2 Webena 14 - mzwDBL

¹ Kooro Abija sewɔ ba huɡo o naawa huɡribɔr Jerusalam waa ɛ Kooro Devid Bwɛjen ta. Asɛ o bibaa Asa chiɡ o naa ta dɛ di kora. Kooro Asa bere saŋ la, deŋnesɔɔhna lɔ harɛ la ta bene fi.

Juda Kooro Asa pɔ Itiopia tena nɛ

² Kooro Asa ɛ waa aa wera dɛ toɡre, Korowii waa dɛ tomɔ la be.

³ O le harɛre ane kwaa baa dɛ ɛ saraha a ta, ne bela baa dɛ tomɛ voɡa deŋɡarere ta bwa ne. O paɡre bwea baa paaɡa dɛɛ duura, dɛ teŋe voɡhaah Asera dajaŋa ta.

⁴ O do Juda tena bwa ŋɔ, baa ɛ waa Korowii ba naawa aa tomɔ la aa dɛ nyin, dɛɛ teŋɛ o Mmarare ne o webaɡla ta.

⁵ O chɔɡ bela baa dɛ tomɛ voɡa, ne kwaa baa dɛ fuh daawiile a sɔɔh aa soma a ta bwa Juda harɛ bwɛjen bɛlbwa ta, asɛ deŋnesɔɔhna do harɛ la ta o bere saŋ.

⁶ O bere saŋ, o ma danjwɛkpeɡa bar Juda harɛ bwɛjena, dɛ laa toole harɛ la ta kpa, dɛkalkɛ Korowii tɛo deŋnesɔɔhna.

⁷ Kooro Asa ŋɔ Juda tena be ŋɔ, “Hé ɡel ya ma danjwɛkpeɡa bar bwɛjena nɔ, dɛ́ ma dejaŋa dɛ́ do bune a nyoo, dɛɛ kaɡra bune ne. Harɛ la ɛ ya kon. Yaa ɛ waa Korowii yaa dɛ tomɔ la aa dɛ nyin la waa o ɡel ya dɔ deŋnesɔɔhna la.” Anomanta, ba ɛ ɡɛ asɛ a do wer tɛɛ ba.

⁸ Dɛ Kooro Asa dɔ laa tena kaɡboŋa lafraatoro Juda dea ba kpoŋe kwaa baa kpɔa dɛɛ tɔ ɡbemɡbe laa ta anjena ne lampeare. Dɛ berɛ dɔ laa tena kaɡboŋa lafraanɛ fifraanuatoro baa kpoŋe kwaa baa kpɔa dɛɛ tɔ ɡbemɡbe anjeɡre laa ta, ne tori le Bɛnjamen dea. Dɛ ba bwa ɛ banyoola kɛrɛdɛ!

⁹ Sɛra waa le Itiopia kpɔ laa tena baa wara kohona, ne kwaa aa do kɛ torɔɡore lafraatoro dɛ ba bwɛjen Maresa.

¹⁰ Ate, Kooro Asa le, dɛ ka puu yo, bɛlbwa ne o laa tena cheɡɛ ba chebɔra Sɛfata Fɛlembɔjen bini, o bɛne Maresa.

¹¹ Asɛ Kooro Asa yerɛ Korowii waa dɛ tomɔ dɛ ŋɔ, “N Naa Korowii, nomɛlbwa toole dɛ́ won cha nɛra baa wola kpeɡri bɛlbwa dɔe, bá won ka yo nɛra baa kpeɡa kɛ hen. N Naa Korowii yaa dɛ tomɛ, cha yaa, he nɛɛ ya kpɔ ya te dawɛ. He sɔn taa ya ba, dɛɛ ba ba yo laa tena baa wara nɔ la. Bɛ ɡel nɛwɛnyini pɔ he nɛ.”

¹² Korowii cha Kooro Asa ne Juda laa tena, asɛ ba pɔ Itiopia tena la nɛ. Ba chwao,

¹³ asɛ Kooro Asa ne o laa tena ti ba ka tel Gerar. Korowii ɡelɔ ba kpoo Itiopia laa tena la warɛ, ba kar ta wone yo kpa, asɛ ba pa ba laala.

¹⁴ Ate, ba chɔɡ bwɛjeɡre aa bar Gerar la bwa, dɛkalkɛ Korowii ɡelɔ ɔmee kohona chole ba nɛ. Ba jo bwɛjeɡre la ta dɛ pa ba laala, dɛkalkɛ dɛ laala lɔ bela kɛrɛdɛ.

¹⁵ Ba kaa yo nɛra bane ɡe baa dɛ nyiŋi boohna ne peera nɛ, bela baa soɡa, dɛ larawe boohna ne peera, dɛ nyoɡmare kohona dɛ laa berɛ ba Jerusalam.