2 Webena 15 - mzwDBL

Juda Kooro Asa voɡa chɔɡa o harɛ ta

¹ A habɔɔ la, Korowii Doma baa so Ɔdɛd bibaa Asaria nɛ,

² asɛ o le ka cheme Kooro Asa, dɛ ŋɔ o be ŋɔ, “N naa Kooro Asa ne Juda dɛ Bɛnjamen deene nɛra bwa, hé no n be. Dɛ Korowii waa lɔ he bambile ta naa, wɛɛ ja he nɛɛ. He dɛ nyin o bɔr aa, wɛɛ ɡeloo he nao, kɛ dɛ he berɛ habɔɔ kpoo waa, o ɡe ɛɛ vɛh heyaa.

³ Israel tena soɡo la sie baa wola kasinteŋ Korowii tomɛ. Ba ta sɔfore dɔe bá baɡ ba wa, baa Korowii Mmara ɡe jemɛ.

⁴ Kɛ wenaale aa ba ba nɛɛ la, ba ɡaaɡe Korowii Israel tena aa dɛ tomɔ la bɔr, asɛ o ɡel ba nao.

⁵ A ɡɛ saŋ, dɛ a kpeɡri kɛŋɔ nɛn won dɛɛ ɡaaɡe deŋnesɔɔhna ta, dɛkalkɛ wenaale ne wesaɡasaɡare lɔ Israel harɛ la ta.

⁶ Harɛre nɛra yon dɛɛ yo dɔŋa, bwɛjena ɡe ɛɛ yo dɔŋa, dɛkalkɛ dɛ Korowiirii kpɔ wenaale baa ta ba nɛ harɛre la ta.

⁷ Kɛ he Juda tena te, hé che kiŋkiŋ, dɛ bɛ ɡel he bwara hwah, hɛɛ dɔ he kembɔree le teŋa haa dɛ teŋɛ Korowii nɛɛ la ta.”

⁸ Kooro Asa aa no Korowii waa Ɔdɛd bibaa Korowii keame Asaria aa bola la, a tɛo kpeɡri bɛl. O le voɡa aa ɛ kii kwaa la bwa ne, Juda ne Bɛnjamen deene harɛre ta, ne anɔ la aa lɔ bwɛjena bwa waa yoa dɛ pɔ a nɛra nɛɛ Efrem deŋɡarere ta la. O berɔ kwaa kon baa dɛ ɛ saraha o ta o do Korowii Dea pato sie la.

⁹ Nɛra warɔ le Efrem ne Manasɛ ne Simeon deene ta dɛ ba ja Kooro Asa nɛ, dɛ so o harɛ ta, dɛkalkɛ ba nao kɛŋɔ Korowii ja o nɛ. Kooro Asa yerɛ ba bwa, ne Juda ne Bɛnjamen deene nɛra cheme.

¹⁰ Ba cheme Jerusalam ɡɛ saŋ Kooro Asa aa di kora bene fi dɛ anue, korobie atoro ta.

¹¹ Awola tɔpere la, ba kpoo kwaa baa kpɔa le laa ta la ane ɛ sarahare tɛ Korowii. Nae lɔ lafraanuanɛ, asɛ peera ne boohna ɡe kaɡboŋa anuanɛ.

¹² Juda tena la baɡɛ nyoa ŋɔ, baa tomɛ Korowii ba naawa fa aa tomɔ la ba bambile ne ba liire bwa nee.

¹³ Nomɛlbwa, bechala kɛɛ nomoa, haah kɛɛ baa waa wola Korowii Israel tena aa dɛ tomɛ la nɛɛ teŋɛ la, a chɛ kɛ bá kpoo.

¹⁴ Ba do lɔŋɔ kohona dɛ hoh bɛle, ne pee nyeɡle bɛle, dɛ ŋwɛɛ ntam baɡle Korowii ŋɔ, baa teŋɛ fɔo la taa.

¹⁵ Juda tena la bwa sie lɛo dɛɛ hɛɡre, dɛkalkɛ ba ŋwɛɛ ntam bambile bwa ne. Ba nyin Korowii sibeɡra ne, asɛ dɛ nao. Anomanta, Korowii tɛɛ ba deŋnesɔɔhna le ba dɔma nɔn ta.

¹⁶ Kooro Asa ir o naa Maaka haŋkora ta, dɛkalkɛŋɔ o ɛ voɡ Asera daa aa ɛ kii kwaa la. Kooro Asa teŋni daa la, dɛ fuah Kedrɔn Fɛlembɔjen ta.

¹⁷ A lole kɛŋɔ Kooro Asa ta bela voɡtoroma aa soɡa dɛɛ tomɛ ba voɡa bwa chɔɡɛ le Israel harɛ ta te, kɛ dɛ o bambile cheɡɛ Korowii nɛɛ o soɡa bini bwa.

¹⁸ O kpɔ suuɡapoŋa ne suuɡaswɛm, ne kwaa bwa o ne o mɛɛ aa dɔa, dɛ kpɔ do Korowii nɔn ta la ba Korowii Dea.

¹⁹ Dɛ laa toole kpa, dɛ ka tel Kooro Asa kora dii bene fifraatoro dɛ anue ta.