2 Webena 11 - mzwDBL

¹ Kooro Rɛhoboam aa tel Jerusalam la, o boa Juda ne Bɛnjamen deene tena baala baa jemɛ yoi nyoa nɛra kaɡboŋa lafa fifraanuatoro ŋɔ, bá ka yo Israel deene aa lɔ weekaŋle nyunduabɔr, ásɛ o won di kora harɛ la bwa ta.

² Dɛ Korowii bol o keame Sɛmaya be ŋɔ,

³ “Ŋɔ Kooro Solomɔn bie Kooro Rɛhoboam, Juda dea kooro la, ne Juda ne Bɛnjamen deene tena nɛra baa jaa la be ŋɔ,

⁴ ‘He bɛ he bala Israel tena la ka pu yo. Bɛlbwa berɛ kaa o dem, menee ɛa ɡɛ.’ ” Ate ba no, ba ta Jɛroboam ka yoi kpa, dɛ bwa berɛ kaa ɡɛ Korowii aa ŋɔa la.

Kooro Rɛhoboam danjwɛkpeɡa mae dɛ bar bwɛjena

⁵ Kooro Rɛhoboam soɡe Jerusalam dɛ ɡel ba ma danjwɛkpeɡa bar Juda ne Bɛnjamen deene bwɛjena aa teŋa nɔ.

⁶ Bɛtlɛham ne Etam dɛ Tekoa,

⁷ ne Bɛt Sor ne Soko dɛ Adulam,

⁸ ne Gat ne Maresa dɛ Sif,

⁹ ne Adoraim ne Lakes dɛ Aseka

¹⁰ ne Sora ne Aejalɔn dɛ Hɛbrɔn. Dɛ anɔɔ bwɛjena baa ma danjwɛkpeɡa bara Juda ne Bɛnjamen deene harɛre ta.

¹¹ O ma danjwɛkpeɡa bar bwɛjena la a do kpeɡri, dɛ kpɔ laa sitɔɔla chɔ a nyoa dɛɛ tɛɛ ba kondikwa ne ɔleve noo dɛ sen,

¹² ne kwaa baa kpɔa dɛɛ tɔ ɡbemɡbe laa ta ne lampeare. Gɛɛ o ɛ dɛ lɛ Juda ne Bɛnjamen deene harɛ ba do o lɔɡa.

¹³ Sɔfore ne Lewi dea tena baa lɔ Israel harɛ weekaŋle nyundua bwa ta balɔ, dɛ ba teŋɛ Kooro Rɛhoboam nɛ.

¹⁴ Lewi dea tena la ɡel harɛre aa ɛ ba kondɛɛra dibɔra dɛ ir ka so Juda ne Jerusalam, dɛkalkɛŋɔ Kooro Jɛroboam ne o bibaala ta sɛɛh kɛŋɔ bá ɛ Korowii sɔfore.

¹⁵ Kooro Jɛroboam le o ɡbaɡba kerekpoŋra ba so voɡa ta, dɛɛ tomɛ daabii ne nabali, dɛ voɡa waa sɛah la.

¹⁶ Nɛra baa le Israel deene bwa bini dɛ le ba bambile bini ŋɔ, baa tomɛ Korowii Israel tena aa dɛ tomɛ la teŋɛ Lewi dea tena nɛɛ ba Jerusalam, dɛ ba kpoo kwaa ɛ sarahare tɛ Korowii ba naawa aa toma.

¹⁷ Ba cheɡɛ o habɔɔ dɛ ɡel Juda kora la che kiŋkiŋ, dɛ cha Kooro Solomɔn bibaa Kooro Rɛhoboam bene atoro, ɡɛ baa ɛa Kooro Devid ne Kooro Solomɔn saŋ la.

Kooro Rɛhoboam haahna ne bii

¹⁸ Kooro Rɛhoboam mo haah, o sɔne Mahalat. O mɛɛ sɔne Jerimot. Jerimot mɛɛ sɔne Devid, asɛ Jerimot nya ɡe ɛ Abihel. Abihel ɡe nya sɔne Eliab. Abihel nabaa sɔne Jese.

¹⁹ Bibaala batoroo ba lolɛ. Banee Jeyus ne Sɛmaria dɛ Saham.

²⁰ Kooro Rɛhoboam berɔ mo Absalɔm bihaah Maaka. Asɛ o lolɛ bibaala, Abija ne Atai ne Sesa dɛ Sɛlomet.

²¹ Dɛ Kooro Rɛhoboam dɛ nyin Absalɔm bihaah Maaka dɛ ɡwaa o haahna ne o sɛnanar bwa. Dɛ o haahna lɔ fi dɛ banuatoro, asɛ o sɛnanar ɡe lɔ fifraanumɛl. O bibaala lɔ fifraanɛ dɛ banuatoro, asɛ bihaahna ɡe lɔ fifraanumɛl.

²² Kooro Rɛhoboam kpɔ o ne o haah Maaka bibaa Abija ɛ o bibaala la bwa nomoa, dɛɛ nyin ó cheɡo kora ta.

²³ Kooro Rɛhoboam ɛ wejemwa, dɛ kpɔ o bibaala la bɛlbwa ka so Juda ne Bɛnjamen deene harɛre bwɛjena baa ma danjwɛkpeɡa bara la ta. O ta tea, dɛ tɛɛ ba ba konnyina kohona, dɛ mo haahna ɡe tɛɛ ba warɛ.