2 Webena 13 - mzwDBL

Juda Kooro Abija

¹ Kooro Jɛroboam aa di kora Israel harɛ ta bene fi dɛ anuatoro taa Abija di kora Juda harɛ ta.

² Kooro Abija di kora Jerusalam bene atoro. Uriel waa le bwɛjen Gebea bihaah Maaka biee Kooro Abija. Aa ba dɛ la sie la, laa chole Kooro Jɛroboam ne Kooro Abija baah.

³ Kooro Abija kpɔ laa tena baa jemɛ yoi kaɡboŋa lafraanaarɛ, asɛ Kooro Jɛroboam ɡe kpɔ laa tena baa jemɛ yoi kaɡboŋa lafraanuatoro, ba ka cheme dɔŋa.

⁴ Kooro Abija ne o laa tena la kaa che Semaraem Bwejen waa lɔ Efrem deŋɡare harɛ ta dɛ kpɔ takpeɡ ŋɔ, “Kooro Jɛroboam ne Israel tena, hé no n be!

⁵ Haa jemɛ kɛŋɔ Korowii Israel tena aa dɛ tomɔ la cheɡɛ fɔo waa chɔ le waa wola chɔɡ ta dɛ kpɔ Israel kora tɛ Kooro Devid ne o naanar saŋ bɛlbwa dɛɛ la kɛɛ?

⁶ Kɛ Nɛbat bibaa Jɛroboam fa aa wola kooro ɛɛ mɔɔ la, o ɛ o dɔɔ Kooro Solomɔn deŋnekpeɡ dɛ pere o te le o nɛ.

⁷ A habɔɔ, nɛnsale bane boa ba nyoa, dɛ ba ja o nɛ, dɛ vuuɡi Kooro Rɛhoboam, ɡɛ saŋ dɛ o nɔn ta kao waa wola wobɛlbwa jemɛ, dɛ puu ba yo.

⁸ Taraken he dɛ nyin kɛ he yo Korowii Kora waa kpɔa do Kooro Devid naanar nɔn ta la. He laa tena warɔ dɛ berɛ dɔ nabali Kooro Jɛroboam aa kpɔ suuɡaswɛm ɛa, a ɛ voɡa haa dɛ toma.

⁹ He laa doŋi Korowii sɔfore baa ɛ Arɔn naanar ne Lewi dea tena, dɛ berɛ le nɛra bane so ba buɡ ta, ɡɛ harɛre ane nɛra aa ɛa la aa? Nomɛlbwa ɛɛ won kpɔ nabale kɛɛ peera anuanɛ ba ŋɔ bá sɔ o doŋa ta, dɛ́ ɛo kerekpoŋri kwaa haa dɛ yera he voɡa la ta.

¹⁰ Ya te, Korowiirii yaa tomɛ, ya ta on vɛɛh. Arɔn naanar ɛ sɔfore dɛɛ ɛ Korowii toma, asɛ Lewi dea tena ɡe ɛɛ cha ba.

¹¹ Chɔɔ ne jɔmɔra bwaa ba kpɔ saraha kwaa ba baa fuh, dɛ fuh daawiile a sɔɔh aa soma dɛɛ tɛ Korowii. Ba kpɔ paanoo dɛɛ dawɛ teebur waa do ɡoroŋ doŋa bɛlbwa aa wola toole o ta, dɛ choŋi kandere aa lɔ kandea daa baa kpɔ suuɡaswɛm ɛo jɔmɔra bɛlbwa. Ya dɛ ɛ waa Korowii yaa dɛ tomɔ la aa do yaa, kɛ he te vɛoh.

¹² Korowii ja ya nɛ, onee ya sitɔɔ. O sɔfore ɛɛ hoh laa bɛlee yerɛ yaa yá ba yo heya. Israel tena, he bɛ Korowii he naawa aa tomɔ yo, haa won pɔ o nɛ.”

¹³ Dɛ Kooro Jɛroboam ɡelɔ o laa tena la bane bar Juda laa tena la dɛ do habɔɔ, asɛ ba bini bane ɡe do ba sie.

¹⁴ Juda tena laa tena nao kɛŋɔ Israel laa tena la bar ba cheme, belaa ba do lɔŋɔ yerɛ Korowii. Asɛ sɔfore la hoh bɛle,

¹⁵ asɛ Juda laa tena la do laa lɔŋɔ, asɛ Kooro Abija tɔ ba sie ba ka yoo ba. Korowii ɡelɔ ba pɔ Kooro Jɛroboam ne Israel tena nɛ.

¹⁶ Israel laa tena chwao le Juda tena la be, asɛ Korowii kpɔ ba do Juda tena nɔn ta.

¹⁷ Kooro Abija ne o laa tena kpoo Israel laa tena baa jemɛ yoi taeh, laa tena dɛ ɛ kaɡboŋa lafraanue.

¹⁸ Gɛɛ Juda tena pɔ Israel tena nɛ, dɛ sɔɔh ba nyoa, dɛkalkɛ ba kpɔ ba te dawɛ Korowii ba naawa aa tomɔ nɛ.

¹⁹ Kooro Abija ti Kooro Jɛroboam laa tena, dɛ ka lɛ ba bwɛjena Bɛtel ne Jesana dɛ Efron, ne a bwɛjeɡre aa bara cheme bwa.

²⁰ Kooro Jɛroboam ta berɛ dɔ kpeɡri Kooro Abija bere saŋ kpa. Korowii tɛr o deŋne asɛ o sewɛ.

²¹ Kɛ Kooro Abija te teŋɔ di kpeɡri kohona. O mo haahna fi dɛ banaarɛ, bibaala lɔ fifraanɛ dɛ banɛ dɛ bihaahna ɡe fi dɛ banumɛl.

²² Waane ɡe Kooro Abija aa ɛa dɛ bol o kora dii ta la, ba chwera do Korowii keame Ido bwara waa tɔn bini.