2 Webena 16 - mzwDBL

Israel Kooro Baasa kaa yo Juda Kooro Asa

¹ Kooro Asa aa di kora bene fifraatoro dɛ anumɛl taa Israel Kooro Baasa kpɔ laa tena ka lɔ tɔ Juda Kooro Asa nɛ dɛ pɔ o nɛ, dɛ ma danjwɛkpeɡ bar bwɛjen Rama, ásɛ bɛlbwa bɛ won le Juda harɛ ta kaa, kɛɛ dɛ́ ba jo bela.

² Kooro Asa kpɔ suuɡapoŋa ne suuɡaswɛm cheɡ deene baa kpɔ kwaa a yoɡ aa kpeɡa dɛɛ cheɡ a bini Korowii Dea la, ne anɔ la aa lɔ o koodem bela, dɛ tomɛ ba kpɔ ka tɛ Siiria Kooro Bɛn Hadad, dɛ o soɡe Damaskɔs waa ɛ harɛ la bwɛjen tenten ta dɛɛ di kora.

³ Kooro Asa ŋɔ, “N dɛ nyin kɛ n ne he fɔwɛ fɔo, ɡɛ ya naawa fa aa ɛa la. N kpɔ koŋkɛɛla aa ɛ suuɡapoŋa ne suuɡaswɛm nɔ dɛɛ tɛɛ, á ɛ fɔo dɛ́ chɔɡ he ne Israel Kooro Baasa fɔo la taraken, ásɛ o ne o laa tena le n harɛ nɔ ta kaa.”

⁴ Kooro Bɛn Hadad no Kooro Asa be dɛ tomɛ o laa sitɔɔla ne ba laa tena ŋɔ, bá ka yo Israel harɛ bwɛɛre. Ba pɔ Ijon ne Dan dɛ Ebel Bɛt Maaka bwɛɛre, dɛ Naftale dea harɛ bwɛjena baa dɛ cheɡ laala a bini bwa.

⁵ Kooro Baasa aa no ɡɛ la, o ɡel danjwɛɛ mae dɛ bar Rama toma la a ka.

⁶ Belaa Kooro Asa do Juda tena bwa ŋɔ bá la, dɛ́ ka che bwea ne daa Kooro Baasa aa kpɔa dɛɛ ma danjwɛɛ Rama la. Anee Kooro Asa kpɔ ma danjwɛkpeɡ bar bwɛjena Geba ne Mispa.

⁷ A ɡɛ saŋ la, Korowii keame Hanani ba Kooro Asa be dɛ ŋɔ, “Haa kpɔ he te dawɛ Siiria kooro nɛɛ dɛ vɛh he te kpɔe dɛ dawɛ Korowii haa dɛ tomɔ nɛɛ nomanta, Siiria kooro laa tena la le he habɔɔ.

⁸ Itiopia tena ne Lebya laa tena fa ta warɛ taeh dɛ dɔ kwaa aa do kɛŋɔ torɔɡore, ne nɛra baa dɛ so jaɡre ta naa? Kɛ haa kpɔ he te dawɛ Korowii nɛɛ la, o ɡelɔ he pɔ ba nɛ aa?”

⁹ Korowii sie lɔ harɛ nɔ ta bwa, wɛɛ nyiŋi nɛra ba wa aa dɔ kasinteŋ tɛo, dɛ tɛɛ ba kpeɡri. He ɛ ɡɛnewa, le fini dɛɛ kaa, laa ɡboo hɛɛ ba dɛɛ yoi.

¹⁰ Kooro Asa baah di Korowii keame Hanani nɛɛ kohona, asɛ dɛ lawɔ do dea. Dɛ berɛ le ɡɛ saŋ dɛɛ kaa la, Kooro Asa pa mun dɛɛ ɛ nɛra la bane hɔhɔrɔwa kohona.

Kooro Asa kora dii jaɡa

¹¹ Kooro Asa aa di kora le mumpar kaa a jaɡa la, ba chwera do Juda Koranar ne Israel Koranar Waa Tɔn bini.

¹² Kooro Asa aa di kora dɛ dɔ bene fifraatoro dɛ anuanaarɛ la, o we nakpaweela ane soo siwi. A lole kɛŋɔ weela la baa do kpeɡri, kɛ o ta Korowii soŋɛ ŋɔ ó chao, dɛ tɛɡre tena ɡbo bee wɛɛ la.

¹³ O kora dii bene fifraanaarɛ dɛ beŋkpoŋ ta la, o sewɔ,

¹⁴ asɛ ba huɡo Kooro Devid Bwɛjen Jerusalam, bwe bɛl waa komɔ kɛŋɔ dea o ɛ o ɡbaɡba huɡribɔr bini. Ba kpɔ konsɔɔhsoma ne nosɔɔhsoma fɔɡlo dɛ huɡo. Nɛra warɔ cheme dɛ mar nijena a fuh, a baɡle jirima baa kpɔa dɛɛ tɛo o seo la wa.