o te tɛ Korowii toma, o chɔ laa tena kaɡboŋa lafraanɛ nyoa.

¹⁷ Dɛ le Bɛnjamen dea ɡe, Eliada waa jemɛ yoi kohona, o chɔ laa tena kaɡboŋa lafraanɛ baa kpoŋe tori ne hɛma, ne kwaa baa kpɔa dɛɛ tɔ ɡbemɡbe dɛɛ yo laa nyoa.

¹⁸ Nɛɛte sɔne Jehosabad, o ɡe chɔ laa tena kaɡboŋa lafa fifraanuatoro baa kpɔ ba te, dɛ́ ka yo laa nyoa.

¹⁹ A ɡɛ nɛra nɔɔ dɛɛ tomɛ Kooro Jehosafat Jerusalam. Ba ta banɔ la waa kpɔ ba so Juda harɛ bwɛjena baa ma danjwɛkpeɡa bara la nɛɛ jae.