2 Webena 1 - mzwDBL

Kooro Solomɔn wejema soŋa

¹ Kooro Devid bibaa Solomɔn soɡo kiŋkiŋ o kora ta Israel harɛ ta bwa, asɛ Korowii waa dɛ tomɔ che o mun ta, dɛ ɛo nɛnjen kohona.

² Kooro Solomɔn bol waa baɡle Israel tena la bwa, laa sitɔɔla baa chɔ laa tena kaɡboŋa ne lafare nyoo, ne sitɔɔla baa dɛ nyiŋi harɛ la ta, ne nomonnyuune dɛ nɛra la kabora bwa,

³ dɛ ŋɔ o ne ba bwa la bela baa dɛ tomɛ Korowii bwɛjen Gebeɔn, dɛkalkɛ dɛ belaa Korowii Dea Cheremibɔr, o bonɔɔ Mosis aa baŋro pua hɛŋle ɡbo harɛ ta la do.

⁴ Dɛ Kooro Devid kaa kpɔ Korowii Ne Nɛwɛnyina Fɔo Daka la le Kiriat Jearim ba, dɛkalkɛ dɛ o baŋre tɛnte dea Jerusalam ŋɔ bá kpɔ ba cheɡ o bini.

⁵ Kɛ dɛ ayaawa saraha kon Uri bibaa Besalɛl waa ɛ Hur naa aa ɛa la ɡe ta cheɡɛ Korowii Tɛnte Dea la sie Gebeɔn. Asɛ Kooro Solomɔn ne nɛra la bwa tomɛ Korowii bela.

⁶ Kooro Solomɔn laŋɔ ka kpo nae ne peera baa wola won kura saraha kon la ta Korowii Dea Cheremibɔr la sie, dɛ fuah tɛ Korowii.

⁷ Waa lɔ Gebeɔn bela la, Korowii ba o be jwaana deera ta, dɛ ba ŋɔ o be ŋɔ, “Baɡle komɛlbwa haa dɛ nyin ásɛ n kpɔ tɛɛ.”

⁸ Kooro Solomɔn chaŋe ŋɔ, “He nyin n mɛɛ Kooro Devid waa kohona, dɛ ɡel n ba chiɡ o naa ta dɛɛ di kora fini nɔ.

⁹ N Naa Korowii maa dɛ tomɛ, ɡel nyoa haa baɡɛ n mɛɛ la che. He ɡelɔ mɛɛ di kora nɛra baa wara baa wola won kur ba nɛ.

¹⁰ Tɛ mɛ wejema ne waa mun noe, ásɛ n won kpɔ nyiŋi nɛra nɔ nɛ. Ɛrɛɛ n ɡbo ɛɛ ba wona nyiŋi he nɛra baa wara ken nɔ nɛɔ?”

¹¹ Ate, Korowii ŋɔ Kooro Solomɔn be ŋɔ, “Haa lii wedɛɛɡa aa do ken, he ta kondɛɛɡa kɛɛ kondɔɔh kɛɛ waa aa ɡel he dɔ sɔn, kɛɛ he dɔma fe serewe, hale he ta he mkpa dɔe waa soŋɛ, dɛ soŋe wejema ne waa mun noe dɛ́ won nyiŋi n nɛra maa ɡela hɛɛ di kora ba nɛɛ nɔ nomanta,

¹² mɛɛ tɛɛ wejema ne waa mun noe. Mɛɛ berɔ tɛɛ kondɔɔh ne kondɛɛɡa dɛ jirima kohona, he dɔŋ aa wola lee do koranar bwa baa tɔ sie ba di kora, ne banɔ la baa ba di kora he habɔɔ.”

¹³ Ate, Kooro Solomɔn le Gebeɔn, Korowii Dea Cheremibɔr bela baa dɛ tomɛ la, dɛ ba Jerusalam. Belaa o ba so dɛ di Israel harɛ ta kora.

¹⁴ Kooro Solomɔn dɔ kwaa aa do kɛ torɔɡore kaɡboŋ lafraanaarɛ ba kpɔ dɛɛ la laa. O dɔ jaɡre ɡe kaɡboŋa fi dɛ anɛ. O kpɔ ane ka do bwɛjena ane ta, ane ɡe do o be Jerusalam.

¹⁵ O bere saŋ dɛ suuɡapoŋa ne suuɡaswɛm ta nyae Jerusalam kɛŋɔ bwea aa wola nyae nɔ. Peleme daa baa kpɔa dɛɛ do deene ɡe bu kɛŋɔ, pure daa aa cheɡɛ Juda harɛ deŋɡarere lɔɡre ken.

¹⁶ Kooro Solomɔn bonadiire yon ka yawɛ o jaɡre a yoɡ aa wera dɛɛ le Ijipt harɛ ne Kue.

¹⁷ Ba le kwaa aa do kɛ torɔɡore le Ijipt harɛ ta dɛɛ ba. Beŋkpoŋ yoɡ lɔ suuɡapoŋa lafraanumɛl, jaɡre la ɡe beŋkpoŋ lɔ suuɡapoŋa lafa fifraanue. Ba le ane bela baa tɛ Hiti ne Siiria koranar bwa.