2 Webena 12 - mzwDBL

Ijipt Kooro Sisak kaa yo Jerusalam tena

¹ Kooro Rɛhoboam kora aa baa che kiŋkiŋ la, o ne Israel tena bwa vɛh Korowii Mmarare ta teŋa.

² Kooro Rɛhoboam aa di kora bene anue ta la, Ijipt harɛ Kooro Sisak baa yo Jerusalam tena, ba deŋnekpeɡ baa ɛa dɛ vɛh Korowii la wa.

³ O kpɔ kwaa aa do kɛ torɔɡore kaɡboŋ lafraanɛ, ne nɛra baa soɡe jaɡre ta kaɡboŋa fifraanumɛl, dɛ laa tena baa wola won kur ba, le Lebya ne Itiopia ne Suk tena ja o nɛɛ le Ijipt harɛ.

⁴ Ba yoo lɛ Juda harɛ bwɛjena baa ma danjwɛkpeɡa bara, hale dɛ ba tel Jerusalam.

⁵ Ate, Korowii keame Sɛmaya ba Kooro Rɛhoboam ne Juda nomonome baa kaa cheme Jerusalam la be, Kooro Sisak ɔma wa. Asɛ Korowii keame Sɛmaya ka ŋɔ ba be ŋɔ, “Waa Korowii aa dɛ bol laanee nɔ, ‘He vɛɛh mɛ, anomanta, taraken n ɡe vɛh heyaa tɛ Kooro Sisak.’ ”

⁶ Ate, kooro ne Israel nomonome sɛh kɛŋɔ ba ɛ wechɔɡa dɛ ŋɔ, “Korowii waa waa ɛa wer.”

⁷ Korowii aa na ba wechɔɡa baa ɛa la, o ŋɔ o keame Sɛmaya be ja ŋɔ, “Ba sɛh ba chɔɡre nomanta, maa ban chɔɡ kpa. Kɛ dɛ Kooro Sisak baa yoo ba aa, mɛɛ ɡeloo ba le a nyoa. Maa ɡel a che Kooro Sisak nɛɛ Jerusalam tena nyɔ n danana ne.

⁸ Kooro Sisak ɛɛ pɔ ba nɛɛ bá do o lɔɡa, ásɛ ba na ɡɛ n toma aa korɛ harɛre koranar toma ta.”

⁹ Ijipt Kooro Sisak aa baa yo Jerusalam tena la, o pa kwaa aa lɔ deene baa dɛ cheɡ laala a yoɡ aa kpeɡa a bini Korowii Dea, ne anɔ la aa lɔ koodem bwa kaa. Dɛ berɛ pa kwaa baa kpɔa dɛɛ tɔ ba te ɡbemɡbe laa ta Kooro Solomɔn aa kpɔ suuɡaswɛm ɛa la.

¹⁰ Anomanta, Kooro Rɛhoboam kpɔ ayaawa ɛ ane chiɡ suuɡaswɛm kwaa la naa ta, dɛ kpɔ do nɛra baa dɛ so koodem la doonyoa dɛɛ daah bela la nomonome nɔn ta, ŋɔ báa nyiŋi a ta.

¹¹ Saŋ bɛlbwa kooro aa la Korowii Dea la, nɛra baa dɛ daah bela yon kpɔ kwaa baa kpɔa dɛɛ tɔ ɡbemɡbe laa ta la kpoŋe, ásɛ a habɔɔ ba yon kpɔ ka cheɡ dea baa dɛ cheɡa o bini la ta.

¹² Kooro Rɛhoboam aa pwɛr o te tɛ Korowii nomanta, Korowii bandia le o nɛ, o ta on chɔɡɛ kwaraa kpa. Kasinteŋ, dɛ wobɛlbwa pa mun dɛɛ do wer Juda harɛ ta tama tama.

¹³ Kooro Rɛhoboam di bene fifraanaarɛ dɛ beŋkpoŋ mɔɔ dɛ di kora. O kora cheɡɔ kiŋkiŋ, o so Jerusalam Korowii aa lea cheɡ Israel harɛre bwa bini ŋɔ, baa tomɔ bela la, dɛ di kora bene fi dɛ anuanɛ. O nya sɔne Naama, Amɔn tee.

¹⁴ Kooro Rɛhoboam ɛ wechɔɡa dɛ jo Korowii nɛ, dɛkalkɛ o ta o bambile bwa kpɔe tɛ Korowii.

¹⁵ Kooro Rɛhoboam kora dii le mumpar ba a jaɡa, ne o haahna ne bii wa, ba chwera do Korowii keamere Sɛmaya ne Ido waa dɛ na chaahna waa tɔne bini. Dɛ yoi chɔ Kooro Rɛhoboam ne Kooro Jɛroboam baah ta saŋ bɛlbwa.

¹⁶ Kooro Rɛhoboam sewɔ, asɛ ba huɡo o naawa hoɡa ta Jerusalam waa ɛ Kooro Devid Bwɛjen ta. Asɛ o bibaa Abija chiɡ o mɛɛ naa ta, dɛ di kora.