2 Timoti 2 - mzwDBL

Yeesu Kristo sooja waa dɛ di kasinteŋ

¹ N bie Timoti, che kiŋkiŋ kpeɡri ya Dɔɔ Yeesu Kristo aa chae he dɔ le pɛɛ he ne waa pɛa la ta.

² Waa la nɛra aa chema warɛ asɛ n bol he be la, bola baɡle nɛra ba wa aa dɔ kasinteŋ dɛ jemɛ kɛ ba ɡe ɛɛ wonoo kpɔ bol baɡle nɛra bane ɡe la.

³ Dɛ wekpeɡa pui toma nɔ ta naa, ɡel he bwara nyɛɡ kɛ Yeesu Kristo sooja ɡbaɡba.

⁴ Sooja bɛlbwa dɛ nyin kɛ o toma su o nomoa siwi. Anomanta, waa o te kpɔe dɛɛ koo nɛmpɛɛne waa ta.

⁵ Chwachwaa waa dɛ chwa dɛ́ lɛ komɛl la ɡe, dɛ o ta chwae mmara la ta teŋaa, waa won chwa dɔ komɛlbwa.

⁶ Paa waa dɛ swɛɛ siwi o koo toma ta laanee chɛ kɛ o di koo la kondikonloɡla.

⁷ Gel waa maa bola nɔ do he liire bini. Korowii ɛɛ ɡeloo he jemɛ a bwa mun kɛrɛdɛ.

⁸ Lii Yeesu Kristo waa kɛŋɔ o iro le seo ta. Kooro Devid Naa on. Gɛ waa nɔɔ mɛɛ bol Amanesoma maa dɛ baɡle nɛra la ta,

⁹ dɛ koh a waa dɛɛ na wa, hale nɛra koh a waa dɛ kpɔ jɔɡrɔre vɔɡ mɛ, dɛ do mɛ dea kɛ wechɔɡ-ɛɛ. Kɛ Korowii waa te, nɛn aa won kpɔ jɔɡrɔre vɔwa.

¹⁰ Anomanta, n koh nɛra Korowii aa lee ba la waa dɛ lawɛ bambile wobɛlbwa ta, ásɛ Yeesu Kristo lɛ ba ɡe, dɛ berɛ tɛɛ ba jirima aa wola jaɡa dɔe bwa.

¹¹ Kasinteŋ wobolee nɔ. Ba ŋɔ, “Dɛ ya ne onee sewaa, ya ne wɛɛ berɔɔ ir dɛ́ dɔ mkpa.

¹² Dɛ ya lawɛ bambile wobɛlbwa ta naa, ya ne wɛɛ di koraa. Dɛ ya ŋɔ ya ne o laa aa, o ɡe ɛɛ ŋɔɔ o ne ya laa.

¹³ Dɛ ya ta kasinteŋ tena ɛɛ yaa, o te ta ɛ kasinteŋ te, waa won beɡre o te.”

Tom-ɛɛ o siwi aa su Korowii siwi wa

¹⁴ Dɛɛ lii nɛra ɡɛ waa nɔ, dɛ kah ba sibeɡra ne Korowii sie ŋɔ ba bɛ waa dɛɛ tɔŋle. Wetɔŋla ta tɔnɔ bɛlbwa dɔe. Nɛra liiree aa chɔɡ.

¹⁵ Takapɔ kpɔ he te tɛ Korowii, ásɛ he waa su o siwi kɛ nɛn waa dɛ ɛ o Korowii toma kɛrɛdɛ sihiih aa wola hen kpo, dɛ́ lawɛ kasinteŋ waa la bini kpoŋe kɛrɛdɛ.

¹⁶ Laa he te kpɔ nɛra baa dɛ bol wobosale a ne Korowii waa aa wola kaa la nɛ, dɛkalkɛ ɡɛ waa nɔ ɡelɔ nɛra ɛɛ le Korowii habɔɔ dɛ kaa ɛ anɔ la aa wola chɛɛ.

¹⁷ Ba webaɡla dɛ yɛɛ dɛɛ chɔɡ nɛra, ɡɛ ŋwɛrchɔɡe yon yɛ dɛ́ chɔɡ nɛn bwadabii la. Haemenayɔs ne Faeletɔs ja ɡɛ nɛra baa dɛ ɛ ɡɛ waa nɔ nɛ.

¹⁸ Banee nyoɡre kasinteŋ waa la ŋwɛnɛ, dɛ kaa baɡle nɛra ŋɔ seo ta ira tɔpere la ɡarɔ, dɛɛ chɔɡ nɛra baa yarada Amanesoma la bane liire waa baa yaradaa la ta.

¹⁹ Kɛ a ɛ wobɛlbwa Korowii Dea waa pa o mun la cheɡɔ kiŋkiŋ ken. Ba chwerɛ o ta ŋɔ, “Korowii jemɛ nɛra baa ɛ o kwa,” dɛ berɛ chwerɛ ŋɔ, “Nomɛlbwa waa ŋɔa o ja Yeesu Kristo nɛra nɛɛ la chɛ kɛŋɔ ó laa o te kpɔ wechɔɡa ta.”

²⁰ Dem waa kana la, konsiwi beŋkpoŋ ɡbo laa lɔ o ta. Suuɡaswɛm ne suuɡapoŋa kwaa lɔ o ta. Ane lole, daa nee ba sɛah, dɛ kpɔ choh ma ane ɡe. Ane lole, wejena ta ɡboo baa le a ne, asɛ ane ɡe ba kpɔa dɛɛ ɛ wesale bɛlbwa.

²¹ Anomanta, dɛ nomɛlbwa laa o te kpɔ wedoŋa ne wechɔɡa bwa ta naa, naate la do kɛŋɔ kwaa baa dɛ le a ne wejena ɡbo ta la. O do kaih dɛ do le tɛ o Dɔɔ, dɛ dɔ tɔnɔ tɛo, dɛ che le kɛ ó kpɔɔ ɛ tondɛɛɡa te bwa.

²² Laa he te kpɔ wedoŋa bonɔɔna aa dɛ pɛlɛ a ta la ta, ásɛ he ne nɛra baa dɛ soŋe Korowii tepoŋ ne la siwi swɛɛ wedɛɛɡa ɛɛ aa dɛ su Korowii siwi, ne Korowii yaradae, ne nɛnnyin, dɛ waa aa dɛ ba deŋnesɔɔhna ne la ta.

²³ Bɛ he te kpɔ dɛɛ jo ɡɛnewaa ne wesale tɔŋla ta. He ɡbabir jemɔ kɛ naɡra nee aa ba.

²⁴ Nɛn waa ɛ ya Dɔɔ bonɔɔ ta chɛ kɛŋɔ o ne nɛn naɡre. A chɛ kɛ ó pwɛr o te tɛ nomɛlbwa, dɛ́ won nɛra kwaa baɡla kɛrɛdɛ, dɛ nɛn jo o nɛ aa, ó won lawɛ bambile,

²⁵ dɛɛ baɡle nɛra o ne ba liire aa wola beŋkpoŋ ɛɛ la waa taa ne. Bɛl lole naa, Korowii ɛɛ na ɡɛ nɛra la sumii, dɛ́ ɡel ba charɛ ba liire, ásɛ ba won jemɛ kasinteŋ waa la,

²⁶ ásɛ ba sie ba harɛ bá chwa le Bɔnsam bel waa laɡ ba dɛ ɡel baa ɛ o waa waa dɛ nyin la ta, ásɛ dɛ dɔ ba te.